ކޮޕާ އެމެރިކާ 2024 ގެ ތިންވަނަ ހޮވުމަށް ކުޅުނު މެޗުގައި ޕެނަލްޓީ ޖަހައިގެން ކެނެޑާ ބަލިކޮށް، އުރުގުއޭ އިން މުބާރާތުގެ ތިންވަނަ މަގާމް ހާސިލްކޮށްފިއެވެ.
މި މެޗުގެ ފުރިހަމަވަގުތު ހަމަވިއިރު ދެ ޓީމު 2-2 އިން އެއްވަރުވުމުން، ޕެނަލްޓީ ޝޫޓްއައުޓްގައި އުރުގުއޭ މޮޅުވީ 4-3 އިންނެވެ.
މެޗަށް ނިކުތްއިރު އުރުގުއޭ އިން ވަނީ ސެމީ ފައިނަލްގައި ކޮލަމްބިއާ އާ ދެކޮޅަށް ނިކުތް ފުރަތަމަ އެގާރަ އަށް ދެ ބަދަލެއް ގެނެސްފައެވެ. ކެނެޑާ އިން މެޗަށް ނިކުތީ އާޖެންޓީނާއާ ދެކޮޅަށް ކުޅުނު މެޗުގެ ފުރަތަމަ އެގާރަ އަށް ހަ ބަދަލެއް ގެނެސްގެންނެވެ.
އެމެރިކާގެ ނޯތު ކެރޮލައިނާގައި ހުންނަ ބޭންކް އޮފް އެމެރިކާ ސްޓޭޑިއަމްގައި ރޭ ފަތިހު ކުޅުނު މެޗުގެ ފުރަތަމަ ހާފުގެ 8 ވަނަ މިނެޓުގައި ކުރީން ލީޑްނެގީ އުރުގުއޭ އިންނެވެ. އުރުގުއޭ އިން މި ލަނޑުޖެހީ ކޯނަރެއްގެ އެހީގައި އެ ޓީމުގެ ޑިފެންޑަރު، ސެބާސްޓިއަން ކަސެރޭސް ބޮލުން ޖައްސާލި ބޯޅައެއްގެ އެހީގައި ރޮޑްރީގޯ ބެންޓަންކޫރް އެވެ.
މެޗުގެ 22 ވަނަ މިނެޓުގައި ކެނެޑާ އަށް އެއްވަރުކޮށްދިނީ އިސްމާއިލް ކޯނޭ އެވެ. މިއީ އެ ޓީމުގެ މޮއިސް ބޮމްބީޓޯ ދިން ބޯޅައަކުން އެކްރޮބެޓިކް ސިޒާ ކިކަކުން ކޯނޭ ކާމިޔާބުކުރި ރީތި ގޯލެކެވެ. މި ގޯލާއެކު ފުރަތަމަ ހާފު ނިމިގެންދިޔައީ 1-1 އިން ދެ ޓީމު އެއްވަރުވެގެންނެވެ.
ފުރަތަމަ ހާފުގައި އުރުގުއޭގެ ފަކުންޑޯ ޕެލިސްޓްރީ ގޯލެއް ކާމިޔާބުކުރިނަމަވެސް ވީއޭއާރް އިން ބެލުމަށްފަހު ރެފްރީ ވަނީ އޮފްސައިޑް ކަމަށް ނިންމައި، އެ ލަނޑު ގަބޫލުނުކޮށްފައެވެ.
ކެނެޑާ އިން މި މެޗުގައި ފުރަތަމަ ފަހަރަށް ލީޑްނެގީ، 80 ވަނަ މިނެޓުގައި ޖޮނަތަން ޑޭވިޑް ކާމިޔާބުކުރި ގޯލުންނެވެ. މިއީ ކެނެޑާ އަށް އޭނާ ޖަހައިދިން 28 ވަނަ ގޯލެވެ. މި ގޯލާއެކު މެޗު ނިމެންދަނިކޮށް، އުރުގުއޭ އަށް އެއްވަރުކޮށްދިނީ ލެޖެންޑަރީ ފޯވާޑް، ލުއިސް ސުއަރޭޒް އެވެ. އިތުރުވަގުތުގެ ދެވަނަ މިނެޓުގައި ސުއަރޭޒް މި ލަނޑުޖެހީ އެ ޓީމުގެ ޑިފެންޑަރު، ހޯސޭ ގިމެނޭޒް ދިން ޕާހަކުންނެވެ. މިއީ އުރުގުއޭ އަށް އޭނާ ޖަހައިދިން 69 ވަނަ ލަނޑެވެ. އެ ގައުމުގެ ތާރީޚުގައި މިހާތަނަށް ގައުމީ ޓީމަށް އެންމެ ގިނަ ލަނޑުޖަހައިދީފައިވަނީ ވެސް ސުއަރޭޒް އެވެ.
މި މެޗުގެ ފުރިހަމަވަގުތު ހަމަވިއިރު ދެ ޓީމު އެއްވަރުވުމުން، ނަތީޖާ ނެރުމަށް ސީދާ ޕެނަލްޓީ އަށް ދިޔައިރު އުރުގުއޭ އިން ވަނީ ފުރަތަމަ ފޮނުވާލި ހަތަރު ޕެނަލްޓީ ކާމިޔާބުކޮށްފައެވެ. އެ ޓީމުގެ ޕެނަލްޓީތައް ކާމިޔާބުކޮށްދިނީ، ފެޑެރީކޯ ވަލްވާޑޭ، ބެންޓަންކޫރް، ޖިއޯޖިއަން ޑެ އަރަސްކައޭޓާ އާއި ސުއަރޭޒް އެވެ.
ކެނެޑާ އިން ފޮނުވާލި ހަތަރު ޕެނަލްޓީގެ ތެރެއިން ކާމިޔާބުކުރެވުނީ އެންމެ ދެ ޕެނަލްޓީ އެވެ. ކެނެޑާގެ ޕެނަލްޓީތައް ކާމިޔާބުކޮށްދިނީ ޖޮނަތަން ޑޭވިޑް އާއި މޮއިސް ބޮމްބީޓޯ އެވެ. އެ ޓީމުގެ އިސްމާއިލް ކޯނޭގެ ޕެނަލްޓީ އުރުގުއޭގެ ގޯލްކީޕަރު، ސާޖިއޯ ރޮޗެޓް މަތަކުރިއިރު، އަލްފޮންސޯ ޑޭވީސް ފޮނުވާލި ހަތަރުވަނަ ޕެނަލްޓީ އަމާޒުވީ ގޯލްގެ ހުރަސްދަނޑިއަށެވެ.
މުބާރާތުގެ ފައިނަލް މެޗުގައި އެންމެ ފަހުގެ ޗެމްޕިއަން، އާޖެންޓީނާ ނިކުންނާނީ ކޮލަމްބިއާ އާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މިރޭ ފަތިހު ރާއްޖޭގަޑިން 5 ޖަހާއިރު އެވެ.