ވިމްބަލްޑަން ޓެނިސް: އަންހެން ސިންގަލްސް ފައިނަލްގައި ކްރެޗިކޯވާ އާއި ޕައޮލީނީގެ ކުރިމަތިލުމެއް

ވިމްބަލްޑަން ޓެނިސް މުބާރާތުގެ އަންހެން ސިންގަލްސް ފައިނަލްގައި ޗެކް ރިޕަބްލިކްގެ ބަރްބޮރާ ކްރެޗިކޯވާ އާއި އިޓަލީގެ ޖޭޒްމީން ޕައޮލީނީ ބައްދަލުކުރާން ޖެހިއްޖެއެވެ.

މުބާރާތުގެ 31 ވަނަ ސީޑް، ކްރެޗިކޯވާ ވަނީ ސެމީ ފައިނަލްގައި ކަޒަކިސްތާންގެ އެލީނާ ރީބަކީނާ އަތުން 2-1 ސެޓުން މޮޅުވެފައެވެ. މި މެޗުގެ ފުރަތަމަ ސެޓުން، 2022 ވަނަ އަހަރުގެ ވިމްބަލްޑަން ޗެމްޕިއަން، ރީބަކީނާ ކުރިހޯދީ 6-3 އިންނެވެ.

މިހާތަނަށް ޑަބަލްސް އިވެންޓްތަކުގައި ރަނގަޅު ކާމިޔާބީތަކެއް ހޯދާފައިވާ، ކްރެޗިކޯވާ، 28، ވަނީ ދެން ޖެހިގެންއައި ދެ ސެޓު 6-3، 6-4 އިން ކާމިޔާބުކޮށް ފައިނަލަށް ދަތުރުކޮށްފައެވެ. މިއީ މިދިޔަ ތިން އަހަރުގެ ތެރޭގައި ކްރެޗިކޯވާ ދަތުރުކުރި ދެވަނަ ގްރޭންޑް ސްލޭމް ޓެނިސް ފައިނަލެވެ. މީގެކުރީން، އޭނާ ވަނީ 2021 ވަނަ އަހަރުގެ ފްރެންޗް އޯޕަން ޓެނިސް މުބާރާތުގެ ޗެމްޕިއަންކަން ހޯދައިފައެވެ.

ފައިނަލުގެ ދެވަނަ ޖާގަ ކަށަވަރުކުރީ، އިޓަލީގެ ޕައޮލީނީ ވަނީ ސެމީގައި ކްރޮއޭޝިއާގެ ޑޮނާ ވެކިޗް އަތުން 2-1 ސެޓުން މޮޅުވެގެންނެވެ. ގާތްގަނޑަކަށް 2 ގަޑިއިރާއި 51 މިނެޓަށް ދިގުދެމިގެންދިޔަ ދެވަނަ ސެމީގައި ޕައޮލީނީ ވަނީ 6-2، 4-6، 7-6(10-8) އިން ވެކިޗް ބަލިކޮށްފައެވެ. މިއީ މުބާރާތުގެ ތާރީޚުގައި އެންމެ ގިނަވަގުތު ކުޅެން ޖެހުނު އަންހެން ސިންގަލްސް ސެމީ ފައިނަލް މެޗެވެ.

އެންމެ ފަހުގެ ފްރެންޗް އޯޕަން ޓެނިސް މުބާރާތުގެ ރަނަރަޕް، ޕައޮލީނީ އަކީ ވިމްބަލްޑަން ޓެނިސް މުބާރާތުގެ ތާރީޚުގައި ފައިނަލަށް ދަތުރުކުރި އިޓަލީ އަށް ނިސްބަތްވާ ފުރަތަމަ އަންހެން ކުޅުންތެރިޔާ އެވެ. އަދި ކްރެޗިކޯވާ އަކީ މުބާރާތުގެ ފައިނަލުން ޖާގަ ހޯދި ޗެކް ރިޕަބްލިކަށް ނިސްބަތްވާ ހަތްވަނަ އަންހެން ކުޅުންތެރިޔާ އެވެ.

ކްރެޗިކޯވާ އާއި ޕައޮލީނީ ބައްދަލުކުރާ މި ފަހަރުގެ މުބާރާތުގެ އަންހެން ސިންގަލްސް ފައިނަލް މެޗު ކުޅުމަށް ހަމަޖެހިފައިވަނީ މާދަމާ އެވެ.