ރައީސުލްޖުމްހޫރިއްޔާ އަބްދުﷲ ޔާމީން ޢަބްދުލްޤައްޔޫމްގެ ރިޔާސީ ދައުރު، ދެބައިވުން މިއަދު ފާހަގަކުރަމުންދާއިރު، ފާއިތުވި ދެއަހަރާއި ހަ މަސްދުވަހުގެ ތެރޭގައި މި ސަރުކާރުން ވަނީ ޢުމުރާނީ ތަރައްޤީއާއި، އިޖުތިމާޢީ ދާއިރާތަކުގެ ގިނަ މަޝްރޫޢުތަކެއް ނިންމަވާފައި މުހިންމު އަމާޒުތަކެއް ޙާޞިލްކުރައްވާފައެވެ. އަދި މިހާރު ކުރިއަށްދާ މަޝްރޫޢުތަކާއެކު، ވެރިކަމުގެ ދައުރު ހަމަވާއިރު، ޢުމުރާނީ ތަރައްޤީގެ ބޮޑެތި ބަދަލުތަކެއް ރާއްޖެއިން ފެނިގެންދާނެ ކަމަށް ސަރުކާރުން ވިދާޅުވެއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްވެސް ވެރިކަމަށް ވަޑައިގަތީ، ރައްޔިތުންނަށް ވައުދުތަކެއްވެވަޑައިގެން، އެކަންތައްތައް ޙާޞިލްކުރެއްވުމުގެ އުންމީދުގައެވެ. އެމަނިކުފާނުގެ އެންމެ ބޮޑު އެއް ވަޢުދަކަށްވީ، އިގްތިސާދީގޮތުން އައު ހަރުފަތަކަށް ރާއްޖެ ގެންދެވުމެވެ. އަދި އެކަމާގުޅޭ ޢުމުރާނީ ތަރައްޤީއާއި، އިޖުތިމާޢީ ތަރައްޤީގެ ކަންކަން ކުރިއަށް ގެންދެވުނެވެ. img:http://s4.psmnews.mv/images/660x400/14605245628650.jpg|މާލޭ ހުޅަނގު ފަރާތު ތިން ރުއް ޕާކު ތަރައްޤީކޮށް، ސުނާމީ ބިނާ ބަހައްޓާފައި - ފައިލް ފޮޓޯ: ހައުސިންގ މިނިސްޓްރީ
ރައްޔިތުންނަށް ބޭނުންވާ އަސާސީ ޚިދުމަތްތަކުގެ ތެރެއިން، ސިއްޙީ ދާއިރާއިން، ހުސްނުވާ އާސަންދަ ތައާރަފްކުރެއްވުން ފާހަގަކޮށްލެވެއެވެ. ރާއްޖޭގެ މީހުން ދިރިއުޅޭ 186 ރަށުގައި އާސަންދައިގެ ދަށުން ޚިދުމަތްދޭ ބޭސްފިހާރަތައް ވަނީ ޤާއިމްކުރައްވާފައެވެ. ތަޢުލީމީ ދާއިރާއަށް ބަލާއިރު، ރާއްޖޭގެ ފުރަތަމަ އިސްލާމިކް ޔުނިވަރސިޓީ ވޫޖުދަށް ގެންނެވުމާއި، ރާއްޖޭގެ ސްކޫލްތަކުގައި މާއްދާއެއްގެ ގޮތުގައި ޢަރަބި ބަސް ކިޔަވައިދެއްވަން ފެއްޓެވުމާ، ފަށާ ތައުލީމުގެ އައު މަންހަޖަށް ކިޔަވައިދެއްވަން ފެއްޓެވުން ހިމެނެއެވެ. އަދި 100 އަށްވުރެ ގިނަ ރަށްތަކުގައި ހުރި ސްކޫލްތަކުގައި ކްލާސްރޫމްތައް ހެދުމާއި، ސިއްޙީ ޚިދުމަތްދޭ ތަންތަން ބިނާކުރެއްވުމުގެ ގިނަ މަސައްކަތްތަކެއްވެސް ވަނީ ނިންމަވާފައެވެ. މީގެ އިތުރުން އައިޖީއެމްއެޗްގެ 25 ބުރީގެ އައު ޢިމާރާތުގެ މަސައްކަތް ފެއްޓެވުމަށް ތައްޔާރުވަމުންދާއިރު، މިހާރު އައިޖީއެމްއެޗުން ދެއްވަމުން ގެންދަވާ ޚިދްމަތްތަކުގެ ފެންވަރު ރަނގަޅުކުރެއްވުމާއި އައު ޚިދްމަތްތައް ތަޢާރަފް ކުރެއްވުންވެސް ހިމެނެއެވެ.
އަސާސީ ކަންތައްތަކުގެ ތެރޭގައި ހިމެނޭ ފެނާއި ނަރުދަމާ އަދި ބަނދަރު ހެދުމަށް ބަލާލާއިރު، 10 ރަށެއްގެ ފެނުގެ ނިޒާމްގެ މަސައްކަތް ވަނީ ނިމިފައެވެ. އަދި 10 ރަށުގެ ނަރުދަމާގެ މަސައްކަތްވެސް ވަނީ ނިމިފައެވެ. މީގެ އިތުރުން 19 ރަށެއްގެ ބަނދަރުގެ މަސައްކަތް ނިމިފައިވެއެވެ.
ބޯހިޔާވަހިކަމުގެ ދާއިރާއިން އެންމެ ފާހަގަކުރެވުނު ކަމަކީ، ސުނާމީ ކާރިޘާގައި ގެދޮރު ގެއްލުނު ފަރާތްތަކުގެ ތެރެއިން، ބޯހިޔާވަހިކަން ނުލިބިތިބި ފަރާތްތަކަށް 10 އަހަރަށްފަހު ދާއިމީ ބޯހިޔާވަހިކަން ފޯރުކޮށްދިނުމެވެ. ހުޅުމާލެއާއެކު، ދެކުނުގެ 4 އަތޮޅުގައި ހަދަމުންދާ 1،500 ހައުސިން ޔުނިޓްގެ މަސައްކަތް މިހާރު ހުރީ ނިމުމަކާ ކައިރިވެފައެވެ. އަދި ހުޅުމާލޭގައި އިތުރު 15،000 ހައުސިން ޔުނިޓް އެޅުއްވުމުގެ މަސައްކަތް މިހާރު ވަނީ ކުންފުނިތަކާއި ހަވާލުކުރައްވާފައެވެ. އެއްފަސްކުރުމުގެ ސިޔާސަތުގެ ދަށުން ލ. ގާދޫ މީހުން ފޮނަދޫއަށް ބަދަލުކުރެއްވުމާއި، ދ. ވާނީން ކުޑަހުވަދުއަށް ބަދަލުވި އާއިލާތަކަށް ދާއިމީ ބޯހިޔާވަހިކަން ފޯރުކޮށްދެއްވުން ހިމެނެއެވެ. img:http://s3.psmnews.mv/images/660x400/1817.jpg|ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް، ހުޅުމާލެ ބިންހިއްކުމުގެ ދެވަނަ ފިޔަވަހި އިފްތިތާޙްކުރުމުގެ ތެރެއިން، ސެލްފީއަކަށް ހުއްޓިލައިގެން - ފޮޓޯ: ރައީސް އޮފީސް
ހުޅުމާލޭގެ ދެވަނަ ފިޔަވަހި ތަރައްޤީ ކުރެއްވުމުގެ މަޝްރޫއުގެ ދަށުން، 245 ހެކްޓަރގެ ބިން ހިއްކަވާފައިވެއެވެ. އަދި އަތޮޅުތަކުގެ 5 ރަށެއްގެ ބިން ހިއްކެވުމުގެ ޢަމަލީ މަސައްކަތް ވަނީ ނިމިފައެވެ. އަދި ހަމައެއާއެކު ހުޅުމާލެ ޔޫތް ސިޓީ މަޝްރޫޢަކީވެސް ސަރުކާރުން ވަރަށް ބޮޑު އިސްކަމެއް ދެއްވައިގެން ކުރިއަށް ގެންދަވާ މަޝްރޫޢެކެވެ.
މަގު ހެދުމުގެ މަޝްރޫޢުތަކުގެ ތެރެއިން، ހުޅުމާލޭގެ ފޭސް އެކެއްގެ ނުނިމިހުރި މަގުތައް ނިންމެވުމާއި، ދ. ކުޑަހުވަދޫ، އަދި ތ. ވިލުފުށީގެ މަގު ހެދުމުގެ މަސައްކަތް ވަނީ ނިމިފައިވެއެވެ. ހައްދުންމަތީ ބޮޑު މަގުގެ މަސައްކަތުގެ 90 އިންސައްތަ ނިމިފައިވާއިރު، އަންނަ ޖުލައިމަހުގެ ނިޔަލަށް އެ މަސައްކަތް ނިންމާލެވޭނެ ކަމަށް ސަރުކާރުން ވިދާޅުވެއެވެ.
ޒުވާނުންނާއި ކުޅިވަރު ކުރިއެރުވުމުގެ ދާއިރާގެ ތެރެއިން، މާލެއާއި އަތޮޅުތަކުގައި 47 ފުޓްސަލް ދަނޑުގެ މަސައްކަތް ވަނީ ނިމިފައެވެ. އަދި އިތުރު 25 ދަނޑެއްގެ މަސައްކަތް ވަނީ ނިމުމަކާ ކައިރިވެފައެވެ. img:http://s1.psmnews.mv/images/660x400/14608220339015.jpg|ފަސް ރަށެއްގައި ސޯލާ ޕެނަލް ހަރުކުރުމުގެ މަސައްކަތް - ފައިލް ފޮޓޯ: އެންވަޔަރަމަންޓް މިނިސްޓްރީ
ތިމާވެއްޓާއި ހަކަތައިގެ ދާއިރާއިން، 24 ގަޑިއިރުގެ ކަރަންޓްގެ ޔަގީންކަން ރައްޔިތުންނަށް ދެއްވުމާއި، 4 މެގަވޮޓްގެ ސޯލާ ޕެނަލް ރާއްޖޭގެ އެކި ކަންކޮޅުތަކުގައި ޖެހުން ހިމެނެއެވެ. އަދި ކުނި ނައްތާލުމަށް ހިންގުނު، އެންމެ ބޮޑު މަޝްރޫޢު ކަމުގައިވާ އުތުރު ސަރަޙައްދުގެ ކުނި ނައްތާލުމުގެ ނިޒާމު ޤާއިމްކުރައްވާފައިވެއެވެ.
ރާއްޖޭގެ އިގްތިސާދުގައި ޑޮލަރުގެ ކަޅު ބާޒާރެއް އުފެދިފައިވަނިކޮށް އެކަން ހުއްޓުވާ، ސަރުކާރުންވަނީ އާންމުނަށް ޑޮލަރު ލިބިމުގައި ކުރިމަތިވަމުންދިޔަ ދަތިތައް ނައްތަވާލައްވާފައެވެ. ސަރުކާރު ހިއްސާވާ ކުންފުނިތަކަކީ، އަމިއްލަ ފައިމައްޗަށް ތެދު، އިޤްތިސާދުގައި ހަރަކާތްތެރި ކުންފުނިތަކަކަށް ވަނީ ހައްދަވާފައެވެ. img:http://s3.psmnews.mv/images/660x400/14563862411617.jpg|ޗައިނާ މޯލްޑިވްސް ފްރެންޑްޝިޕް ބްރިޖުގެ ކުރެހުމެއް - ފައިލް ފޮޓޯ: ޕީއެސްއެމް
ސަރުކާރުން ކުރިއަށްގެންދަވާ ބޮޑެތި މަޝްރޫޢުތަކުގެ ތެރެއިން މާލެއާއި ހުޅުލެއާ ދެމެދު އަޅުއްވާ ބްރިޖްގެ މަޝްރޫޢާއި އިބްރާހިމް ނާސިރު އިންޓަރނޭޝަނަލް އެއަރޕޯޓް ތަރައްޤީ ކުރެއްވުމުގެ މަޝްރޫޢަކީ މިހާރު ކުރިއަށްދާ އެންމެ ބޮޑު 2 މަޝްރޫޢެވެ.
އިޖްތިމާޢީ ގޮތުން ރައްޔިތުންނަށް ފަސޭހަކަން ހޯއްދަވައިދެއްވުމުގެ ގޮތުން މާލޭގެ އެކި ސަރަޙައްދުތަކުގައި ޕާކްތަކާއި މައިޒާންތައް ވަނީ ހައްދަވާފައެވެ. ސަރުކާރުގެ އަމާޒަކީ ދިވެހިންނަށް އިޤްތިސާދީ ފުދުންތެރިކަން ހޯދައިދިނުމާއެކު ރައްޔިތުންނަށް ބޭނުންވާ އެކިއެކި ޚިދްމަތްތައް ތަޢާރަފް ކުރައްވާ ދިރިއުޅުމުގެ ފެންވަރު މަތި ކުރެއްވުމެވެ.