ސްޕެއިނުން ޔޫރަޕްގެ ޗެމްޕިއަންކަން ހަތަރުވަނަ ފަހަރަށް ކާމިޔާބުކުރުމަށްފަހު ބޭއްވި އުފާ ފާޅުކުރުންތަކުގެ ތެރޭގައި ޖިބްރޯލްޓާއާ ގުޅޭގޮތުން، އެ ޓީމުގެ ކެޕްޓަން، މޮރާޓާ އާއި މިޑްފީލްޑަރު، ރޮޑްރީ ދެއްކި ވާހަކަތަކާ ގުޅިގެން އެ މައްސަލަ ޔުއެފާ އިން ބަލަން ފަށައިފިއެވެ.
އެގޮތުން، ޔުއެފާ އިން ވަނީ، އެ މައްސަލަ ބެވުމަށްޓަކައި އެތިކްސް އާއި ޑިސިޕްލިނަރީ އިންސްޕެކްޓަރެއް އައްޔަންކޮށްފައިވާ ކަމަށް ބުނެފައެވެ.
ޔޫރޯ މުބާރާތް ކާމިޔާބުކުރި ސްޕެއިނުގެ މުހިއްމު ދެ ކުޅުންތެރިން ކަމަށްވާ، މޮރާޓާ އާއި ރޮޑްރީ ވަނީ އުފާ ފާޅުކުރުމުގެ ތެރެއިން، "ޖިބްރޯލްޓާ އަކީ ސްޕެއިނުގެ ބައެއް" މިފަދަ ގޮތަކަށް އިބްރާތްތަކެއް ބޭނުންކޮށްގެން ލަވައެއް ކިޔައިފައެވެ.
ސްޕެއިނުގެ ދެކުނު ބިތުގައި އިންވާ ގޮތަށް އޮންނަ ޖިބްރޯލްޓާ އަކީ 18 ވަނަ ގަރުނުން ފެށިގެން އިނގިރޭސިންގެ ބާރުގެ ދަށުގައި އޮތް ތަނެކެވެ. އެކަމަކު ޒަމާނުއްސުރެ ސްޕެއިނުން ބުނަނީ އެއީ އެ ގައުމަށް ނިސްބަތްވާ ތަނެއް ކަމަށެވެ.
ސްޕެއިނުގެ ކުޅުންތެރިންގެ މި އަމަލުތައް ކުށްވެރިކޮށް، ޖިބްރޯލްޓާގެ އެފްއޭ އިން ޔުއެފާ އަށް މައްސަލަ ހުށަހެޅީ މިދިޔަ ބުރާސްފަތި ދުވަހު އެވެ.