ޗައިނާގެ މަކާއުގައި ބޭއްވި އޭޝިއާ އެންޑް އޯޝޭނިއާ ސާންބޯ ޗެމްޕިއަންޝިޕުގައި ވާދަކޮށް ހޯދި ލޯ މެޑަލްއާއެކު ރާއްޖޭގެ އަޙްމަދު ސިނާނު ވޯލްޑް ޗެމްޕިއަންޝިޕަށް ކޮލިފައިވެއްޖެ އެވެ.
މިދިޔަ މަހުގެ 29-30 ގެ ނިޔަލަށް ބޭއްވި މި މުބާރާތުގައި ސިނާން ލޯ މެޑަލް ހޯދާފައިވަނީ ކޮމްބެޓް ސާންބޯ 79 ކިލޯގްރާމް ކެޓަގަރީގައި ވާދަކޮށްގެންނެވެ. މި ކެޓަގަރީގެ އެއްވަނަ ހޯދީ ކަޒަކިސްތާނުގެ އެތުލީޓެކެވެ. ދެވަނަ ހޯދީ އިރާގުގެ އެތުލީޓެކެވެ. އަދި ތިންވަނަ ދެ އެތުލީޓުންނަށް ލިބުނެވެ. އެއީ ސިނާނުގެ އިތުރުން ތުރުކުމެނިސްތާނުގެ އެތުލީޓަކަށެވެ.
ކުރު މުއްދަތެއްގެ ތެރޭގައި ސިނާން ވަނީ ބައިނަލްއަޤްވާމީ މައިދާނުގައި ބޮޑެތި ކުރިއެރުންތަކެއް ހޯދާފައެވެ. އެގޮތުން މިދިިޔަ އަހަރު ބަންގްލަދޭޝްގައި ބޭއްވި ދެވަނަ ބަންގަބަންދު ސައުތު އޭޝިއަން ސަމްބޯ ޗެމްޕިއަންޝިޕުގައި ވާދަކޮށް އޭނާ ވަނީ ވާދަކުރި ސްޕޯޓްސް ސާމްބޯ 79 ކިލޯގްރާމް ވެއިޓް ކެޓެގަރީން ރިހި މެޑަލް ހޯދާފައެވެ. މި ކެޓެގަރީން އެއްވަނަ ހޯދާފައިވަނީ އިންޑިއާ އިންނެވެ. އަދި ލޯ މެޑަލް ލިބުނީ އިންޑިއާ އާއި ބަންގްލަދޭޝްއަށެވެ.
އޮލިމްޕިކް ކުޅިވަރަކަށް އަދި ނުވި ނަމަވެސް ސަމްބޯ އަކީ ހަލުވިކަމާއެކު މުޅި ދުނިޔޭގައި މަގުބޫލުވަމުން އަންނަ ކުޅިވަރެކެވެ. ރަޝިޔާއިން އުފަންވި މި ކުޅިވަރަކީ މާޝަލް އާޓްސްގެ ވައްތަރެކެވެ. އަދި ވޯލްޑް ރެސްލިން ޗެމްޕިއަންޝިޕުންވެސް ފާހަގަކުރާ ކުޅިވަރެކެވެ.
މި ކުޅިވަރުގެ މަޤްބޫލުކަމާއެކު 2028 ގެ އޮލިމްޕިކްސްގައި ހިމެނުމަށް ވަނީ ނިންމާފައެވެ.