އިޓަލީގެ ފުރަތަމަ ޑިވިޝަނަށް އަލަށް ޕްރޮމޯޓުވި، ކޯމޯގެ ހެޑްކޯޗުގެ މަގާމަށް، ވަގުތީގޮތުން ކުރީން އެ މަގާމު އަދާކުރި ސްޕެއިނުގެ މިޑްފީލްޑަރު، ސެސްކް ފަބްރެގާސް ހަމަޖައްސައިފިއެވެ.
ކުރިން، އާސެނަލް އާއި ބާސެލޯނާގެ އިތުރުން ޗެލްސީ އަށް ކުޅެފައިވާ ފަބްރެގާސް އަކީ އެ ކްލަބުގެ ޝެއާ ހޯލްޑަރެކެވެ.
ކޯމޯގެ ހެޑްކޯޗުގެ މަގާމާ ރަސްމީކޮށް ހަވާލުވުމަށްފަހު، ފަބްރެގާސް ބުނީ، ހެޑްކޯޗުގެ ގޮތުގައި އެ ޓީމާއެކު އައު ސީޒަނަށް ނިކުންނައިރު ވަރަށް ބޮޑު އުފަލެއް ލިބިފައިވާ ކަމަށެވެ. އަދި، އޭނާ އަށް އިތުބާރުކޮށް، އެ މަސްއޫލިއްޔަތު ހަވާލުކުރުމުން ކްލަބުގެ އިސްވެރިންނަށް ޝުކުރު އަދާކުރާކަމަށް ވެސް ފަބްރެގާސް ބުންޏެވެ.
ފަބްރެގާސް ބުނީ، ކުރިއަށް އޮތް ސީޒަނަކީ އުނދަގޫ އެހާ، މުހިއްމު ސީޒަނެއް ކަމަށެވެ. އެހެންނަމަވެސް، ކްލަބުގެ ކޯޗިންގ ސްޓާފުންގެ އިތުރުން އޭނާ ވެސް ފުރިހަމަ އަށް ތައްޔާރުވެފައިވާ ކަމަށް ވަނީ ބުނެފައެވެ.
ފަބްރެގާސްގެ ޕްރޮފެޝަނަލް ކެރިއަރު 2023 ވަނަ އަހަރު ނިންމާލީ ވެސް ކޯމޯގައެވެ. އޭގެފަހުން، އޭނާ ވަނީ އެ ޓީމުގެ އެސިސްޓެންޓް ކޯޗެއްގެ ގޮތުގައި މަސައްކަތްކޮށްފައެވެ. އަދި އެއަށްފަހު، އިންޓެރިމް ކޯޗެއްގެ ގޮތުގައި ހަމަޖެއްސީ މިދިޔަ ނޮވެންބަރު މަހުގައެވެ. އެއީ އޭރުގެ ކޯޗު، މޮރޭނޯ ލޮންގޯ މަގާމުން ދުރު ކުރުމަށްފަހު އެވެ.
ފަބްރެގާސް ކޯޗުގެ މަގާމާ ހަވާލުވިއިރު އެ ޓީމު އޮތީ ސެރިއޭ ބީ ގެ ހަތްވަނަ މަގާމުގައެވެ. އެކަމަކު އޭނާގެ އިރުޝާދުގެ ދަށުން، އެ ޓީމުން ވަނީ ދެވަނައިގައި އޮވެ، ނިންމާލައި އިޓަލީގެ ފުރަތަމަ ޑިވިޝަނަށް ޕްރޮމޯޓުވެފައެވެ.
ކޯމޯ އިން އައު ސީޒަނަށް ތައްޔާރުވުމުގެ ގޮތުން، އެންމެ ފުރަތަމަ ގެނައި ކުޅުންތެރިއަކީ ކުރީން، ލިވަޕޫލާއި ސެވިއްޔާ އަށް ކުޅުނު ސްޕެއިނުގެ ފުލްބެކް، އަލްބާޓް މޮރޭނޯ އެވެ. އޭނާ އެ ޓީމާ ގުޅުނީ އެއް އަހަރު ދުވަހަށެވެ.
އައު ސީޒަނުގައި ކޯމޯގެ ފުރަތަމަ މެޗުގައި އަންނަ އޯގަސްޓް މަހުގެ 19 ވަނަ ދުވަހު ނިކުންނާނީ ރަށުން ބޭރުގައި ޔުވެންޓަސްއާ ދެކޮޅަށެވެ.