1991 ވަނަ އަހަރުގެ ނޮވެމްބަރު މަހު ޖަރުމަނުގެ ސްޓްޓްގާޓް ސްޓޭޑިއަމްގައި ކުޅުނު ޔުއެފާ ކަޕް މެޗެއްގައި މިގުއެލް މެރީނޯ ލަނޑު ޖަހާ އޭނާ ކުޅުނު ކްލަބް އޮސަސޫނާ މޮޅު ކޮށްދިނެވެ. އޭގެ 33 އަހަރުން ފަހުން ހަމަ އެސްޓޭޑިއަމްގައި ޔޫރޯ ފުޓްބޯޅަ މުބާރާތުގެ ސެމީފައިނަލުން ސްޕެއިންއަށް ޖާގަ ހޯދައިދޭން ލަނޑު ޖަހާ އުފާފާޅުކުރީ މިކެލް މެރީނޯ އެވެ.
މިގުއެލް މެރީނޯގެ ދަރިފުޅު މިކެލް މެރީނޯ ސްޕެއިން ސެމީފައިނަލަށް ގެންގޮސްދިން ތާރީޚީ ލަނޑު ޖެހީ ނަތީޖާ ނެރުމަށް ކުޅުނު އިތުރު ވަގުތުގެ ދެހާފްގެ ތެރޭގައެވެ. އެތާރީޚީ ލަނޑަށްފަހު 28 އަހަރުގެ ކުޅުންތެރިޔާ ދިޔައީ 33 އަހަރު ކުރީގެ ހަނދާން ތަކަށެވެ. އުފާވެރި ބޮޑު ހިނިތުންވުމަކާއެކު ކޯނަރު ނަގާ ދަނޑު ކައިރިއަށް ގޮސް ދެއަތް އުފުލާލައިގެން "ތަކުރާރުކުރީ" ބައްޕަގެ ސެލެބްރޭޝަން ނުވަތަ އުފާފާޅުކުރުމެވެ. އެމަންޒަރު ބައްޕަ މިގުއެލް މެރީނޯ ފަޚުރުވެރިކަމާއެކު ބަލަމުން ދިޔައީ ޒުވާން އުމުރުގައި ސްޓްޓްގާޓް ސްޓޭޑިއަމްގެ ތަޖުރިބާތައް ހަނދާނަށް ގެންނަމުންނެވެ. މިއީ ދެބަފައިންނަށްވެސް އުފާވެރި އަދި އެހާމެ ފަޚުރުވެރި ވަގުތުކޮޅަކެވެ.
"މިއީ އަހަރެމެންގެ ނަސީބާ ގުޅިފައިވާ ސްޓޭޑިއަމް އެއް. އަހަރެންގެ ބައްޕަ ލަނޑު ޖެހީ މިސްޓޭޑިއަމްގައި، މިއީ އަހަރެމެންނަށް ޚާއްޞަ ސްޓޭޑިއަމް އެއްމިކެލް މެރީނޯ / ސްޕެއިން ފޯވާޑް
މިކެލް މެރީނޯގެ ބައްޕަ މިގުއެލް މެރީނޯ ބުނީ އޭނާގެ ދަރިފުޅު ނިކުމެ އޭނާ ފަހަތަށް ޖައްސާލައިފި ކަމަށެވެ. މީގެ 33 އަހަރު ކުރިން ޖެހި ގޯލް އަމިއްލަ ކުރުމުގެ ފުރުޞަތުވެސް ގެއްލިއްޖެ ކަމަށާއި، ދެން އޮތީ ދަރިފުޅަށް ފުރުޞަތު ދިނުން ކަމަށް ބުންޏެވެ.
"މިހާރު އަހަރެންނަށް އޮތީ މަޑުން ހުރުން، ދަރިފުޅަށް ބޮޑު ދޮނެއް ދިނުން، އޭނާއަށް ހައްގު.މިގުއެލް މެރީނޯ / މިކެލް މެރީނޯގެ ބައްޕަ
ދެބަފައިންގެ ލަނޑާއި، ސްޓްޓްގާޓް ސްޓޭޑިއަމްއާ ގުޅިފައިވާ އަނެއް އިއްތިފާގަކީ ދެ މެޗުގައިވެސް އެއް ޓީވީ ކޮމަންޓޭޓަރެއް އިނުމެވެ. ދެ ގޯލްގެ ވާހަކަވެސް މުޅި ދުނިޔެއަށް ވަގުތުން ކިޔައިދިނީ އެއް ކޮމަންޓޭޓަރެކެވެ. އަދި މިކެލް މެރީނޯ ގައުމީ ޖަރޒީގައި ފުރަތަމަ ނިކުތީ ވެސް ޖަރުމަނުގެ ސްޓްޓްގާޓް ސްޓޭޑިއަމްގަ އެވެ. އެއީ 2020 ވަނަ އަހަރުގެ ސެޕްޓެމްބަރު މަހު ނޭޝަންސް ލީގުގައެވެ.
ސްޕެއިން ސެމީފައިނަލަށް ގެންގޮސްދިން މެޗުގައި އޭނާ ކުޅެން ނިކުތީ މެޗުގެ ފަހު 10 މިނިޓްގައެވެ.