ހިޖުރީ އައު އަހަރުގެ ތަހުނިޔާ ސިޔާސީ ލީޑަރުން ފޮނުއްވައިފި

ހިޖުރީ އައު އަހަރުގެ ތަހުނިޔާ ރާއްޖޭގެ ހުރިހާ ރައްޔިތުންނަށް ރާއްޖޭގެ ސިޔާސީ ލީޑަރުން ފޮނުއްވައިފިއެވެ.

ހިޖުރީ އައު އަހަރަކީ ކީރިތި ރަސޫލާ މުޙައްމަދު ޞައްލަﷲ ޢަލައިހި ވަސައްލަމަ، މައްކާ ދޫކުރައްވައި މަދީނާއަށް ވަޑައިގެން އިސްލާމީ ދައުލަތް ޤާއިމުކުރެއްވުމަށް ފެށްޓެވި މަތިވެރި މަސައްކަތްޕުޅުން އެތަކެއް ޢިބްރަތެއް ލިބިގެންދާ ދަތުރުފުޅެކެވެ. މިގޮތުން މިއަހަރު އިސްލާމީ އުއްމަތާ، މި ބައްދަލުކުރީ 1446ވަނަ ހިޖްރީ އައު އަހަރެވެ.

އިސްލާމީ ދުނިޔޭގައި މިއަދު ފާހަގަކުރަމުންދާ 1446ވަނަ ހިޖުރީ އައު އަހަރުގެ މުނާސަބަތާ ގުޅިގެން ރާއްޖޭގެ ހުރިހާ ސިޔާސީ ލީޑަރުން ދިވެހި ރައްޔިތުންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވާފައިވެއެވެ.

ކުރީގެ ރައީސް މައުމޫން ޢަބްދުލްޤައްޔޫމްވަނީ ދުވަހުގެ ހެޔޮ އެދުމާއި ތަހުނިޔާ ހުރިހާ ދިވެހި ރައްޔިތުންނަށް ފޮނުއްވާފައެވެ. އަދި އައު އަހަރަކީ މުޅި އިސްލާމީ އުއްމަތަށް އުފާ ފާގަތި އަހަރެއްކަމުގައި ލެއްވުން އެދި ދުޢާކުރައްވާފައެވެ.

މިއަދު ހިޖްރީ އާ އަހަރެއް ފެށުމުގެ އުފާވެރި މުނާސަބަތުގައި ލޮބުވެތި މުސްލިމް ދިވެހި ރައްޔިތުންނަށް ނުހަނު އިޚްލާޞްތެރި ތަހުނިޔާ އާއި ހެޔޮ އެދުންތައް ފޮނުވަމެވެ. މިފެށުނު އާ އަހަރަކީ ދިވެހިރާއްޖެއަށާއި މުޅި އިސްލާމީ އުންމަތަށް އުފާ ފާގަތި އަހަރެއް ކަމުގައި ލައްވާށިއެވެ!

— Maumoon Abdul Gayoom (@maumoonagayoom) July 7, 2024

ކުރީގެ ރައީސް މުޙައްމަދު ނަޝީދު ފޮނުއްވި ތަހުނިޔާގެ މެސެޖުގައި ވިދާޅުވީ އިސްލާމީ އައު އަހަރާ ބައްދަލުކުރަން ޖެހުނުއިރު ބައެއް އިސްލާމީ ޤައުމުތަކުގައި ތިބި އެތައް ހާސް މުސްލިމުންނެއް ދެރައާއި ހިތާމައާއި އެތައް ތަކުލީފުތަކެއް ކުރިމަތިވެފައިވާ ދުވަސްވަރެއްކަން ހަނދާންކުރަންޖެހޭކަމަށެވެ. އެގޮތުން ސޫދާނާއި ބުރުމާއާއި ފަލަސްޠީނުގައި ހިނގަމުންދާ ހަމަނުޖެހުންތަކުގެ ވާހަކަ ރައީސް ނަޝީދު ފާހަގަކުރެއްވިއެވެ.

Hijree auaharai alhugandumen mi bahdhaluvanee Sudan, Burma adhi Palestine ge muslimunnah dhera aai thakuleef thahammal kuranjehifaiva dhuvas thakehgai. Islaamee unmathah nasraai kaamiyaabah edhey haalu, enme beyfulhunah dhuvahuge thahniya.

— Mohamed Nasheed (@MohamedNasheed) July 6, 2024

ކުރީގެ ރައީސް އަބްދުﷲ ޔާމީންވެސް ވނީ ހިޖުރީ އައު އަހަރުގެ ތަހުނިޔާ ދިވެހިރައްޔިތުންނަށް ފޮނުއްވާފައެވެ.
ޙިޖުރީ ގޮތުން 1446 ވަނަ އަހަރު ފެށުމުގެ މުނާސަބާގެ ތަހުނިޔާއާ މުބާރިކު ބާދީ އަރިސްކުރައްވާ ރައީސް ޔާމީން ދިވެހި ރައްޔިތުންނަށް ފޮނުއްވި މެސެޖުގައި ވިދާޅުވީ، ގައުމު ހަމަ މަގަށް އެޅުވޭނީ ވެރިން ޒިންމާ ދާރުކުރުވައިގެން ކަމަށެވެ. އަދި ޤައުމީ މަޞްލަޙަތަށްވުރެ އަމިއްލަ މަޞްލަޙަތު އިސްނުކުރުމަށް އެމެސެޖުގައި އެމަނިކުފާނުވަނީ އިލްތިމާސް ކުރައްވާފައެވެ.

ކުރީގެ ރައީސް އިބްރާހީމް މުޙައްމަދު ޞާލިޙްވެސްވަނީ ހިޖުރީ އައު އަހަރުގެ ހެޔޮ އެދުމާއި ތަހުނިޔާ ހުރިހަ ދިވެހީންނަށާއި އެންމެހާ މުސްލިމުންނަށްވެސްވަނީ ފޮނުއްވާފައެވެ. އަދި މިފެށޭ އައު އަހަރަކީ ހުރިހާގޮތަކުންވެސް އުފާވެރި އަދި ކާމިޔަބު އަހަރެއްކަމުގައި ލެއްވުން އެދި ތަހުނިޔަގެ މެސެޖުގައިވަނީ ދުޢާކުރައްވާފައެވެ.

ހިޖުރީ ސަނަތުން މި ފެށޭ 1446 ވަނަ
އަހަރުގެ މުނާސަބަތުގައި ރާއްޖޭގެ ލޮބުވެތި ރައްޔިތުންނާއި އެންމެހާ މުސްލިމުންނަށް ތަހުނިޔާއާއި ހެޔޮއެދުން އަރިސްކުރަން. މިފެށޭ އައު އަހަރަކީ، އަޅުގަނޑުމެންނަށް ކާމިޔާބު އަދި ހުރިހާ ގޮތަކުންވެސް އުފާވެރި އަހަރެއްކަމުގަ ލައްވާށި. އާމީން

— Ibrahim Mohamed Solih (@ibusolih) July 7, 2024

ހިޖްރީ އައު އަހަރުގެ ހެޔޮ އެދުމާއި ތަހުނިޔާ ޖުމްހޫރީ ޕާޓީގެ ލީޑަރު ޤާސިމް އިބްރާހީމްވެސްވަނީ ދިވެހި ރައްޔިތުންނަށް ފޮނުއްވާފައެވެ. އެމަނިކުފާނުގެ ތަހުނިޔަގެ މެސެޖުގައިވަނީ އައު އަހަރަށް މަރުޙަބާ ވިދާޅުވެ މިދުވަހުގެ ތަހުނިޔާ ރާއްޖޭގެ ރައީސުލްޖުމްހޫރިއްޔާއަށާއި އަދި ހުރިހާ ދިވެހީންނާއި މުޅި އިސްލާމީ އުއްމަތަށް އަރިސްކުރާކަމަށް ވިދާޅުވެފައެވެ. އަދި މިއީ ހެޔޮކަންކުރުމަށް ލިބިގެންދިޔަ އިތުރު ފުރުސަތެއްކަމުގައި ލެއްވުންއެދިވަނީ ދުޢާކުރައްވާފައެވެ.

1446 ވަނަ ހިޖުރީ އާ އަހަރަށް މަރުޙަބާ.
ހިޖުރީ އާ އަހަރުގެ އެންމެހާ ތަހްނިޔާ އާއި ހެޔޮ އެދުންތައް ރައީސުލް ޖުމްހޫރިއްޔާއަށާއި، އެންމެހާ ލޮބުވެތި ދިވެހިރައްޔިތުންނަށާއި، މުޅި އިސްލާމީ އުންމަތަށް އަރިސް ކުރަމެވެ.
މިފެށުނު ހިޖުރީ އާ އަހަރަކީ، ރަޙުމަތާއި ބަރަކާތުން ފުރިގެންވާ… pic.twitter.com/qOX5d87SSb

— Qasim Ibrahim (@qasimibrahim) July 6, 2024

ސިޔާސީ ލީޑަރުންނާއި ސަރުކާރުގެ އިސް ފަރާތްތަކާއި ޖަމިއްޔާ ޖަމަޢަތްތަކުންދަނީ އިސްލާމީ އުއްމަތް މިއަދު މަރުޙަބާ ކިޔަމުން މިދާ 1446ވަނަ އަހަރުގެ ހެޔޮ އެދުމާއި ތަހުނިޔާ އަރިސްކުރަމުންނެވެ.