އޮލިމްޕިކްސް: މޮރޮކޯ އާއި އާޖެންޓީނާ ކުއާޓާ އަށް، ސްޕެއިން ފަހަތަށްޖައްސާލައި މިސްރު ގްރޫޕުގެ އެއްވަނަ އަށް
ޕެރިހުގައި މިހާރު ކުރިއަށްދާ އޮލިމްޕިކްސްގެ ފިރިހެނުންގެ ފުޓްބޯޅަ އިވެންޓްގައި ރޭ ކުޅުނު މެޗުތަކަށްފަހު މޮރޮކޯ އާއި އާޖެންޓީނާ ކުއާޓާ ފައިނަލަށް ދަތުރުކުރިއިރު، ސްޕެއިން ބަލިކޮށް މިސްރު ވަނީ އެ ގްރޫޕުގެ އެއްވަނަ މަގާމް ހާސިލްކޮށްފައެވެ.
މޮރޮކޯ އިން ވަނީ 3-0 ގެ ނަތީޖާއަކުން އިރާގް ބަލިކޮށްފައެވެ. ޔޫކްރޭން އަތުން 2-0 އިން އާޖެންޓީނާ މޮޅުވިއިރު، ސްޕެއިން އަތުން މިސްރު މޮޅުވީ 1-2 އިންނެވެ.
މި ނަތީޖާއާއެކު ގްރޫޕް ބީ ގެ އެއްވަނައިގައި އުޅޭ މޮރޮކޯ އާއި ދެވަނައިގައި އޮތް އާޖެންޓީނާ އަށް ތިން މެޗުން ލިބިފައިވަނީ ހަ ޕޮއިންޓެވެ. މޮރޮކޯ ކުރީގައި އޮތީ ހެޑް-ޓު-ހެޑް ރެކޯޑުންނެވެ. ތިން ވަނަ މަގާމުގައި އޮތް ޔޫކްރޭނާއި ފުލުގައި އޮތް އިރާގަށް ލިބިފައިވަނީ ތިން ޕޮއިންޓެވެ. ޔޫކްރޭނަށް ކުރިލިބެނީ ފައިދާ ގޯލްގެ ތަފާތުންނެވެ.
ނީސްގެ އެލިއާންޒް ރިވިއޭރާގައި ރޭ ކުޅުނު މެޗުގައި މޮރޮކޯ އިން ޖެހި ހުރިހާ ގޯލެއްވެސް ކާމިޔާބުކުރީ ފުރަތަމަ ހާފުގައެވެ. އެ ޓީމުން 19 ވަނަ މިނެޓުގައި ލީޑްނެގީ އަޝްރަފް ހަކީމީ ނެގި ހުރަހަކުން އާމިރް ރިޗަޑްސަން ބޮލުން ވައްދާލައިގެން ކާމިޔާބުކުރި ގޯލުންނެވެ. އޭގެފަހުން، މެޗުގެ 28 ވަނަ މިނެޓުގައި ސޫފިއާން ރަހީމީ ނަތީޖާ 2-0 އަށް ބަދަލުކޮށްލާފައިވަނިކޮށް، ފުރަތަމަ ހާފު ނިމެން ނުވަ މިނެޓަށްވެފައިވަނިކޮށް މޮރޮކޯގެ ތިންވަނަ ލަނޑުޖަހައިދިނީ އަބްދެއްސަމަދު އެޒަލްޒޫލީ އެވެ.
މި ގްރޫޕުގެ އަނެއް މެޗުގައި އާޖެންޓީނާ އިން ޔޫކްރޭން އަތުން މޮޅުވީ ފަހު ހާފުގައި ވައްދާލި ލަނޑުތަކުންނެވެ. ދެވަނަ ހާފުގެ ކުރީކޮޅު، ތިއާގޯ އަލްމާޑާގެ ގޯލުން އާޖެންޓީނާ ލީޑްނެގިއިރު، މެޗުގެ ފުރިހަމަވަގުތު ހަމަވެގެން ދެއްކި އިތުރުވަގުތުގެ ފުރަތަމަ މިނެޓުގައި އެ ޓީމުގެ ދެވަނަ ލަނޑުޖަހައިދިނީ ކްލައުޑިއޯ އެޗެވެރީ އެވެ.
ގްރޫޕް ސީ ގައި ރޭ ސްޕެއިނުން ބަދަލުތަކާއެކު ކުޅެން ނިކުމެ މިސްރު އަތުން ބަލިވިއިރު، އެ ޓީމުގެ ދިފާއީ ކުޅުންތެރިންނަށް ވަނީ ގޯސްތަކެއް ހެދިފައެވެ. މި މެޗުގައި މިސްރުން ޖެހި ދެ ލަނޑުވެސް ކާމިޔާބުކުރީ އިބްރާހިމް އަދެލް އެވެ. ސްޕެއިނުގެ ހަމައެކަނި ލަނޑު، ފަހު ހާފު ނިމެންދަނިކޮށް ކާމިޔާބުކޮށްދިނީ ސަމޫ އޮމޮރޮޑިއޯން އެވެ.
މި ގްރޫޕުގެ އަނެއް މެޗުގައި ޑޮމިނިކަން ރިޕަބްލިކާ ދެކޮޅަށް ކުޅެ އުޒްބެކިސްތާނުން ވަނީ 1-1 އިން އެއްވަރުކޮށްފައެވެ. މި މެޗަށް ނިކުތްއިރު ވެސް އުޒްބެކިސްތާން ވަނީ މުބާރާތުން ކަޓައިފައެވެ. މި ނަތީޖާގެ ސަބަބުން ޑޮމިނިކަން ރިޕަބްލިކަށް އިތުރަށް ކުރިއަށްދެވޭގޮތްނުވެ، މުބާރާތާ ވަނީ އަލްވަދާއު ކިޔަންޖެހިފައެވެ.
ރޭގެ މެޗުތަކަށްފަހު މި ގްރޫޕުގެ އެއްވަނައިގައި މިސްރު އޮތީ ތިން މެޗުން ހަތް ޕޮއިންޓް ހޯދައިގެންނެވެ. އޭގެ އެއް ޕޮއިންޓް ފަހަތުން ދެވަނައިގައި ސްޕެއިން އޮތްއިރު، ތިނެއްގައި އޮތް ޑޮމިނިކަން ރިޕަބްލިކަށް ތިން މެޗުން ލިބިފައިވަނީ ދެ ޕޮއިންޓެވެ. އުޒްބެކިސްތާނުން ގްރޫޕް ސްޓޭޖް ނިންމާލީ އެއް ޕޮއިންޓާއެކު ފުލުގައި އޮވެގެންނެވެ.