މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގެ ގްރޫޕް ބީ ގައި ވެނެޒުއެލާ އިން ސައްތައިން ސައްތައިގެ ރެކޯޑެއް ގާއިމްކުރިއިރު، އެކުއޭޑޯ އިން މެކްސިކޯ ކަޓުވާލައި ކުއާޓާ ފައިނަލަށް ދަތުރުކޮށްފިއެވެ.
ވެނެޒުއެލާ އިން ވަނީ 3-0 އިން ޖެމެއިކާ ބަލިކޮށްފައެވެ. މެކްސިކޯއާ ދެކޮޅަށް އެކުއޭޑޯ ކުޅުނު މެޗު ނިމުނީ 0-0 އިން އެއްވަރުވެގެންނެވެ.
މި ނަތީޖާއާއެކު މި ގްރޫޕުގެ އެއްވަނައިގައި އޮތް ވެނެޒުއެލާ އަށް ލިބުނީ ތިން މެޗުން ނުވަ ޕޮއިންޓެވެ. ދެވަނައިގައި އޮތް އެކުއޭޑޯ އާއި ތިން ވަނަގައި އޮތް މެކްސިކޯ އަށް ތިން މެޗުން ލިބިފައިވަނީ ހަތަރު ޕޮއިންޓެވެ. އެކުއޭޑޯ އަށް ކުރިލިބެނީ ފައިދާ ގޯލްގެ ތަފާތުންނެވެ. ފުލުގައި އޮތް ޖެމެއިކާ އަށް ޕޮއިންޓެއް ނުލިބެއެވެ.
ވެނެޒުއެލާ އިން މި މެޗަށް ނިކުތްއިރު އެ ޓީމުގެ ކޯޗު، ފެނާންޑޯ ބަޓިސްޓާ އަށް ސަސްޕެންޝަނުގެ ސަބަބުން ބެންޗަށް ނާދެވުނެވެ. އެއީ، އެ ޓީމު އެންމެ ފަހުން މެކްސިކޯއާ ދެކޮޅަށް ކުޅުނު މެޗުގެ ދެވަނަ ހާފުގައި މާބޮޑަށް ލަހުން ދަނޑަށް ކުޅެން ނިކުތުމުންނެވެ.
އެމެރިކާގެ ޓެކްސަސްގައި ހުންނަ ކިއުޓޫ ސްޓޭޑިއަމްގައި ރޭ ފަތިހު ކުޅުނު މެޗުގައި އެކުއޭޑޯ އިން ކާމިޔާބުކުރި ތިން ލަނޑުވެސް ޖެހީ ފަހު ހާފުގައެވެ. އެ ޓީމުން މި މެޗުގައި ލީޑްނެގީ ފަހު ހާފުގެ ކުޅުން ފެށިގެން ހަތަރުވަނަ މިނެޓުގައި އެޑުއާޑް ބެލޯ ކާމިޔާބުކުރި ގޯލުންނެވެ. އެ ޓީމުގެ ޖޮން އަރަމްބުރޫ ނެގި ހުރަހަކުން ލިބުނު މި ބޯޅަ ގޯލްގެތެރެއަށް ބެލޯ ފޮނުވާލީ ބޮލުންނެވެ.
އޭގެފަހުން، މެޗުގެ 56 ވަނަ މިނެޓުގައި އެކުއޭޑޯގެ ދެވަނަ ލަނޑުޖަހައިދިނީ ސަލޮމަން ރޮންޑޯން އެވެ. މި ލަނޑުޖެހުމަށް އެހީތެރިވެދިނީ ޔަންގެލް ހެރޭރާ އެވެ. އެކުއޭޑޯގެ ފަހު ލަނޑު، 85 ވަނަ މިނެޓުގައި ކާމިޔާބުކޮށްދިނީ އެރިކް ރަމީރޭޒް އެވެ. އޭނާ މި ލަނޑުޖެހީ ކެރްވިން އެންޑްރާޑޭ ދިން ތުރޫ ޕާހަކުންނެވެ.
މި ގްރޫޕުގެ އަނެއް މެޗުގައި މެކްސިކޯއާ އެކުއޭޑޯ ލަނޑެއްނުޖެހި އެއްވަރުވެގެން ނިމުނުއިރު، އިތުރުވަގުތުގައި މެކްސިކޯ އަށް ޕެނަލްޓީއެއް ދޭން ނިންމުމަށްފަހު ރެފްރީ ވަނީ ވީއޭއާރް އިން ބެލުމަށްފަހު އެ ނިންމުން ބަދަލުކޮށްފައެވެ. އެއީ ޕެނަލްޓީއޭރިޔާ ތެރެއިން މެކްސިކޯގެ ގިލޭމޯ މާޓިނޭޒަށް އެކުއޭޑޯގެ ފެލިކްސް ޓޮރޭސް ފައުލްކުރުމުގެ ކުރީން އޭނާގެ އަތުގައި ބޯޅައިން ޖެހުމުންނެވެ.
މި މުބާރާތުގައި ދެން ކުޅުމަށް ހަމަޖެހިފައިވާ މެޗުތަކަށް ބަލާއިރު ބޮލީވިއާ ނިކުންނާނީ ޕެނަމާއާ ދެކޮޅަށެވެ. އަނެއް މެޗުގައި އެމެރިކާ ބައްދަލުކުރާނީ އުރުގުއޭއާ އެވެ. މި ދެ މެޗުވެސް ފަށާނީ ރާއްޖޭގަޑިން މިރޭ ފަތިހު 5 ޖަހާއިރު އެވެ.