ކުވައިތު ސަރުކާރުން ދިވެހިރާއްޖެއަށް ވިޔަފާރިއާއި ޢިޤްތިޞާދީ ދާއިރާއިން އެއްބާރުލުން ދިނުމަށް އެއްބަސްވެއްޖެއެވެ. މިކަމާގުޅޭ އެއްބަސްވުމުގައި ދެޤައުމުގެ އިޤްތިޞާދީ ތަރައްޤީއާބެހޭ ވަޒީރުން ވަނީ ސޮއިކުރައްވާފައެވެ.
ސަރުކާރުން ކުރިއަށް ގެންދަވާ އިޤްތިޞާދީ ތަރައްޤީގެ މަޝްރޫޢުތަކަށް މާލީ އެހީތެރިކަން ދެއްވުމަށް ގަލްފްގެ ޢަރަބި ޤައުމުތަކުން މުހިންމު ދައުރެއް އަދާކުރެއެވެ. އެގޮތުން އިބްރާހީމް ނާޞިރު އިންޓަރނޭޝަނަލް އެއަރޕޯޓްގެ ތަރައްޤީގެ މަޝްރޫޢަކީ ގަލްފްގެ ޤަމުތަކުގެ ތެރޭގައި ހިމެނޭ އަބޫދާބީ އަދި ކުވައިތު ފަދަ ޤައުމުތަކުގެ ކޮންސެޝަނަލް ލޯން މެދުވެރިކޮށް ފައިސާ ހަމަޖައްސަވައިގެން ކުރިއަށް ގެންދަވާ މަޝްރޫޢެކެވެ. އިޤްތިޞާދީ ދާއިރާއިން ރާއްޖެއަށް އިންޤިލާބީ ހެޔޮ ބަދަލުތަކެއް ގެންނަވަން ސަރުކާރުން އަމާޒު ހިފާފައިވާއިރު، ބޭރުގެ މުއްސަނދި ޤައުމުތަކާއެކު އިޤްތިޞާދީ ގުޅުން ވަރުގަދަކުރެއްވުމުގެ މަސައްކަތް ދަނީ ކުރައްވަމުންނެވެ. އެގޮތުން ޗައިނާ އަދި ސަޢޫދީ ޢަރަބިއްޔާ ފަދަ ޤައުމުތައް ހިމެނެއެވެ. ކުވައިތަކީވެސް ޢަރަބި ޤައުމުތަކުގެ ތެރެއިން މުއްސަނދިކަމާއި އިޤްތިޞާދީ ތަރައްޤީގެ ދާއިރާއިން ފާހަގަކޮށްލެވޭ ޤައުމެކެވެ.
img:http://s1.psmnews.mv/images/660x400/14635797663544.jpg|ރާއްޖެއާއި ކުވެއިތާއި ދެމެދު ވިޔަފާރީގެ ދާއިރާއިން އެއްބާރުލުން ދިނުމާއި ބެހޭ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން / ފޮޓޯ: ޕީއެސްއެމް
ކުވައިތު ސަރުކާރާއެކު ޓްރޭޑް ކޯޕަރޭޝަން އެގްރީމެންޓްގައި ސޮއިކުރެއްވުމަށް އިބްރާހީމް ނާޞިރު އިންޓަރނޭޝަނަލް އެއަރޕޯޓްގައި ބޭއްވެވި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ މި އެގްރީމެންޓްގެ ސަބަބުން ދެޤައުމުގެ ދެމެދުގައި ވިޔަފާރީގެ ފުރުޞަތުތައް އިތުރަށް ފުޅާވެ، އިންވެސްޓަރ ކޮންފިޑެންސް އިތުރުވެގެންދާނެކަމަށެވެ. މިނިސްޓަރ ވިދާޅުވީ މިއީ އިޤްތިޞާދީ ތަރައްޤީއަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ކުރައްވަމުން ގެންދަވާ މަސައްކަތްޕުޅަށް ލިބިގެންދިޔަ އިތުރު ކުރިއެރުމެއްކަމަށެވެ. އިބްރާހީމް ނާސިރު އިންޓަރނޭޝަނަލް އެއަރޕޯޓްގެ އައު ޓާރމިނަލް އެޅުމުގެ މަސައްކަތް ކުރިއަށްދަނީ ބޭރުގެ އެކިފަރާތްތަކުގެ ސިންޑިކޭޓް ލޯނެއްގެ ދަށުންނެވެ. އޭގެތެރޭގައި ކުވެއިތު ސަރުކާރުވެސް ހިމެނެއެވެ. އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ ދެޤައުމުގެ ދެމެދުގައި ސޮއިކުރެވުނު ޓްރޭޑް އެންޑް އިކޮނޮމިކް ކޯޕަރޭޝަން އެގްރީމެންޓްގައި ސޮއިކުރުމާއެކު އެއަރޕޯޓް ތަރައްޤީގެ މަސައްކަތައްވެސް އިތުރަށް ފަހިވެގެންދާނެކަމަށެވެ. މި އެގްރީމެންޓްގައި ކުވައިތު ސަރުކާރުގެ ފަރާތުން ސޮއިކުރެއްވީ އެޤައުމުގެ މިނިސްޓަރ އޮފް ޓްރޭޑް އެންޑް ކޮމާރސް ޔޫސެފް މުޙައްމަދު އަލް ޢަލީއެވެ.
މި އެގްރީމެންޓްގައި ސޮއިކުރެވުމާއެކު ރާއްޖެއަށް އިޤްތިޞާދީ އަދި ވިޔަފާރީގެ ދާއިރާއިން އެހީތެރިކަން ބޭނުންވާ ދާއިރާތައް ކުވައިތު ސަރުކާރުން ބަލަމުން ގެންދާނެއެވެ. އަދި ރާއްޖޭގައި އިޤްތިޞާދީ ތަރައްޤީގެ މަޝްރޫޢުތައް ކުރިއަށްދާގޮތްވެސް ކުވައިތު ސަރުކާރުން ބައްލަވަމުން ގެންދަވާނެކަމަށް އިކޮނޮމިކް މިނިސްޓަރ ވިދާޅުވިއެވެ.