އޮލިމްޕިކްސްގެ އަންހެނުންގެ ފުޓްބޯޅަ އިވެންޓްގައި ނިއު ޒީލެންޑާ ދެކޮޅަށް ނިކުތުމުގެ ކުރީން، އެ ޓީމުގެ ތަމްރީންތައް ކުރިއަށްދަނިކޮށް ޖާސޫސްކުރުމުގެ ގޮތުން، އެތަނުގެ މަތިން ކެނެޑާ ޓީމުގެ އޮފިޝަލަކު ޑްރޯން ދުއްވި މައްސަލައިގައި، ކެނެޑާގެ ހަ ޕޮއިންޓް އުނިކޮށް، އެ ޓީމުގެ ކޯޗު ބެވަލީ ޕްރީސްޓްމަން އެއް އަހަރަށް ސަސްޕެންޑްކޮށްފައިވާކަމަށް ފީފާ އިން ބުނެފިއެވެ.
މި މައްސަލައިގައި ކެނެޑާގެ ފުޓްބޯޅަ އެސޯސިއޭޝަނުން ބުނެފައިވަނީ ހަ ޕޮއިންޓް އުނިކުރުމާމެދު އިސްތިއުނާފު ކުރެވޭނެ ގޮތެއް ބަލަމުންދާ ކަމަށެވެ. އަދި ޕެރިސް ގޭމްސްއަށް ބޮޑު އަސަރެއް ކުރި މި މައްސަލައިގައި އެ އެސޯސިއޭޝަނަށް 200،000 ސުވިސް ފްރޭންކް (226،346 އެމެރިކާ ޑޮލަރު) ގެ ޖޫރިމަނާއެއްވެސް ދައްކަންވަނީ ޖެހިފައެވެ.
2020 އިން ފެށިގެން ކެނެޑާ އަށް އިރުޝާދު ދެމުން އަންނަ، ޕްރީސްޓްމަން ވަނީ އޭގެ އަހަރެއް ފަހުން ޓޯކިޔޯގައި ކުރިއަށްދިޔަ އޮލިމްޕިކް ގޭމްސްގައި އަންހެނުންގެ ފުޓްބޯޅަ އިވެންޓްގައި އެޓީމަށް ރަން މެޑެލް ހޯދައިދީފައެވެ.
ޕްރީސްޓްމަން ހިމެނޭގޮތަށް، ކެނެޑާގެ އޮފިޝަލުންކަމަށްވާ ޖޯސެފް ލޮމްބާޑީ އަދި ޖޭސްމިން މަންޑާ އަށް ފެއާޕްލޭގެ އުސޫލުތަކާ ހިލާފުވުމުގެ ސަބަބުން އެއް އަހަރަށް ފުޓްބޯޅައާ ގުޅުންހުރި އެއްވެސް ޙަރަކާތެއްގައި ބައިވެރިވުން މަނާކުރެވިފައިވާކަމަށް ފީފާއިން ބުނެފައިވެއެވެ.
ފީފާ އާއި އިންޓަނޭޝަނަލް އޮލިމްޕިކް ކޮމިޓީ އިން މި މައްސަލަ ބަލަންފެށީ، އޮލިމްޕިކްސްގައި ފުރަތަމަ މެޗު ކުޅުމުގެ ކުރިން ނިއު ޒީލޭންޑުގެ ތަމްރީނު ސެޝަންތައް ކުރިއަށްދަނިކޮށް އެތަނުގެ މަތިން ކެނެޑާގެ މުވައްޒަފުން ޑްރޯން ދުއްވާފައިވާކަމަށް ނިއުޒިލޭންޑުން ޝަކުވާ ހުށަހެޅުމުންނެވެ. އެ މެޗުން ކެނެޑާ މޮޅުވީ 2-1 އިންނެވެ.
ފީފާގެ ނިންމުމާ ގުޅިގެން، އެންމެ ފަހުގެ އޮލިމްޕިކް ޗެމްޕިއަނުންނަށް، މިހާތަނަށް ގްރޫޕް އޭގައި މިހާތަނަށް ކުޅުނު މެޗަށްފަހު ލިބިފައިވަނީ މައިނަސް ތިން ޕޮއިންޓެވެ. މިއާއެކު، އެ ޓީމަށް ބާކީ އޮތް ދެ މެޗު ކާމިޔާބުކޮށްގެން ނޫނީ ގްރޫޕް ސްޓޭޖު ފަހަނައަޅައި ދިއުމުގެ އެއްވެސް އުއްމީދެއް ނެތެވެ. މި ނިންމުމަކީ، ކޯޓް އޮފް އާބިޓްރޭޝަން ފޯ ސްޕޯޓްސްގައި ކެނެޑާ އަށް އިސްތިއުނާފުކުރެވިދާނެ ނިންމުމެކެވެ.
ކެނެޑާގެ އޮލިމްޕިކް ކޮމިޓީ (ސީއޯސީ) ގެ ސެކެޓްރީ ޖެނެރަލް އަދި ސީއީއޯ، ޑޭވިޑް ޝޫމޭކަރ ބުނީ، މިކަމުގައި އެއްވެސް ދައުރެއް އަދާކޮށްފައިނުވާ ކެނެޑާގެ އަންހެން ފުޓްބޯޅަ ޓީމުގެ ކުޅުންތެރިންނަށްޓަކައި ހިތާމަކުރާ ކަމަށެވެ. އަދި، އެ ގައުމުގެ އެތުލީޓުންނަށް އެހީވުމުގެ ގޮތުން، ހަ ޕޮއިންޓް އުނިކުރުމަށް ނިންމި ނިންމުމަށް އިސްތިއުނާފްކުރުމަށް މަސައްކަތްކުރަމުންދާ ކަމަށް ވެސް ޝޫމޭކަރ ވަނީ ބުނެފައެވެ.
ކެނެޑާގެ ފުޓްބޯޅަ އެސޯސިއޭޝަންގެ ސީއީއޯ އަދި ޖެނެރަލް ސެކެޓްރީ، ކެވިން ބްލޫ ވަނީ، އެ ގައުމުގެ އަންހެން ޓީމުގެ ކުޅުންތެރިންނާ މެދު ފީފާ އިން އަޅާފައިވަނީ މާ ހަރުކަށި އަދަބެއްގެ ގޮތުގައި ސިފަކޮށްފައެވެ.
މި މައްސަލައިގައި ސީއޯސީ އިން ކުރިއަށްގެންދާ އެތެރޭގެ ތަހުގީގުގެ ދަށުން، ކޯޗު، ޕްރީސްޓްމަން މި ފަހަރުގެ އޮލިމްޕިކްސް ނިމެންދެން ސަސްޕެންޑްކޮށްފައިވުމާއެކު އެ ޓީމަށް އިރުޝާދު ދޭނީ އެސިސްޓެންޓް ކޯޗު، އެންޑީ ސްޕެންސް ކަމަށް ވެސް ސީއޯސީ އިން ވަނީ ބުނެފައެވެ.
މި ފަހަރުގެ ގޭމްސްގައި ކެނެޑާ އަށް ދެން އޮތީ، ފްރާންސާއި ކޮލަމްބިއާ އާ ދެކޮޅަށް ކުޅެން ހަމަޖެހިފައިވާ މެޗެވެ. ކޮންމެ ގްރޫޕަކުން އެންމެ ގިނަ ޕޮއިންޓް ހޯދާ ދެ ޓީމުގެ އިތުރުން އެންމެ ރަނގަޅު ނަތީޖާ ހޯދާ ތިންވަނަ މަގާމު ހާސިލްކުރާ ދެ ޓީމަކަށް ކުއާޓާ ފައިނަލުން ޖާގަ ލިބޭނެ އެވެ.