ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ބާ ޒޯނުގެ ފައިނަލުގައި ފޯ ސީޒަންސް ރިސޯޓް މޯލްޑިވްސް އެޓް ލަނޑާ ގިރާވަރު ބަލިކޮށް އަނަންތަރާ ކިހާވަށް މޯލްޑިވްސް ވިލާސްއިން ޗެމްޕިއަންކަން ހޯދައިފިއެވެ.
ބާ ޒޯނުގެ ކުޅުން ފޯ ސީޒަންސް ރިސޯޓުގައި ކުރިއަށްދިޔައިރު، މިއަދު ކުޅުނު ފައިނަލް މެޗު އަނަންތަރާއިން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ދެ ޓީމަށްވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފައެވެ. މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 32 ވަނަ މިނެޓުގައި އަނަންތަރާއަށް ކާމިޔާބުކޮށްދިނީ ރަޝާދު އަބްދުލް މަތީންއެވެ.
މުބާރާތުގެ އެންމެ މޮޅު ފަސް ކުޅުންތެރިންނަކީ ފޯ ސީޒަންސްގެ މުޙައްމަދު ޖުނެއިދު އާއި، ހަސަން ނިފާހު އަދި މުޙައްމަދު މަހްމޫދު ސައިފުގެ އިތުރުން އަނަންތަރާގެ އިބްރާހީމް ހަމީދާއި ހުސައިން ހަނާންއެވެ. މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އާއި މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ އަނަންތަރާގެ މަތީންއެވެ. އޭނާ ވަނީ މުޅި މުބާރާތުގައި ޖުމްލަ ހަތް ލަނޑު ކާމިޔާބުކޮށްފައެވެ. މި ޒޯނުގެ އެންމެ މޮޅު ކޯޗަކަށް ހޮވިފައިވަނީ އަނަންތަރާގެ ކޯޗު މުޙައްމަދު ފުހެއިދެވެ.