މި ސަރުކާރުން ކުރިއަށްގެންދަވާ ޢުމްރާނީ، އިޤްތިޞާދީ އަދި އިޖުތިމާޢީ ތަރައްޤީގެ މަޝްރޫޢުތަކަކީ، ފެށުމެއް ކަމަށާއި، އެ ފެށުމަށް ނިމުން އަންނާނީ، އެކަމުގެ ފޮނި މީރުކަން ޤައުމަށް ލިބޭ ދުވަހަކުން ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ފަހި 913 ގެ ނަމުގައި، ރައީސް ޔާމީން ކެމްޕެއިން އޮފީހުން ކުރިއަށްގެންދިޔަ ކުޅިވަރު ފެސްޓިވަލްގެ ނިމުން ފާހަގަކުރުމަށް ރޭ ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ވާހަކަފުޅު ފެއްޓެވީ، ދިވެހިރާއްޖެއަކީ އެންމެންނަށް އުފާވެރި ތަނަކަށް ހައްދަވަން ބޭނުންފުޅުވާކަމަށް ވިދާޅުވަމުންނެވެ. އެއަށްފަހު ޤައުމުގައި މިވަގުތު ކުރިއަށްގެންދަވާ ބޮޑެތި މަޝްރޫޢުތަކަށް އަލިއަޅުއްވާލެއްވިއެވެ. އަދި އެ މަޝްރޫޢުތަކަކީ ފެށުމެއްގެ ގޮތުގައި ދެކެވަޑައިގަންނަވާ ކަމަށާއި، އެ މަޝްރޫޢުތައް ނިމިގެންގޮސް، ސިންގަޕޫރާއި، ދުބާއީ ފަދަ ޤައުމަކަށް ރާއްޖެ ހެދިގެން ނޫނީ، މި މަސައްކަތަށް ނިމުން ނާންނާނެ ކަމަށް ރައީސް ވިދާޅުވިއެވެ.
ސިއްޙީ ޚިދުމަތުގެ ދާއިރާއަށް އަލިއަޅުއްވާލައްވާ ވާހަކަފުޅު ދައްކަވަމުން ރައީސް ޔާމީން ވިދާޅުވީ، އައި.ޖީ.އެމް.އެޗްގައި އަޅުއްވާ 25 ބުރީގެ ޢިމާރާތުގެ މަޝްރޫޢުން ޙާޞިލްކުރައްވަން ބޭނުންފުޅުވާ ނަތީޖާއަކީ، އެ ހޮސްޕިޓަލުން މި ސަރަޙައްދުގެ އެންމެ މަތީ ފެންވަރުގެ ސިއްޙީ ޚިދުމަތް ލިބިގެން ދިއުން ކަމަށެވެ. ރާއްޖޭގެ ސިއްޙީ ނިޒާމަކީ މުޅި ދުނިޔޭގެ ފެންވަރުގައި ބަލައިގަނެ، އެކަމުގެ ސަބަބުން ރާއްޖެއަށް ފަތުރުވެރިން އަންނަފަދަ ސިއްޙީ ނިޒާމަކަށް ހެއްދެވުމަށް ބޭނުންފުޅުވާ ކަމަށް ރައީސް ވިދާޅުވިއެވެ. އަދި ތަޢުލީމީ ދާއިރާއާއި، ކުޅިވަރާއި، ބޯހިޔާވަހިކަމާއި، އެއަރޕޯޓް މަޝްރޫއާއި، ފަތުރުވެރިކަމުގެ ދާއިރާއިންވެސް މި ނަތީޖާ ނެރުއްވަން ބޭނުންފުޅުވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، ރާއްޖޭގެ އަދުލު އިންސާފުގެ ދާއިރާއިން ނެރުއްވަން ބޭނުންފުޅުވާ ނަތީޖާވެސް ރައީސް ހާމަކޮށްދެއްވިއެވެ. އަދި ޚާރިޖީ ސިޔާސަތު ކާމިޔާބުވާނީ ދުނިޔޭގެ ހުރިހާ ޤައުމުތަކެއް ޝާމިލްވާ ގޮތަށް އެ ސިޔާސަތު ބައްޓަން ކުރެވިގެން ކަމަށްވެސް އެމަނިކުފާނު ވިދާޅުވިއެވެ.
ރާއްޖޭގައި މިވަގުތު ކުރިއަށްގެންދަވާ ބިލިއަން ރުފިޔާގެ މަޝްރޫޢުތަކުގެ ފައިދާ ކައިރި މުސްތަޤްބަލެއްގައި ފެނިގެންދިއުމަކީ، ސަރުކާރުގެ އިޤްތިޞާދީ އެޖެންޑާއިން ނެރުއްވަން ބޭނުންފުޅުވާ ނަތީޖާ ކަމަށް ރައީސް ވިދާޅުވިއެވެ. ޤައުމު ތަރައްޤީ ކުރުމަށް ސަރުކާރުން ނަގަމުންދާ ލޯނުތައް ނަގަމުންދަނީ، އެ ދަރަނިތައް އަދާކުރުމުގެ ޤާބިލްކަން ސަރުކާރުގެ ކިބައިގައި އޮތުމުން ކަމަށްވެސް ރައީސް ފާހަގަކުރެއްވިއެވެ. ވާހަކަފުޅު ނިންމަވާލައްވަމުން ރައީސް ޔާމީން ވިދާޅުވީ، އެމަނިކުފާނަކީ ވެރިކަމުގެ ދަހިވެތި ކަމުގައި އުޅުއްވާ ބޭފުޅެއް ނޫން ކަމަށާއި، ނަމަވެސް މަސައްކަތް ކުރައްވަމުން ގެންދަވަނީ ޤައުމު ބިނާ ކުރުމުގައި ގެންގުޅުއްވާ އުންމީދުތައް ހަޤީޤަތަކަށް ހެއްދެވުމަށް ކަމަށެވެ.