މިހާރު ޖަރުމަނުގައި ކުރިއަށްދާ ޔޫރޯ ފުޓްބޯޅަ މުބާރާތުގެ ފައިނަލް މެޗު ބައްލަވަން އެ ގައުމަށް ވަޑައިގަންނަވަން ސްޕެއިނުގެ ރަސްގެފާނު، ފިލިޕް ނިންމަވައިފިއެވެ.
ސްޕެއިނާ އިންގްލެންޑް ބައްދަލުކުރުމަށް ހަމަޖެހިފައިވާ ފައިނަލް މެޗު ބައްލަވަން ވަޑައިގަންނަވާނެކަން ސްޕެއިނުގެ ރަސްގެފާނު، ފިލިޕް ކަށަވަރުކޮށްދެއްވީ މިދިޔަ ބުދަ ދުވަހު ބޭއްވި ޕްރިންސަސް އޮފް ޖިރޯނާ ފައުންޑޭޝަން އެވޯޑްސް ގާލާ ގައެވެ.
އެ ހަފްލާގައި ސްޕެއިނުގެ ރަސްގެފާނު، ފިލިޕް ވަނީ މުބާރާތުގައި ވާދަކުރާ އެ ގައުމުގެ ފުޓްބޯޅަ ޓީމުން އަނިޔާގެ ސަބަބުން ޖާގަ ނުލިބުނު ބާސެލޯނާގެ ޒުވާން މިޑްފީލްޑަރު، ގަވީ އާއެކު ދެއްކެވި ވާހަކައިގައި ޔޫރޯގެ ކުރިއަށް އޮތް ފައިނަލް މެޗަށް ދައުވަތު އަރުއްވާފައެވެ.
އެގޮތުން، ސްޕެއިނުގެ ރަސްގެފާނު، ފިލިޕް ވިދާޅުވީ، ބާލިންގައި ކުޅުމަށް ހަމަޖެހިފައިވާ ފައިނަލް މެޗަށް ދައުވަތު އަރުއްވާ ކަމަށާއި، ގަވީ އަކީ ސްޕެއިން ޓީމުގެ މުހިއްމު ކުޅުންތެރިއަކަށްވުމުން ކޮންމެހެން ދާން ވާނެ ކަމަށެވެ.
ފުޓްބޯޅަ އަށް ވަރަށް ބޮޑަށް ލޯބިކުރައްވާ ސްޕެއިނުގެ ރަސްގެފާނު، ފިލިޕް އަކީ ބޮޑެތި މުބާރާތްތަކުގައި ސްޕެއިނުގެ މެޗުތައް ބެއްލެވުމަށް ވަޑައިގެން އެ ޓީމަށް ވަރަށް ބޮޑަށް ތަރުހީބު ދެއްވާ ބޭފުޅެކެވެ.
މިހާތަނަށް ޔޫރޯގެ ތާރީޚުގައި އެންމެ ގިނަ ފަހަރު ތަށި އުފުލާލައިފައިވާ ދެ ޓީމުގެ ތެރެއިން އެއް ޓީމު ކަމަށްވާ، ސްޕެއިނަށް މި އަހަރުގެ މުބާރާތް ކާމިޔާބުކުރެވިއްޖެނަމަ ހަތަރުވަނަ ތަށްޓާއެކު ރެކޯޑެއް ގާއިމްކުރެވޭނެ އެވެ. ސްޕެއިނާ ޖަރުމަނުން ވަނީ މިހާތަނަށް ބޭއްވުނު ޔޫރޯގެ ތިން މުބާރާތުގެ ޗެމްޕިއަންކަން ހޯދައިފައެވެ.