ޝަރީޢާ ހުއްދަކުރާ އިންޝުއަރެންސްގެ ޚިދުމަތް ދެމުން އަންނަ އަމާނާ ތަކާފުލް ޕަބްލިކް ލިމިޓެޑް ކޮމްޕެނީއަށް 2015 ވަނަ އަހަރު ލިބުނު އާމްދަނީ 22 އިންސައްތަ އިތުރުވެއްޖެއެވެ.
އެކުންފުނީގެ 2015 ވަނަ އަހަރުގެ އަހަރީ ޢާންމު ޖަލްސާއަށްފަހު ނެރުނު މާލީ ހިސާބުތައް ދައްކާގޮތުން، މިދިޔަ އަހަރު އެކުންފުންޏަށް ލިބުނު ޖުމްލަ އާމްދަނީ އަކީ 86 މިލިއަން ރުފިޔާއެވެ. މިއީ 2014 ވަނަ އަހަރާއި އަޅާބަލާއިރު 22 އިންސައްތަ އިތުރު ޢަދަދެކެވެ. އެހެން ނަމަވެސް، ޚަރަދުތަކާއި، ޓެކުހަށް ކެނޑުމަށްފަހު ސާފު ފައިދާގެ ގޮތުގައި އެކުންފުންޏަށް ލިބިފައިވަނީ 5.1 މިލިއަން ރުފިޔާއެވެ. މިއީ 2014 ވަނަ އަހަރާއި އަޅާބަލާއިރު، ގާތްގަނޑަކަށް 4.1 މިލިއަން ރުފިޔާ ދަށް ޢަދަދެކެވެ.
ކުންފުނީގެ ސީނިއަރ އެގްޒެކްޓިވް އަހުމަދު ޝަމޫލް ވިދާޅުވީ، ސާފު ފައިދާ ދަށްވެފައި ވަނީ މުޅި އިންޝުއަރެންސް ސިނާޢަތަށް ކުރިމަތިވި ތަފާތު ގޮންޖެހުންތަކުގެ ސަބަބުން ކަމަށެވެ. ނަމަވެސް، އެކުންފުނީގެ ވިޔަފާރީގެ އެކި ގިންތިތަކުން 2015 ވަނަ އަހަރުވެސް ފާހަގަކޮށްލެވޭ ކުރިއެރުންތަކެއް ހޯދިފައިވާކަން އޭނާ ފާހަގަކުރެއްވިއެވެ.
އަމާނާ ތަކާފުލްގެ އަހަރީ ޢާންމު ޖަލްސާގައި އެކުންފުނީގެ 2015 ވަނަ އަހަރުގެ ސާފު ފައިދާގެ 10 އިންސައްތަ ޙިއްސާދާރުންނަށް ބެހުމަށް ވަނީ ނިންމާފައެވެ.
މީގެ އިތުރުން އެކުންފުނިން ވަނީ ގެސްޓްހައުސް އިންޝުއަރެންސް ކަވަރގެ ނަމުގައި އާ އިންޝުއަރެންސް ޕްލޭނެއް ތަޢާރަފްކޮށް، ބިޒްނަސް ކަވަރޭޖް ޕްލޭނަށް ބަދަލުތަކެއްގެނެސް އެ ޕްލޭންވެސް އަލުން އިފްތިތާޙުކޮށްފައެވެ. އަހުމަދު ޝަމޫލް ވިދާޅުވީ، އަލަށް ތަޢާރަފް ކުރެވިގެންދިޔަ އިންޝުއަރެންސް ޕްލޭނަކީ ރާއްޖޭގެ ގެސްޓްހައުސްގެ ވިޔަފާރީގެ ދިރާސާތަކެއްކޮށް، އޭގެ މައްޗަށް ބިނާކޮށް އެކުލަވާލާފައިވާ ޕްލޭނެއްކަމަށެވެ.