މޯލްޑިވްސް ޗައިނާ ޓްރޭޑް އެންޑް ކަލްޗަރަލް އޮގަނައިޒޭޝަން، އެމްސީޓީއޯ އިފްތިތާޙްކުރުމުގެ ރަސްމިއްޔާތުގައި އައިޓަމެއް ހުށައަޅައިދިނުމަށް ޗައިނާގެ ޝައުލިންގ ކުންފޫ ވޮރިޔާސްގެ ޓީމެއް ރާއްޖެ އަތުވެއްޖެއެވެ.
މިއަދު ހެނދުނު ރާއްޖެ އައި މިޓީމުގައި ޖުމްލަ 14 ފަރާތެއް ހިމެނެއެވެ. މި ޓީމުން ކުންފޫގެ ހުނަރުތައް ދައްކާލުމުގެ ހުށައެޅުމަށް މިރޭ އޮންނަ އެމްސީޓީއޯ އިފްތިތާޙްކުރުމުގެ ރަސްމިއްޔާތުގައި ކުރިޔަށް ގެންދާނެކަމަށް އެފަރާތުން މަޢުލޫމާތުދެއެވެ.
މީގެ އިތުރުން ކުރިޔަށް އޮތް ހަފްތާ ބަންދުގެ ތެރޭގައި މިޓީމުގެ ހުނަރުތައް ޢާންމުންނަށް ދައްކާލުމުގެ ޙަރަކާތެއްވެސް ކުރިޔަށްގެންދިއުމަށް ހަމަޖެހިފައިވާކަމަށް އެމްސީޓީއޯއިން މަޢުލޫމާތުދެއެވެ. މޯލްޑިވްސް ޗައިނާ ޓްރޭޑް އެންޑް ކަލްޗަރަލް އޮގަނައިޒޭޝަން، އެމްސީޓީއޯއަކީ ޗައިނާއި ރާއްޖެއާ ދެމެދު ވިޔަފާރިއާ ކަލްޗަރ ކުރިއެރުވުމަށް އުފައްދާފައިވާ އޮގަނައިޒޭޝަނެކެވެ.