އޭނާ އަކީ ރާއްޖެ ދުށް އެންމެ މޮޅު ޑިފެންސިވް މިޑްފީލްޑަރެވެ. އޭނާ އަކީ އައްޑޫއިން އަރައިގެން އައި އެންމެ އަލިގަދަ ތަރި އެވެ. އަދި އެއީ ދިވެހި ފުޓްބޯޅައިގެ ރަންޖީލުގެ އެންމެ މުހިންމު އެއް ތަނބެވެ. މުހައްމަދު އާރިފް ނުވަތަ ބަކާ އަކީ ރާއްޖޭގެ ފުޓްބޯޅައިގެ ގައުމީ ބަތަލެކެވެ. އަގުނުކުރެވޭ ފަދަ ހިދުމަތްތެރިއެކެވެ.
އޭނާގެ ފެށުން އައީ 2004 ވަނަ އަހަރު އައްޑު އަތޮޅަށް ނިސްބަތްވި އައިލެންޑް ފުޓްބޯޅަ ކުލަބުންނެވެ. އެއަށްފަހު ކްލަބް ވެލެންސިއާ އާއި ވިކްޓަރީ ސްޕޯޓްސް ކުލަބް އަދި އައިއެފްސީގެ ނަން ބަދަލުކޮށްގެން ހިންގި ވީބީގައި މުހިންމު ދައުރެއް އަދާކޮށް ގިނަ ކާމިޔާބީތަކަކާއި އެތައް ތަށިތަކެއް ހޯދި އެވެ. އޭގެ ފަހުން ރާއްޖޭގެ ނަން މަޝްހޫރު ގިނަ ކުލަބުތަކެއްގެ ޖާޒީގައި ވެސް ފެނިގެންދިޔަ ބަކާ އަކީ ދަނޑުމަތީގައި ދެގޮތެއްނުވެ ކުޅޭ ހިތްވަރުގަދަ ކުޅުންތެރިއެކެވެ.
ރާއްޖެއިން މަދުން ނޫނީ ނުފެންނަވަރުގެ ހުނަރުވެރި ދިފާއީ އައްޑަނައެކެވެ.އޭނާ އަކީ ފަހަތާއި މެދުތެރެ ގުޅުވައިދީ އިދިކޮޅު ޓީމު ރޫޅާލުމަށް ވަރުގަދަ މެޗުތަކުގައި ދިވެހިން ބޭނުންކުރި އެންމެ ކުޅަދާނަ ހަތިޔާރެވެ.
މިކަން އެންމެ ސާފުކޮށް ފެންނަން އޮތީ ގައުމީ ފުޓްބޯޅަ ޓީމުންނެވެ. އޭނާ އަކީ ފުރަތަމަ ފަހަރަށް ރާއްޖެއަށް ފުޓްބޯޅައިން ތައްޓެއް ހޯދައިން ތާރީހީ ޓީމުގެ މެދުތެރެ ބަލަހައްޓައިދިން މުހިންމު މެމްބަރެވެ. އުމުރުން 22 އަހަރުގައި ސަރަހައްދީ ފޯވަޑުންގެ ދުވެލި ހުއްޓުވައި ދިވެހިންނަށް ހާ އުފާވެރިކަން ހޯދައިދިނީ ގަދަ ހިތްވަރާއި ނުގުޑާފަދަ އަޒުމަކާއެކުގަ އެވެ.
މި ޝަރަފާއެކު މެދު އުޑުގައި ފިޔަޖަހަން ފަށައި 2010 ވަނަ އަހަރު ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ހާސިލްކުރި އެވެ. އޭނާ އަކީ މެދުތެރެއިން ފަހަތަށް ކުޅެމުން ރާއްޖޭގެ މޮޅު ކުޅުންތެރިޔާގެ މަގާމު މިހާތަނަށް ހޯދި ހަމައެކަނި ކުޅުންތެރިޔާ އެވެ. އައްޑު އަށް މި ޝަރަފު ހޯދައިދިން ހަމައެކަނި ކުޅުންތެރިޔަކީ ވެސް ބަކާ އެވެ.
ގައުމީ ބަތަލެއްގެ ގޮތުގައި ބަކާ ހާއްސަވާ އެންމެ މުހިންމު އަނެއް ސަބަބަކީ އޭނާ އަކީ ސާފް ޗެމްޕިއަންޝިޕް ދެ ފަހަރު ހޯދި ދެ ކުޅުންތެރިންގެ ތެރެއިން އެކަކަށްވުމެވެ. 2018 ވަނަ އަހަރު ދެ ވަނަ ފަހަރަށް ތަށި ހޯދިއިރު އޭނާ އަކީ ޓީމުގެ ވައިސް ކެޕްޓަނެވެ.
ކުޅެމުން، އެހެން ކުޅުންތެރިންނަށް އެހީވަމުން، ޓީމުވަންތަކަމުގެ ކުޅުންތެރިއެއްގެ ގޮތުގައި ފެނިގެންދިޔަ ބަކާގެ ހާއްސަ އެއް ސިފައަކީ އޭނާގެ މަޑުމައިތިރިކަމެވެ. ރިވެތި އަޚްލާގެވެ. ދީނަށް ލޯބިކޮށް، ދީނީ މައުލޫމާތު އުނގެމެނުން އެ މައުލޫމާތު އޭނާގެ ރަހުމަތްތެރިންނަށް ފޯރުކޮށްދީ އަގުމާތްވި އިސްލާމީ ރިސާލަތު ފަތުރަން މަސައްކަތް ކުރުމެވެ. ދަނޑުމަތީގައި މުސައްލަ އަޅައިގެން ނަމާދުކުރުމަކީ އިހުގައި ދިވެހިންގެ ތެރޭގައި އޮތް އާދައެއްނޫނެވެ.
އެކަމަކު ފުޓްބޯޅަ ކުޅެން އުޅެމުން ވެސް ލިބޭ ހުސްވަގުތުގެ ބޭނުން ހޮޔެގޮތުގައި ހިފައި ތިމާގެ ފަރުދީ އަދި ދީނީ ޒިންމާތަކަށް އިހްތިރާމްކުރަންޖެހޭކަމާއި ބަރާބަރަށް އަޅުކަން އަދާކުރަންޖެހޭކަން މިއަދުގެ ޒުވާން ޖީލަށް ވިސްނައިދީ އަމަލުން އެކަން ދެއްކުމުގައި ބަކާ އަކީ ނަމޫނާ މިސާލެކެވެ.
ހައްޖުގެ މަތިވެރި އަޅުކަމަށްފަހު އޭނާގެ ކުއްލި ވަކިވުމަކީ ދިވެހި ފުޓްބޯޅަ އަށް ލިބުނު ވަރަށް ބޮޑު ހުސްކަމެކެވެ. އިއްޔެ އާއި މިއަދު އަދި މާދަމާގެ ކުޅުންތެރިންނާއި ކޯޗުންނާއި އޮފިޝަލުންނާއި ސަޕޯޓަރުންނަށް ލިބުނު ބޮޑު ސިހުމާއި ދެރައެކެވެ. ބަކާގެ ވަކިވެދިއުމުން ދައްކައިދެނީ އަހަރުމެން ކޮންމެ މީހަކު ވެސް އުހުރަވީ ހަޔާތަށް ތައްޔާރުވެ ހުންނަންޖެހޭކަމެވެ.
އޭނާގެ ފުޓްބޯޅައިގެ ހިދުމަތް ދިރިތިބީން އަބަދުވެސް ބަލައިގަންނާނެ އެވެ. އެ ހަނދާންތަކާއި ވަރުގަދަ ޓެކްލްތަކުގެ މަތިން ދިވެހިން ހަނދާނެއް ނުނެތޭނެ އެވެ.
މާތް ﷲ ބަކާގެ ފާފަ ފުއްސަވައި ގަބުރުގެ އަޒާބުން ސަލާމަތްކުރައްވައި މަތިވެރިވެގެންވާ ޖަންނަތުލް ފިރުދައުސްގައި ލައްވާށި އެވެ. އާމީން.