ރާއްޖޭގެ އެންމެ ފުން އަދި ޑައިވިނަށް ޚާއްޞަ ޕޫލް ފުވައްމުލަކުގައި

ފުވައްމުލައް ސިޓީއަކީ ރާއްޖޭގެ އެހެން ރަށްތަކާ ޚިލާފަށް ވަކިން އޮންނަ ރަށެކެވެ. ފުވައްމުލައް ސިޓީއަކީ ރާއްޖޭގެ އެހެން ރަށްރަށާ ޚިލާފަށް އެއް ފަސްގަނޑަކަށް އެއް އަތޮޅެއްގެ ގޮތުގައި އޮންނަ އެކަހެރި ރަށެކެވެ. އެ ރަށަކީ ވަށައިގެން ބިޔަ ބޮޑެތި ރާޅު ނަގާ ކަނޑު އޮންނަ ރަށަކަށްވެފައި، އެ ރާޅުތަކުގެ ތެރެއަށް މޫދަށް އެރި އުޅުމުގެ ތެރޭގައި ނުރައްކާތެރި އެތައް ހާދިސާއެއް ހިނގާފައިވާ ރަށެކެވެ. މިއީ މިހާރު އެންމެ ބަރަށް ލޯކަލް ޓޫރިޒަމް ކުރިއަރަމުން އަންނަ އެ ރަށްވެސްމެއެވެ.

ގުދުރަތީ ރީތި ކަމުގެ އިތުރުން ޓޫރިސްޓުންގެ ސަމާލުކަން ފުވައްމުލަކަށް ލިބޭ އެއްކަމަކީ، އެ ރަށުގެ ވަށައިގެން ކަނޑުގައި އުޅޭ ބޮޑެތި ފެމުނު މިޔަރުތަކެވެ. އެ މިޔަރުތައް ކައިރިން ދެކިލައި، އެތަނުގައި ފީނުމަށް ކޮންމެ މަހަކު ވެސް ގިނަ ޢަދަދެއްގެ ޓޫރިސްޓުންތަކެއް ފުވައްމުލަކަށް ޒިޔާރަތްކުރެއެވެ.

އެހެންކަމުން ލޯކަލް ޓުއަރިޒަމާއެކު ފުވައްމުލައް ސިޓީއަކީ ޑައިވް ޑެސްޓިނޭޝަނެއްގެ ގޮތުގައި ދުނިޔެއަށްވެސް މަޝްހޫރުތަނެކެވެ. ގިނަ ޑައިވަރުން ތަކެއްގެ ހުވަފެނީ މަންޒިލަކަށް ފުވައްމުލައް ވެފައިވާއިރު އެކަމަށް އޮތް އެންމެ ބޮޑު އެއް ގޮންޖެހުމަކީ ޑައިވަރުން ތަމްރީނުކުރުމާއި މޫދުގައި ކުރަންޖެހޭ އެނޫންވެސް ގިނަ ކަންތައް ކުރުމަށް ރަށުގެ ވަށައިގެންވާ މޫދަކީ އެންމެ އެކަށޭނެ ތަނަށް ނުވުމެވެ. އެހެންކަމުން ބިޔަ ރާޅު ނަގާ މޫދަށް ފީނަން ނުވަތަ ޑައިވިނަށް ދިއުމުގެ ކުރިން އެއްގަމުގައި ތިބެގެންވެސް ޑައިވިންގެ ތަމްރީންތައް ހެދޭނެ އިންތިޒާމް މިހާރު އެ ސިޓީގައި ޤާއިމްކޮށްފައިވެއެވެ.

ފުވައްމުލައް ސިޓީގައި ހިންގާ 11 ޑައިވްސެންޓަރުގެ ތެރެއިން ޑައިވްކްލަބް އޮލިގެ ހިންގާ އެކްސްޓްރީމް މޯލްޑިވްސް އަކީ ފާހަގަކޮށްލެވޭ ޑައިވް ސެންޓަރެކެވެ. މި ޑަިއވް ސެންޓަރުގައި ވަނީ ޑައިވަރުން ތަމްރީންވުމަށް ޚާއްސަކޮށްގެން ޕޫލެއް ތަރައްޤީކޮށްފައެވެ. މި ޕޫލުގެ މައިގަނޑު ބޭނުމަކީ ޑައިވް ޑެސްޓިނޭޝަނެއްގެ ގޮތުގައި މަޝްހޫރު ވަމުން އަންނަ ފުވައްމުލަކުގައި ޑައިވަރުން ތަމްރީނު ކުރުމެވެ. ނަމަވެސް ފެތުމަށާއި ފަރުވާއެއްގެ ގޮތުގައި މޫދު ކަސްރަތުކުރަންޖެހޭ، އުމުރުން ދުވަސްވީ މީހުންނަށް ބޭނުންކުރެވޭނެ ބައެއް ވެސް މި ޕޫލްގައި ހަދާފައިވެއެވެ.

ރާއްޖެއިން މިހާރު މަދުން ފެންނަ ބާވަތެއް ކަމަށްވާ ފެމުނު މިޔަރު ފަދަ ބާވަތްތައް ފުވައްމުލަކު ބޭރުން ފެންނާތީ، އެ މިޔަރުތައް ބަލާލުމަށް މޫދު އަޑިއަށް ފީނުމުގެ ކުރިން، ޕޫލްގައި ފީނަން ދަސްކުރުމުގެ ފުރުޞަތު ޓޫރިސްޓުންނަށް ދިނުމަކީވެސް މިފަދަ ޕޫލެއް ތަރައްޤީކުރުމުގެ ބޭނުމެކެވެ. އެ ފުރުސަތު ފަހިކޮށްދިނުމާއެކު ލޯކަލް ޓޫރިޒަމް ކުރިއެރުވުމަކީވެސް މި ޕޫލް ތަރައްޤީކުރުމުގެ މަޤްޞަދެކެވެ.

މި ޕޫލް އޮންނަނީ ދެބަޔަކަށް ބަހާލާފައެވެ. އެއީ ތިލަ ބަޔަކާއި ފުން ބައެކެވެ. ޕޫލްގެ ފުން ބަޔަކީ ޑައިވިނުގެ ބައެއް އުކުޅުތައް ދަސްކުރުމަށް ޚާއްޞަ ބައެކެވެ. މިބައިގެ ފުންމިނުގައި 4.6 މީޓަރު ހުރެއެވެ. މިއީ ރާއްޖޭގައި މިހާތަނަށް ތަރައޤީކޮށްފައިވާ ޕޫލްތަކުގެ ތެރެއިން އެންމެ ފުން ޕޫލެވެ.

މި ޕޫލްގެ ތިލަބައިގެ ފުން މިނަކީ 1.2 މީޓަރެވެ.

މި ޕޫލަކީ މިހާތަނަށް ރާއްޖޭގައި ތަރައްޤީކުރި އެންމެ ފުން ޕޫލުގެ އިތުރުން ފުރަތަމަ ޑައިވް ޕޫލްވެސްމެވެ. އޮލިގެ ޑައިވް ޕޫލުން ހިންގާ ކޯސްތައް ކުރިޔަށް ގެންދަނީ ހަމަޖެހިފައިވަނީ އެފް އެޗް އޭ އެމް ސުކޫބާ އިންސްޓިޓިއުޓުންނެވެ. މި ސެންޓަރުން މިހާރުވެސް ޑައިވިންގެ ކޯސްތައް ކުރިއަށް ގެންދާއިރު މިއީ ހަމައެކަނި ފުވައްމުލައް ސިޓީގެ ރައްޔިތުންނަށް ޚާއްސަ ތަނެއް ނޫނެވެ. ރާއްޖޭގެ އެކި ސަރަޙައްދުތަކުން މި ޕޫލް ބޭނުންކޮށްގެން ޑައިވިން ކޯސްތައް ފުރިހަމަ ކުރެވޭނެ އިންތިޒާމްވެސް ވަނީ ހަމަޖައްސާފައެވެ.

މި ސްވިމިންގ ޕޫލް އޮންނާނީ ފުވައްމުލަށް ސިޓީގެ ފުނާޑު އަވަށުގެ އައިކޮން ގޯތިތެރޭގައެވެ. ޕޫލްގެ މަސައްކަތް ނިންމާ އެތަން ބޭނުން ކުރަން ފެށީ 2021 ވަނަ އަހަރުގެ ތެރޭގައެވެ.

މި ފުން ޕޫލާއެކު މޫދަށް އެރިގެން ޑައިވިން ދަސްކުރުމުގެ ބަދަލުގައި ޕޫލުގައި ދަސްކުރުމުގެ ފުރުޞަތު މިވަނީ ފަހިވެފައެވެ.