މިނިސްޓްރީ އޮފް ޔޫތު އެންޑް ސްޕޯޓްސް އާއި ސިފައިންގެ ވެލްފެއަރ ކުންފުނި (ސިވެކް) އާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
ރާއްޖޭގެ ވަޒީފާގެ ބާޒާރަށް ނުކުންނަން ތައްޔާރުވާ ޒުވާނުންނަށް ބޭނުންވާ ހުނަރާއި ތަމްރީނުދީ އެފަރާތްތައް ތައްޔާރުކޮށްދިނުމުގެ ގޮތުން ޔޫތު މިނިސްޓްރީން ހިންގުމަށް ހަމަޖައްސާފައިވާ ޕްރޮގްރާމްތަކަށް ދިވެހި ސިފައިންގެ އެހީތެރިކަން ހޯދުމާ ގުޅޭގޮތުން ވެވުނު އެއްބަސްވުމެކެވެ. މިއެއްބަސްވުމުގެ ދަށުން، 500 ޒުވާނުންނަށް ބޭނުންވާ ތަމްރީނާއި ހުނަރު އަދި އެކިއެކި ވަޒީފާގެ ބާޒާރުގައި ބޭނުންވާނެ ހުނަރުތައް މި ޕްރޮގްރާމްގެ ތެރެއިން ދިނުމަށް ވަނީ ހަމަޖެހިފައެވެ. އަދި މި ޕްރޮގްރާމްތައް ފުރިހަމަކުރާ ޒުވާނުންނަކީ ރާއްޖޭގެ ވަޒީފާގެ ބާޒާރުގައި ވަރަށް ތަނަވަސް އަޤުލަބިއްޔަތަކުން ވަޒީފާ ލިބިގެންދާނެކަމަށް ބަޔަކަށް ހެދުމަށް މަސައްކަތްތަކެއް ކުރާގޮތަށް ވަނީ ހަމަޖެހިފައެވެ.
ކަޅުތުއްކަލާކޮށީގައި ބޭއްވި ޚާއްޞަ ރަސްމިއްޔާތުގައި، ޔޫތު މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ޔޫތު އެންޑް ސްޕޯރޓްސް، އަހްމަދު ޒުހޫރުއެވެ. އަދި ސިވެކްގެ ފަރާތުން، މި އެއްބަސްވުމުގައި ސޮއިކުރެއްވީ، އެ ކުންފުނީގެ މެނޭޖިންގ ޑިރެކްޓަރ މޭޖަރ އިސްމާޢީލް ނަސީރުއެވެ.
މި ރަސްމިއްޔާތުގައި، ޔޫތު މިނިސްޓްރީގެ ޑެޕިޔުޓީ މިނިސްޓަރ ޝާޙް އިސްމާޢީލް އާއި އެ މިނިސްޓްރީގެ ޑިރެކްޓަރ ޖެނެރަލް ޢަލީ ޒަކީ އަޙްމަދާއި، ސީނިއަރ އެޑްމިންގ އޮފިސަރ، އަލްފާޟިލް އަޙްމަދު ނަޝީދު ބައިވެރިވެލެއްވިއެވެ. އަދި މީގެ އިތުރުން، ކޮލެޖް އޮފް ޑިފެންސް އެންޑް ސެކިޔުރިޓީ ސްޓަޑީޒްގެ އެކި ރޭންކުތަކުގެ ސިފައިންވެސް ބައިވެރިވެލެއްވިއެވެ.