މާލެއިން ފުރައިގެން ހއ. ވަށަފަރަށް ދަތުރުކުރި ބޯޓެއް، އެ ރަށަށް ވަންނަން އުޅުމުގެ ތެރޭގައި ނެރު ފައިކައްޓަށް އަރައި، އަޑިޔަށްގޮސްފިއެވެ.
މި ބޯޓުން 40 މީހުން ދަތުރުކުރި އިރު، އެއްވެސް މީހަކަށް ގެއްލުމެއް ނުލިބި ސަލާމަތްކުރެވިފައިވާ ކަމަށްވެސް އެމް.އެން.ޑީ.އެފުން ވިދާޅުވެއެވެ. އެމް.އެން.ޑީ.އެފުން ވިދާޅުވީ، މި ހާދިސާ ހިނގީ ރޭ ފަތިހު3:40 އެހާއިރު ކަމަށާއި، އެމް.އެން.ޑީ.އެފަށް ރިޕޯޓްކޮށްފައިވަނީ ފަތިހު 04:00ގައި ކަމަށެވެ.
އަޑިޔަށް ދިޔައީ، މާލެއާއި ހއ އަތޮޅާ ދެމެދު ދަތުރުކުރާ " އަރަފާތު އެކްސްޕްރެސް" ކިޔާ ބޯޓެކެވެ. މި ބޯޓުގައި ގިނަ އަދަދަކަށް ވިޔަފާރި މުދާލާއި ދަތުރުވެރިންގެ ދާގީނާތައް ހުރިއިރު، އޭގެތެރެއިން ބައެއް ދާގީނާތަކާއި، މުދާތައް ސަލާމަތް ކުރެވިފައިވީ ނަމަވެސް، ބޯޓުގައި އަދިވެސް ގިނަ އަދަދެއްގެ މުދާ، ހުރިކަމަށް އެމް.އެން.ޑީ.އެފުން ވިދާޅުވެއެވެ. އެމް.އެން.ޑީ.އެފްގެ މީޑިޔާ އޮފިޝަލް ވިދާޅުވީ، ބޯޓުގައި ހުރި ފިލާ ފަދަ ބަރު މުދާތައް ނެގުމަށްފަހު، ފަޅުތެރެއަށް ބޯޓު ވެއްދުމުގެ މަސައްކަތް، އެމް.އެން.ޑީ.އެފާއި، ފުލުހުން އަދި ވަށަފަރުގެ ރައްޔިތުން ގުޅިގެން ކުރަމުންދާ ކަމަށެވެ.