ތިންވަނަ ދަރިއަކު ލިބޭތީ، އިނގިރޭސި މިޑްފީލްޑަރ ފިލް ފޮޑެން ޓީމާ ވަކިވެ އާއިލާ ކައިރިއަށް ހިނގައްޖެ އެވެ.
ޖަރުމަނުގައި އޮތް ޓީމް ކޭމްޕް ދޫކޮށް، ފޮޑެން މިހާރު ހުރީ އިންގްލެންޑްގައި އާއިލާ ކައިރީގައެވެ. އިނގިރޭސި އެފްއޭއިން ބުނީ ފޮޑެން އާއިލާ ކައިރިއަށް ދިއުމަށް އެދުމުން އެހުއްދަ ދީފައިވާ ކަމަށެވެ. 24 އަހަރުގެ ފޮޑެން އެނބުރި ޖަރުމަނަށް ގޮސް ޓީމާ ގުޅޭނީ އާދިއްތަ ދުވަހު އެވެ. އެއީ ނޮކުއައުޓް ބުރުގައި އިންގްލެންޑް މެޗު ކުޅޭ ދުވަހެވެ.
ތިންވަނަ ދަރިއަކު ލިބެން އުޅޭކަން ފޮޑެން އާއި އޭނާގެ ބައިވެރިޔާ އިއުލާނުކުރީ އޭޕްރީލް މަހުއެވެ. މިހާރުވެސް ފޮޑެންގެ ދެ ކުދިން ތިބެއެވެ. އެއީ 5 އަހަރުގެ ފިރިހެން ކުއްޖަކާއި 2 އަހަރުގެ އަންހެން ކުއްޖެކެވެ.
މެންޗެސްޓަރ ސިޓީގެ މިޑްފީލްޑަރ ވަނީ މިހާތަނަށް ގައުމީ ޓީމަށް 37 މެޗު ކުޅެދީފައެވެ. ކުރިއަށްދާ ޔޫރޯ މުބާރާތުގެ ގްރޫޕް ސްޓޭޖްގެ ތިން މެޗުގައިވެސް އިންގްލެންޑްގެ ފުރަތަމަ އެގާރައިގަ އޭނާ ހިމެނުނެވެ. ގަދަ 16 އަށް އިންގްލެންޑް ދަތުރުކުރީ ގްރޫޕްގެ އެއްވަނަ ޓީމްގެ ގޮތުގައެވެ.