އިދިކޮޅު ބައެއް ފަރާތްތަކުން، ބޭރު ޤައުމުތަކުގައި ތިއްބަވައިގެން ކުރައްވަމުންދާ މަސައްކަތްތަކަކީ، ޙައްގު މަސައްކަތްތަކެއް ނޫންކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ފަހި 913 ކުޅިވަރު ފެސްޓިވަލްގެ ނިމުން ފާހަގަކުރުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ، އެހެން ޤައުމުތަކުގައި ތިއްބަވައިގެން ޤައުމަށް ހަލާކާ ގެއްލުން ދޭން މަސައްކަތް ކުރުމަކީ، ޤަބޫލު ކުރެއްވޭނެކަމެއް ނޫން ކަމަށެވެ. ޤައުމު ބިނާ ކުރުމުގައި އިދިކޮޅު ފަރާތްތަކުގެ ހިއްސާވެސް ބޭނުންވާ ކަމަށާއި، ރާއްޖެއަށް ހެޔޮ އެދޭނަމަ ދުރުގައި ތިބުމުގެ ބަދަލުގައި، ރާއްޖެ އައިސް، އިޚުލާސްތެރިކަމާއެކު މަސައްކަތް ކުރުމަށް ރައީސް ގޮވާލެއްވިއެވެ.
ރާއްޖެ އައުމުގެ ބަދަލުގައި ޚާރިޖީގޮތުން ރާއްޖެއާއި އެހެން ޤައުމުތަކުގެ ގުޅުންތައް ގޯސް ކުރުމަކީ، މައްސަލައިގެ ހައްލު ނޫން ކަމަށް ރައީސް ވިދާޅުވިއެވެ. އަދި އިދިކޮޅު ފަރާތްތަކަށްވެސް ކެމްޕޭން ކުރުމުގެ ފުރުޞަތު ހުޅުވިފައިވާ ކަމަށާއި، އެކަމަށް މި ސަރުކާރުން ހުރަސް ނާޅުއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.