މުޙައްމަދު ޙުސައިން ތަހުޤީޤަށް ހާޒިރުވުމަށް އެންމެ ފަހުގެ ފުރުޞަތު ފުލުހުންގެ އިދާރާއިން ދެއްވައިފިއެވެ.
މިކަން ބަޔާންކޮށް ފުލުހުންގެ އިދާރާއިން ނެރުއްވި ނޫސްބަޔާނެއްގައި ވިދާޅުވީ މޯލްޑިވްސް ޕޮލިސް ސަރވިސްއިން ތަޙްޤީޤު ކުރައްވަމުން ގެންދަވާ މައްސަލަތަކަކާއި ގުޅިގެން ހޯދަން އިޢުލާނު ކުރައްވާފައިވާ މީހުންގެ ތެރެއިން ގ. އޮއިވާލި މުޙައްމަދު ޙުސައިން (36 އަހަރު)އަށް ފުލުހުންގެ އިދާރާއަށް ހާޒިރުވެ، އޭނާއާމެދު ކުރެވޭ ތުހުމަތުތަކަށް ޖަވާބުދާރީވެ ދިފާޢުގައި ވާހަކަ ދެއްކުމުގެ ފަހުގެ ފުރުޞަތެއްގެ ގޮތުގައި 18 މެއި 2016 އިން ފެށިގެން 14 ދުވަހުގެ މުޙުލަތެއް ދެއްވާފައިވާ ކަމަށެވެ.
އަދި މި މުއްދަތުގެ ތެރޭގައި މުޙައްމަދު ޙުސައިން ފުލުހުންގެ ތަހުޤީޤަށް ހާޒިރު ނުވެއްޖެނަމަ، އޭނާއާމެދު ތުހުމަތު ކުރެވޭ މައްސަލަތަކާއި ގުޅިގެން މިހާތަނަށް ހޯދިފައިވާ ހޯދުންތަކާއި ލިބިފައިވާ ހެއްކާއި ޤަރީނާތަކުގެ މައްޗަށް ބިނާކޮށް މުޙައްމަދު ޙުސައިންގެ ޣައިރު ހާޒިރުގައި ތުހުމަތު ކުރެވޭ މައްސަލަތަކުގައި ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުއްވާނެ ކަމަށްވެސް ފުލުހުން ބަޔާން ކުރައްވާފައިވެއެވެ.
މުޙައްމަދު ޙުސައިންއަކީ ޓެރެރިޒަމާއި، ހަނގުރާމަވެރި ހަތިޔާރާއި ގޮވާތަކެތި ގެންގުޅުމާއި، މަނީލޯންޑްރިންގގެ މައްސަލަތަކެއްގައި ފުލުހުންގެ ތަޙުޤީގަށް ހައްޔަރުކުރުމަށް ދިވެހިރާއްޖޭގެ ކްރިމިނަލް ކޯޓުން އަމުރު ނެރުއްވާ، ފުލުހުން ހޯއްދަވަމުން ގެންދަވާ މީހެކެވެ.