އާޖެންޓީނާގެ ކެޕްޓަން، ލިއޮނަލް މެސީ އަށް އަނިޔާވެ، އެ ޓީމުގެ އެންމެ ފަހުގެ ފަރިތަކުރުންތަކުގައި ބައިވެރިވެފައިނުވާ ކަމަށް މީޑިއާ ހަބަރުތައް ބުނެފިއެވެ.
އެގޮތުން، އެ ޓީމުން އެންމެ ފަހުގެ ފަރިތަކުރުންތައް މިއާމީ އިންޓަނޭޝަނަލް ޔުނިވާސިޓީ ސްޕޯޓްސް ގްރައުންޑްގައި ކުރިއަށްގެންދިޔައިރު މެސީ ބައިވެރިވެފައިނުވާ ކަމަށް އާޖެންޓީނާގެ މީޑިއާ ހަބަރުތަކުން ވަނީ ކަށަވަރުކޮށްދީފައެވެ.
މެސީ، 37، އެންމެ ފަހުން ޗިލީއާ ދެކޮޅަށް އާޖެންޓީނާ ކުޅުނު މެޗުގައި ވެސް ވަނީ ފައިގެ ފަލަމަސްގަނޑަށް ލިބުނު އަނިޔާއަކަށް ދަނޑުމަތީގައި ފަރުވާ ހޯދާފައެވެ. އެ މެޗުން އާޖެންޓީނާ 1-0 އިން މޮޅުވެ، ކުއާޓާ ފައިނަލުން ޖާގަ ހޯދާފައިވާއިރު އެ ގްރޫޕުގެ ފަހު މެޗުގައި ޕެރޫއާ ބައްދަލުކުރުމަށް ހަމަޖެހިފައިވާ މެޗުގައި މެސީ އަށް އަރާމުކުރަން ފުރުޞަތު ބޭނުންވާކަމުގެ އިޝާރާތެއް އޭނާ ވަނީ ދީފައެވެ.
މެސީ ވަނީ އެންމެ ފަހުން ކުޅުނު މެޗުގައި ފައިގެ ފަލަމަސްގަނޑަށް ލިބުނު އަނިޔާއާއެކު އެ މެޗު ފުރިހަމަކޮށްލެވުނު ނަމަވެސް އަދިވެސް ކޮންމެވެސް ވަރަކަށް އުނދަގޫވާ ކަމަށާއި، އެހެންވެ ކުރިއަށް އޮތް ދުވަސްތަކުގައި އިތުރަށް ބަލަމުންދާނެ ކަމަށް ބުނެފައެވެ.
މެސީގެ ފިޓްނަސްއާ ގުޅޭގޮތުން އާޖެންޓީނާގެ ފުޓްބޯޅަ އެސޯސިއޭޝަނުގެ ބަހެއް މިހާތަނަށް ލިބިފައިނުވީނަމަވެސް، އެންމެ ފަހުން ބޭއްވި ފަރިތަކުރުންތަކުގައި އެ ޓީމުގެ ފުލްބެކް، މާކަސް އަކޫނިއާ އަށް ވަނީ އަނިޔާވެފައެވެ.
މި ގްރޫޕުގައި އާޖެންޓީނާ ދެން ކުޅޭ މެޗުގައި ޕެރޫއާ ބައްދަލުކުރުމަށް ހަމަޖެހިފައިވާއިރު އެ މެޗަށް ނެރޭ ފުރަތަމަ އެގާރައިން ބަދަލުތަކެއް ފެނިގެންދާނެ ކަމަށް ކޯޗު، ލިއޮނަލް ސްކަލޯނީ ވަނީ ބުނެފައެވެ. އެގޮތުން، މިހާތަނަށް ކުޅުނު މެޗުތަކުގައި އެ ޓީމުގެ ފުރަތަމަ އެގާރައިގައި ފެނިގެންދިޔަ ކުޅުންތެރިންނަށް އަރާމުކުރަން ފުރުޞަތު ދޭނެ ކަމަށް ސްކަލޯނީ ބުންޏެވެ.
ކޮޕާ އެމެރިކާގައި އާޖެންޓީނާއާ ޕެރޫ ބައްދަލުކުރާ މެޗު ކުޅުމަށް ހަމަޖެހިފައިވަނީ އަންނަ އާދީއްތަ ދުވަހުގެ ފަތިހު 5 ޖަހާއިރު އެވެ.