އާސެނަލަށް ކުޅެމުންއައި އިނގިރޭސި މިޑްފީލްޑަރު، އެމީލް ސްމިތު ރޯވް ގަތުމަށް ފުލަމްގެ ރެކޯޑް އަގެއް ކަމަށްވާ، ބޯނަހާއެކު 34 މިލިއަން ޕައުންޑްގެ ޓްރާންސްފާ ފީ އެއް ދެއްކުމަށް އެ ދެ ކްލަބުން އެއްބަސްވުމަކަށް އައިސްފައިވާކަމަށް ފަހުގެ މީޑިއާ ހަބަރުތައް ބުނެފިއެވެ.
ސްމިތު ރޯވް، 24، ވަނީ ލޯން އުސޫލުން ހަޑަސްފީލްޑްގެ އިތުރުން ޖަރުމަނުގެ އާރްބީ ލީޕްޒިގަށް ވެސް ކުޅެފައެވެ. އޭނާ އެންމެ ގިނަ މެޗު ކުޅެދީފައިވަނީ އާސެނަލަށެވެ. އެ ޓީމަށް މިހާތަނަށް 115 މެޗު ކުޅެ، 18 ލަނޑުޖަހައިދީފައިވެއެވެ.
އާސެނަލްގެ އެކަޑަމީން ފާހަގަވެގެންދިޔަ، ސްމިތު ރޯވް އަކީ އެކްލަބުގެ ސަޕޯޓަރުންގެ މެދުގައި މަގްބޫލް ކުޅުންތެރިއެކެވެ. އަނިޔާގެ ސަބަބުން އެންމެ ރަނގަޅު ކުޅުން ނުދެއްކި، ގަވާއިދުން ކުޅުމުގެ ފުރުޞަތު ލިބިފައިނުވާ ސްމިތު ރޯވްގެ ސޮއި ހޯދުމަށް ނިމިދިޔަ ސީޒަނުގައި އެސްޓަން ވިލާ އިން ވެސް މަސައްކަތްކުރިއެވެ. އެކަމަކު، އާސެނަލުން ވަނީ އެ ހުށަހެޅުންތަކަށް ފުރަގަސްދީފައެވެ.
މިޑްފީލްޑްގެ އިތުރުން، އެޓޭކުގެ ގިނަ މަގާމުތަކަށް ކުޅެވޭ، ސްމިތު ރޯވް ވަނީ މިހާތަނަށް އިނގިރޭސި ގައުމީ ޓީމަށް ތިން މެޗު ކުޅެދީފައެވެ. އޭނާ އަށް އެންމެ ފަހުން ގައުމީ ޓީމުން ޖާގަ ލިބުނީ 2022 ވަނަ އަހަރު އެވެ.
ސްމިތު ރޯވް ވަނީ މިހާރު އެމެރިކާގައި އާސެނަލުން ކުރިއަށްގެންދާ ޕްރީ ސީޒަންގެ ފަހު ދެ މެޗުގެ ސްކޮޑުން އުނިކޮށްފައެވެ. އެއީ، ފުލަމް އަށް ބަދަލުވުމުގެ ޓްރާންސްފާއާ ގުޅޭ މަސައްކަތްތައް ކުރިއަށްގެންދިއުމުގެ ގޮތުންނެވެ.