ރައީސުލްޖުމްހޫރިއްޔާ ނޭޕާލްގެ އައު ބޮޑުވަޒީރަށް ތަހުނިޔާ ވިދާޅުވެއްޖެ

ނޭޕާލްގެ ބޮޑުވަޒީރުކަމަށް ކަޑްގާ ޕްރަސާދް ސޮރްމާ އޮލީ އިންތިޚާބުވުމާ ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަހުނިޔާ ވިދާޅުވެއްޖެއެވެ.

އެކްސްގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ވަނީ ނޭޕާލްގެ އެންމެ ބޮޑު ދެ ސިޔާސީ ޕާޓީ ގުޅިގެން އިއްތިހާދެއް އެކުލަވާލައި, ބޮޑުވަޒީރު ކަމުގެ މަޤާމަށް ކަޑްގާ ޕްރަސާދް ސޮރްމާ އޮލީ ކާމިޔާބުކުރެއްވުމާ ގުޅިގެން ތަހުނިޔާ ވިދާޅުވެފައެވެ.

Congratulations and best wishes to @kpsharmaoli on being appointed as the Prime Minister of Nepal. Maldives and Nepal enjoy close people-to-people connections, and I look forward to working with you to enhance bilateral cooperation between our two countries.

— Dr Mohamed Muizzu (@MMuizzu) July 15, 2024

ރައީސުލްޖުމްހޫރިއްޔާގެ މެސެޖްގައި ދިވެހިރާއްޖެއާއި ނޭޕާލަކީ ވަރަށް ގާތް ގުޅުމެއް އޮންނަ ދެ ޤައުމު ކަމަށާއި، ދެޤައުމުގެ ގުޅުން އިތުރަށް ބަދަހިކުރެއްވުމަށް އެކުގައި މަސައްކަތް ކުރައްވާނެ ކަމަށް އުންމީދު ކުރައްވާ ކަމަށް ވިދާޅުވިއެވެ.

ކަޑްގާ ޕްރަސާދް ސޮރްމާ އޮލީއަކީ ނޭޕާލްގެ ކޮމިޔުނިސްޓު ޕާޓީގެ ވެރިޔާއެވެ. މިއީ 72 އަހަރުގެ އޮލީ ނޭޕާލްގެ ބޮޑުވަޒީރު ކަމުގެ މަޤާމާ ހަވާލުވެ ވަޑައިގަންނަވާ ހަތަރު ވަނަ ފަހަރެވެ. އޮލީއަށް މިފަހަރު ބޮޑުވަޒީރު ކަމުގެ މަޤާމު ލިބިވަޑައިގެންނެވީ, އެ މަޤާމު ފުުރުއްވަމުން ގެންދެވި ޕުސްޕާ ކަމަލް ދަހަލްގެ ސަރުކާރު ރޫޅި, އޭނާއާ ދެކޮޅަށް އިތުބާރު ނެތް ކަމުގެ ވޯޓެއް ފާސް ކުރުމާ ގުޅިގެންނެވެ.