މަސްތުވާތަކެތި ކަމަށް ބެލެވޭ އެއްޗެއްހުރި ސެލޯފިންކޮޅުތަކަކާއެކު މާލެއިން މިހަކު ފުލުހުންގެ ބެލުމުގެ ދަށަށް ގެނެސްފިއެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ 24 އަހަރުގެ ދިވެހި ފިރިހެނެކެވެ. އޭނާ ފުލުހުންގެ ބެލުމުގެ ދަށަށް ގެނެސްފައިވަނީ ރޭ 11:15 ހާއިރު، މާލެތެރެ ބެލެހެއްޓުމުގައި ހަރަކާތްތެރިވި ގަލޮޅު ޕޮލިސް ސްޓޭޝަންގައި މަސައްކަތްކުރާ ފުލުހުން، ކުޑަހެންވޭރު ދަނޑު ކައިރީ ތިބި ބައެއްގެ އަމަލުތައް ހުރި ގޮތުން، އެމީހުން ބަލައި ފާސްކުރުމަށް ދިޔަ ވަގުތު އެތަނުގައި ހުރި މީހަކު އެއްޗެއް އެއްލާލުމުން، އެތަން ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއްހުރި 06 ސެލޯފިން ކޮޅު ފެނިފައިވާ މައްސަލައާ ގުޅިގެން ކަމަށް ފުލުހުން ވިދާޅުވެއެވެ.
އޭގެ އިތުރުން، އޭނާ ބަލައި ފާސްކުރިއިރު 10،000 އަށްވުރެ ގިނަ ދިވެހި ރުފިޔާއާއި 20 އެމެރިކާ ޑޮލަރު ފެނިފައިވާ ކަމަށްވެސް ފުލުހުން ވިދާޅުވެއެވެ. ފުލުހުން ދަނީ މި މައްސަލަ ތަހުޤީޤު ކުރަމުންނެވެ.