ރާއްޖޭގެ ރިސޯޓުތަކުގެ މެދުގައި ކުރިއަށްދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓު ލީގުގެ ސައުތު އަރި ޒޯނުގެ ޗެމްޕިއަންކަން ހަތްވަނަ ފަހަރަށް ކޮންރެޑް މޯލްޑިވްސް ރަންގަލި އައިލެންޑުން ހޯދައިފިއެވެ.
މިއަހަރު މުބާރާތުގެ ޗެމްޕިއަންކަން ކޮންރެޑުން ހޯދީ ފައިނަލުގައި ބާސެލޯ އާއި ވާދަކޮށް 4-1 ގެ ނަތީޖާއަކުން މެޗު ކާމިޔާބުކޮށްގެންނެވެ. މުބާރާތުގެ އެންމެ ކާމިޔާބު ޓީމު ކަމުގައިވާ ކޮންރެޑް ފައިނަލަށް ދިޔައީ، ތާވަލުގެ އެއްވަނަ ހޯދައިގެންނެވެ. އަދި މުޅިން އަލަށް މި މުބާރާތުގައި ވާދަކުރި ބާސެލޯ ފައިނަލަށް ދިޔައީ ސެމީ ގައި ލިލީ ބީޗް ބަލިކުރުމަށްފަހު އެވެ.
މުބާރާތުގެ ފުރަތަމަ ބުރުގައި ކޮންރެޑް ވަނީ ބާސެލޯ ކައިރިން 2-1 ގެ ނަތީޖާއަކުން ބަލިވެފަ އެވެ. ނަމަވެސް، އޭގެ ހިތި ރަހަ ފިލުވައި، ކޮންރެޑުން ވަނީ ފައިނަލުގައި 4-1 ގެ ނަތީޖާއަކުން ބާސެލޯ ބަލިކޮށް، ޗެމްޕިއަންކަން ހޯދާފަ އެވެ.
މެޗު ފެށިގެން ހަވަނަ މިނެޓުގައި ކޮންރެޑްގެ ސާލިމް މުހައްމަދު ވަނީ ގޯލެއް ޖަހައި، އެ ޓީމަށް ކުރިހޯދައިދީފަ އެވެ. އަދި ފުރަތަމަ ހާފުގެ ފަހު މިނެޓުގައި އޭނާ ވަނީ އިތުރު ގޯލެއް ޖަހައި، ފަރަގު ބޮޑުކޮށްފައެވެ.
ދެވަނަ ހާފު ފެށިގެންވެސް، ކޮންރެޑުން ކުޅުނީ އިތުރު ގޯލުތަކެއް ޖެހުމަށެވެ. އެގޮތުން، މެޗުގެ 28 ވަނަ މިނެޓުގައި އިސްމާއިލް ޝިޔާޒް ވަނީ ގޯލެއް ޖަހައި، ލީޑު ފުޅާކޮށްދީފަ އެވެ. އަދި އޭގެ ދެ މިނެޓު ފަހުން އޭނާ ވަނީ އިތުރު ގޯލެއް ޖަހައި، ކޮންރެޑަށް ނަތީޖާ ކަށަވަރުކޮށްދީފަ އެވެ. މެޗުގެ 32 ވަނަ މިނެޓުގައި ބާސެލޯގެ ހަމައެކަނި ގޯލު ޖެހީ އަހުމަދު ޖައިލަމް އެވެ.
ފައިނަލް މެޗުގެ މޮޅު ކުޅުންތެރިޔަކަށް ހޮވިފައިވަނީ ކޮންރެޑްގެ ސާލިމެވެ. އަދި މުބާރާތުގެ އެންމެ ގިނަ ގޯލު ޖެހި ކުޅުންތެރިޔަކީ އެ ޓީމުގެ އިސްމާއީލް ޝިޔާޒް އެވެ. އޭނާ ވަނީ ޖުމްލަ ހަ ގޯލު ޖަހާފައެވެ.
މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނިފައިވަނީ ހުސައިން ޝިފާހް އާއި ފާއިގް އަހުމަދު އާއި އަހުމަދު ސައީދުގެ އިތުރުން ބާސެލޯގެ އަހުމަދު ޖައިލަމް އާއި އަބްދުﷲ ޝަނޫނެވެ.
މިއަހަރުގެ މުބާރާތުގެ އެންމެ މޮޅު ކޯޗަކަށް ހޮވިފައިވަނީ ކޮންރެޑްގެ އަހުމަދު ރިލްވާން އެވެ. އަދި މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ ކޮންރެޑްގެ ސާލިމް އެވެ.