ނިއުކާސަލްގައި އޭނާ ހުރީ އުފަލުން ކަމަށާއި، ސަޕޯޓާއި ހިތްހަމަޖެހުން ލިބެމުން އަންނަހާ ހިނދަކު އެ ކްލަބުގައި ދެމިހުންނާނެ ކަމަށް، ހުސްވެފައިވާ އިންގްލެންޑްގެ ކޯޗުގެ މަގާމަށް ގެންނާނެކަމަށް މީޑިއާގައި އެންމެ ބާރަށް ދެކެވެމުން އަންނަ ނިއުކާސަލްގެ ކޯޗު އެޑީ ހޯވް ބުނެފިއެވެ.
ހޯވް މިހެން ބުނީ، ނިއުކާސަލްގެ ޓްރެއިނިންގ ކޭމްޕަށް ގޮސް ޖަރުމަނުގައި ހުރެ ބީބީސީ ރޭޑިއޯ އަށް ދިން އިންޓަވިއުއެއްގައެވެ.
އިންގްލެންޑްގެ ކޯޗުގެ މަގާމު ހުސްވީ، ޖެހިޖެހިގެން ޔޫރޯގެ ދެ ފައިނަލުން ބަލިވުމާއެކު ކޯޗު ގަރެތު ސައުތުގޭޓް މަގާމުން އިސްތިއުފާދިނުމުންނެވެ.
ހޯވް ބުނީ، މިވަގުތަށް ބަލާއިރު އޭނާގެ ސިކުނޑީގައި އެހެން ކަމަކާ ވިސްނާނެ ޖާގައެއް ނެތް ކަމަށާއި، ނިއުކާސަލްގައި ކުރަމުންދާ މަސައްކަތަށް ވަރަށް ބޮޑަށް ކޮމިޓްވެފައިވާ ކަމަށެވެ.
"ހަގީގަތުގައި ވެސް އެހެން ކަމަކާ ވިސްނުމެއް ނެތް، ނިއުކާސަލްގައި ކުރަމުންދާ މަސައްކަތަށް މިހުރީ ވަރަށް ބޮޑަށް ކޮމިޓްވެފަ." ހޯވް ބުންޏެވެ.
އަދި، ނިއުކާސަލްގެ ފަރާތުން އެއްބާރުލުމާއި ސަޕޯޓް ލިބި، ހިތްހަމަޖެހުމާއި އުފަލާއެކު ހުންނަހާ ހިނދަކު އެ ޓީމު ދޫކޮށްނުލާނެ ކަމަށާއި، އޭނާ އެ ކްލަބުގައި ހުރީ ވަރަށް އުފަލުން ކަމަށް ވެސް ހޯވް ބުންޏެވެ.
ނިއުކާސަލްގެ ކޯޗެއްގެ ގޮތުގައި މަސައްކަތްކުރުމުގެ ފުރުޞަތު ލިބުމަކީ ފަޙުރަކާއި ޝަރަފެއް ކަމަށާއި، ގިނަ އަހަރުތަކެއް ވަންދެން މަގާމުގައި ހުރެ، އެ ކްލަބާއެކު ޓްރޮފީ ހޯދަން ބޭނުންވާ ކަމަށް ވެސް ހޯވް ވަނީ ބުނެފައެވެ.
އިންގްލެންޑްގެ އައު ކޯޗުގެ މަގާމަށް ގެނައުމަށް ވާހަކަ ދައްކަމުންއަންނަ ކޯޗުގެ ތެރޭގައި ހޯވްގެ އިތުރުން ގްރަހަމް ޕޮޓާ އާއި މައުރީސިއޯ ޕޮޗެޓީނޯ އަދި ތޯމަސް ތުޗެލް ހިމެނެއެވެ.
މިދިޔަ ހުކުރު ދުވަހު އިނގިރޭސި އެފްއޭ އިން ވަނީ، އެ އިދާރާގެ ރަސްމީ ވެބްސައިޓްގެ ޕޯޓަލެއް މެދުވެރިކޮށް ރަސްމީކޮށް ކޯޗުގެ މަގާމަށް ހުށަހެޅުމުގެ ފުރުޞަތު ހުޅުވާލައިފައެވެ.