ޔޫރޯ ފުޓްބޯޅަ މުބާރާތުގައި ކުރިމަތިވީ ނާކާމިޔާބީއާ ގުޅިގެން ޑެންމާކްގެ ކޯޗުގެ މަގާމުން ކެސްޕާ ޔޫލްމަން އިސްތިއުފާ ދީފިއެވެ.
ޔޫލްމަން، 52، ޑެންމާކްގެ ކޯޗުގެ މަގާމު ދޫކޮށްލާފައިވާކަން އެ ގައުމުގެ ފުޓްބޯޅަ އެސޯސިއޭޝަނުން ވަނީ ކަށަވަރުކޮށްދީފައެވެ.
ޔޫލްމަންގެ ކޮންޓްރެކްޓް އުވާލަން ނިންމީ، އޭނާގެ އެދުމުގެ މަތީން ކަމަށް ވެސް ޑެންމާކް އެފްއޭ އިން ވަނީ ބުނެފައެވެ. އެ ޓީމާއެކު އޭނާ ހަދާފައިވާ އެއްބަސްވުން ހަމަވާން ބާކީ އެއް އަހަރު އެބައޮތެވެ.
އެންމެ ފަހުގެ ޔޫރޯގެ ގްރޫޕް ސްޓޭޖުގައި މެޗަކުން މޮޅެއްނުލިބި ޑެންމާކަށް ނިންމާލަންޖެހުނުއިރު، އެންމެ ފަހުން ކުޅުނު ބޮޑު ދެ މުބާރާތުގައި ކުޅުނު ހަތް މެޗުން ވެސް އެ ޓީމަށް މޮޅުވެވިފައެއްނުވެއެވެ.
ހުސްވެފައިވާ ކޯޗުގެ މަގާމާ ވަގުތީގޮތުން ހަވާލުވާނީ މޯޓެން ވިއެގްހޯސްޓް ކަމަށް ޑެންމާކް އެފްއޭ އިން ބުނެއެވެ.
ޑެންމާކްގެ ކޯޗުކަމާ ވަގުތީގޮތުން ހަވާލުވި، ވިއެގްހޯސްޓް ވަނީ 2020 ވަނަ އަހަރުން ފެށިގެން ޔޫލްމަންގެ އެސިސްޓެންޓެއްގެ ގޮތުގައި މަސައްކަތްކޮށްފައެވެ. އޭގެކުރީން، އޭނާ ވަނީ ޑެންމާކްގެ 21 އަހަރުން ދަށުގެ ގައުމީ ޓީމަށް ވެސް އިރުޝާދުދީފައެވެ.
ޑެންމާކްގެ އެފްއޭ އިން ބުނީ، އިންޓެރިމް ކޯޗެއްގެ ގޮތުގައި 2025 ވަނަ އަހަރުގެ ނިޔަލަށް ވިއެގްހޯސްޓް ދެމިހުންނާނެ ކަމަށެވެ.