ބްރެޒިލްގެ އުމުރުން 18 އަހަރުގެ ފޯވަޑް އެންޑްރިކް، ރެއާލް މެޑްރިޑްގެ ކުޅުންތެރިއެއްގެ ގޮތުގައި އިއްޔެ ރަސްމީކޮށް ދައްކާލައިފިއެވެ.
ރެއާލްގެ ސެންޓިއާގޯ ބާނެބެއުގައި އިއްޔެ ބޭއްވި މި ހަފްލާގައި އެ ކްލަބުގެ ގިނަ އަދަދެއްގެ ސަޕޯޓަރުން ބައިވެރިވެފައިވާއިރު، މި ހަފްލާގައި ވާހަކަދައްކަމުން އެންޑްރިކް ވަނީ ރޮއެފައެވެ.
ރެއާލުން ވަނީ ބްރެޒިލްގެ ސައޮ ޕައުލޯ އަށް ނިސްބަތްވާ، ޕަލްމެއިރާސް އާއެކު 2022 ވަނަ އަހަރުގައި އެންޑްރިކް ގަތުމަށް އެއްބަސްވުމަކަށް އައިސްފައެވެ. އެގޮތުން، އެންޑްރިކްގެ ސޮއި ހޯދުމަށް ރެއާލުން ވަނީ ބޯނަހާއެކު ގާތްގަނޑަކަށް 60 މިލިއަން ޔޫރޯގެ ޓްރާންސްފާ ފީއެއް ދެއްކުމަށް ޕަލްމެއިރާސް އާއެކު އެއްބަސްވެފައެވެ.
އެންޑްރިކް އާއެކު ރެއާލުން ވަނީ ހަ އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. އެ ޓީމުގައި އޭނާ ބޭނުންކުރާނީ 16 ނަންބަރު ޖާޒީ ކަމަށް ވެސް މީޑިއާ ހަބަރުތައް ބުނެއެވެ.
"މިއީ ކުޑަކަމެއް ނޫން! އަހަރެން ވަރަށް އުފާވެއްޖެ، ކުޑައިރުއްސުރެ އަހަރެންނަކީ މެޑްރިޑްގެ ފޭނެއް، މިހާރު އަހަރެން މެޑްރިޑަށް ކުޅޭނީ،" ރެއާލްގެ ކުޅުންތެރިއެއްގެ ގޮތުގައި ދައްކާލުމަށް ބޭއްވި ހަފްލާގައި އެންޑްރިކް ބުންޏެވެ.
އެންޑްރިކް ބުނީ، އޭނާ އަށް ކުރެވޭ އިހުސާސްތައް ބަޔާންކުރާނެ ގޮތެއް ވެސް ނޭނގޭ ކަމަށާއި، ރެއާލަށް ކުޅުމަކީ އަބަދުވެސް ދެކޭ ހުވަފެނެއް ކަމަށެވެ. އަދި މިއަދު އެ ހުވަފެން ހަގީގަތަކަށްވެފައިވާ ކަމަށް ވެސް އެންޑްރިކްގެ ވާހަކައިގައި ފާހަގަކުރިއެވެ.
ޕަލްމެއިރާސްގެ އެކަޑަމީގެ އުފެއްދުމެއް ކަމަށްވާ، އެންޑްރިކް ވަނީ ފާއިތުވި އަހަރު ބްރެޒިލްގެ ޤައުމީ ޓީމަށް ކުޅެން ފެށި ފަހުން މިހާތަނަށް އެ ޓީމަށް ކުޅެދިން 10 މެޗުގައި 3 ގޯލު ޖަހާފައެވެ. އަދި އޭނާއަކީ އިނގިރޭސި ވިލާތުގެ ވެމްބްލީ ސްޓޭޑިއަމްގައި މިހާތަނަށް ބައިނަލްއަގުވާމީ މެޗެއްގައި ލަނޑުޖެހި އެންމެ ހަގު ފިރިހެން ކުޅުންތެރިޔާއެވެ.
އެންޑްރިކް ވަނީ، ޕަލްމެއިރާސްގައި ހޭދަކުރީ ދުވަސްވަރުގައި އެ ޓީމަށް ކުޅުނު 82 މެޗުގައި 21 ގޯލު ޖަހާފައެވެ.
އެންޑްރިކްގެ އިތުރުން މި ފަހަރުގެ ޓްރާންސްފާ ބާޒާރުގައި ރެއާލްގެ ފޯވާޑްލައިނާ އަލަށް ގުޅުނު ކުޅުންތެރިއަކީ ފްރާންސްގެ ތަރި، ކިލިއަން އެމްބާޕޭ އެވެ. އޭނާ އެ ޓީމާ ގުޅުނީ ފްރާންސްގެ ޗެމްޕިއަން، ޕީއެސްޖީން ހިލޭ ޓްރާންސްފާއެއްގައެވެ.