2030 ވަނަ އަހަރުގެ ވޯލްޑް ކަޕްގެ މެޗުތައް ކުޅުމަށް ރެއާލާއި ބާސެލޯނާގެ ސްޓޭޑިއަމް ކަނޑައަޅަނީ
ދުނިޔޭގެ ތިން ބައްރެއްގެ، ހަ ގައުމެއްގައި ބޭއްވުމަށް ހަމަޖެހިފައިވާ 2030 ވަނަ އަހަރުގެ ފީފާ ވޯލްޑް ކަޕްގައި ސްޕެއިނުން މެޗުތައް ކުޅުމަށް ކަނޑައަޅާ 11 ސްޓޭޑިއަމްގެ ތެރޭގައި ރެއާލް މެޑްރިޑާއި ބާސެލޯނާގެ އިތުރުން އެތުލެޓިކޯ މެޑްރިޑްގެ ރަސްމީ ދަނޑުތައް ހިމެނުމަށް ސްޕެއިނުގެ ފުޓްބޯޅަ ފެޑެރޭޝަން، އާރްއެފްއީއެފް އިން ނިންމައިފިއެވެ.
ފީފާ ވޯލްޑް ކަޕް ބާއްވާތާ 100 އަހަރު ފުރޭ މުބާރާތް ކަމަށްވާ 2030ގެ ވޯލްޑްކަޕް ބާއްވަން ބިޑު ކާމިޔާބުކުރީ ޔޫރަޕްގެ ސްޕެއިން، ޕޯޗުގަލް އަދި އެފްރިކާގެ މޮރޮކޯގެ އިތުރުން ތާރީޚީ މުނާސަބާ ފާހަގަކުރުމަށް މި މުބާރާތުގެ ފުރަތަމަ ތިން މެޗު ކުޅުމަށް ހަމަޖައްސާފައިވާ އުރުގުއޭ، އާޖެންޓީނާ އަދި ޕެރެގުއޭގައި އިތުރު 45 ދަނޑުވަނީ ޓީމްބޭސްގެ ގޮތުގައި ހަމަޖައްސާނެއެވެ.
2030 ވަނަ އަހަރުގެ ވޯލްޑް ކަޕްގެ މެޗުތައް ހޯސްޓްކުރުމަށް ސްޕެއިނުން ކަނޑައަޅާފައިވާ އިތުރު ދަނޑުތަކުގެ ތެރޭގައި، ސެވިއްޔާ، މަލާގާ، ރެއާލް ސޮސިއެޑާޑްގެ އިތުރުން އެތުލެޓިކް ބިލްބާއޯ އާއި ލަސް ޕަލްމާސް އަދި އަލަށް ޕްރޮމޯޓުވީ އެސްޕަންޔޯލްގެ ހޯމް ސްޓޭޑިއަމް ހިމެނެއެވެ.
މި ލިސްޓުގައި ނުހިމެނުނު އެންމެ ފާހަގަކޮށްލެވޭ ސްޓޭޑިއަމަކީ، ވެލެންސިއާގެ މެސްޓައްލާ ސްޓޭޑިއަމެވެ. ލަލީގާގެ ފަސްވަނަ އަށް އެންމެ ބޮޑު މި ސްޓޭޑިއަމަކީ ގާތްގަނޑަކަށް 49،430 މީހުންނަށް ކުޅިބަލަން ވަދެވޭނެ ސްޓޭޑިއަމެކެވެ.
ސްޕެއިނުގެ އެފްއޭ، އާރްއެފްއީއެފް އިން ބުނީ، 2030 ގެ ވޯލްޑް ކަޕްގެ މެޗުތައް ހޯސްޓްކުރުމަށް ހުރިހާ ގައުމަކުން މުޅި ޖުމްލަ 20 ސްޓޭޑިއަމެއް ހަމަޖައްސާނެ ކަމަށެވެ.
އަދި މުބާރާތުގެ މެޗުތަކަށް ޔޫރަޕްގެ ބައްރުން ކަނޑައަޅައި ސްޓޭޑިއަމްތަކުގެ އަދަދު 11 އިން 13 އަށް އިތުރުކުރުމުގެ ވިސްނުމެއް ގެންގުޅޭ ކަމަށާއި، އެކަން އެގޮތަށް ނިންމާނީ ތިން ގައުމުގެ ފެޑެރޭޝަނުގެ ސިއްރު ވޯޓަކުން ކަމަށް ވެސް ސްޕެއިނުގެ އެފްއޭ އިން ވަނީ ބުނެފައެވެ.
މުބާރާތުގެ އަނެއް ހޯސްޓް ކަމަށްވާ، މޮރޮކޯ އިން ވަނީ، ކަސަބްލަންކާ ކައިރީގައި މުޅިން އައު ސްޓޭޑިއަމެއް ބިނާކުރަން ނިންމައިފައެވެ. އަދި އިތުރު ހަ ސްޓޭޑިއަމެއް މުބާރާތުގެ ކުރިން އަޕްގްރޭޑްކުރާނެ ކަމަށް މޮރޮކޯ އިން ބުނެއެވެ.