ކީރިތި ޤުރުއާންގެ ދިވެހި ތަރުޖަމާގެ އޯޑިޔޯ އާއި ވީޑިޔޯ ޕަބްލިކް ސަރވިސް މީޑިއާ އިން ތައްޔާރު ކުރައްވަން ނިންމަވައިފިކަމަށް ޕީއެސްއެމްގެ މެނޭޖިންގ ޑިރެކްޓަރ އިބްރާހިމް ޚަލީލު ވިދާޅުވެއްޖެއެވެ.
ޚަލީލު މިހެން ވިދާޅުވީ ޕީއެސްއެމްއިން ރަމަޟާން މަހު ގެނެސްދިނުމަށް ހަމަޖެހިފައިވާ ދިވެހިރާއްޖޭގެ އެންމެ އަލިގަދަ ތަރި ޕްރޮގްރާމް ރަސްމީކޮށް ލޯންޗުކުރުމަށް ރޭ ބޭއްވި ޙަފްލާގައި ވާހަކަދައްކަވަމުންނެވެ.
ޚަލީލް ވިދާޅުވީ، ޤުރުއާންގެ ދިވެހި ތަރުޖަމާގެ އޯޑިޔޯ އާއި ވީޑިއޯ ރައްޔިތުންނާ ހަމަޔަށް ގެނެސްދިއުމަށްޓަކައި މިހާރު ކުރައްވަމުން ގެންދަވަނީ އޭގެ އެންމެ ފަހުގެ މަސައްކަތްތަށް ކަމަށާއި އެމަސައްކަތް މިހާރު ނިމުމަކާ ހަމަޔަށް ގޮސްފައިވާ ކަމަށެވެ. އަދި ތަރުޖަމާ ނެރުމުން، ޤުރުއާނުގެ ކޮންމެ ސޫރަތެއް ވަކިވަކިން ޚިޔާރުކޮށް، އަޑުއަހާލުމުގެ ފުރުޞަތު ލިބިގެންދާނެ ކަމަށެވެ.
ޤުރުއާނުގެ ދިވެހި ތަރުޖަމާގެ އޯޑިޔޯ އަދި ވީޑިއޯ އެއްކޮށް އަދި މިހާތަނަށް އާންމުކޮށްފައި ނުވި ނަމަވެސް ޤުރުއާނުގެ ވަކިވަކި ބައިތަށް ރެކޯޑްކޮށްގެން ދިވެހިރާއްޖެގެ އަޑާއި ޓީވީއެމްއިން މިހާރުވެސް ފޮނުވަމުން ގެންދެއެވެ.