ފަހަކަށްއައިސް ނެރެމުން އަންނަ ދަށް ނަތީޖާތަކުގެ ސަބަބުން އާޖެންޓީނާގެ ރިވާ ޕްލޭޓްގެ ކޯޗުގެ މަގާމުން މާޓިން ޑެމިޗެލިސް އިސްތިއުފާ ދޭން ނިންމައިފިއެވެ.
އާޖެންޓީނާގެ ތާރީޚުގައި އެންމެ ފާހަގަކޮށްލެވޭ ދެ ކްލަބުގެ ތެރެއިން އެއްކުލަބު ކަމަށްވާ، ރިވާ ޕްލޭޓްގެ ރަސްމީ އެކްސް އެކައުންޓުން ވަނީ، އެ ކްލަބުގެ އިސްފަރާތްތަކާއެކު ޑެމިޗެލިސް ދެއްކި ވާހަކަތަކަށްފަހު އިސްތިއުފާދޭން ނިންމިކަން ކަށަވަރުކޮށްދީފައެވެ.
އަދި، ރިވާ ޕްލޭޓްގެ ކޯޗެއްގެ ގޮތުގައި ޑެމިޗެލިސް ނިކުންނަ އެންމެ ފަހު މެޗަކީ އާދީއްތަ ދުވަހު ސާމިއެންޓޯ ޑެ ޖުނިންއާ ދެކޮޅަށް ލީގުގައި ކުޅޭ މެޗު ކަމަށް ވެސް އެކްލަބުން ވަނީ ހާމަކޮށްފައެވެ.
ޑެމިޗެލިސް، 43، ވަނީ ރިވާ ޕްލޭޓްގައި ހޭދަކުރީ 18 މަސްދުވަހުގެ ތެރޭގައި ތިން ފަހަރު ލީގު ކާމިޔާބުކޮށްފައެވެ. އޭނާގެ އިރުޝާދުގެ ދަށުން އެ ޓީމުން 86 މެޗު ކުޅެފައިވެއެވެ. މީގެތެރެއިން، މި ފަހަރުގެ ސީޒަނުގެ ލީގުގައި މިހާތަނަށް ކުޅުނު ފަސް މެޗުގެ ތެރެއިން އެ ޓީމު މޮޅުވީ އެންމެ މެޗަކުންނެވެ.
ޑެމިޗެލިސް މި މަގާމާ ހަވާލުވީ، 2022 ވަނަ އަހަރުގައި އޭރުގެ ކޯޗު، މާސެލޯ ގަލާޑޯ އިސްތިއުފާ ދިނުމުންނެވެ. ގަލާޑޯ ވަނީ އެ ޓީމާއެކު ނުވަ އަހަރު ދުވަސް ހޭދަކޮށްފައެވެ. އެ ކުލަބުގެ ތާރީޚުގައި މިހާތަނަށް އެންމެ ގިނަ ލީގު ތަށި ކާމިޔާބުކުރީ ވެސް ގަލާޑޯގެ ކޯޗުކަމުގައެވެ.
ރިވާ ޕްލޭޓުން ވަނީ، ކޯޗެއްގެ ގޮތުގައި އެ ޓީމަށް ކޮށްދެއްވި މަސައްކަތްތައް ފާހަގަކޮށް އާޖެންޓީނާ އަދި މެންޗެސްޓާ ސިޓީގެ އިތުރުން ބަޔާން މިއުނިކަށް ކުޅެފައިވާ ޑިފެންޑަރު، ޑެމިޗެލިސް އަށް ޝުކުރު އަދާކޮށްފައެވެ.