ރަމަޟާން މަހަށް މިސްކިތްތައް މަރާމާތު ކުރުމަށް، 20 މިލިއަން ރުފިޔާގެ ބަޖެޓެއް ހަމަޖައްސަވާ، މާލެ އާއި އަތޮޅުތަކުގެ ގިނަ މިސްކިތްތަކެއް މަރާމާތު ކުރެއްވުމުގެ މަސައްކަތް އިސްލާމިކް މިނިސްޓްރީން ގެންދަވަނީ ކުރައްވަމުންނެވެ.
ރަމަޟާން މަސް ފެށުމުގެ ކުރިން، މިސްކިތްތައް މަރާމާތުކޮށް، އާބާތުރަފިލުވުމަކީ، އިސްލާމިކް މިނިސްޓްރީން ޚާއްސަ އިސްކަމެއް ދެއްވައިގެން ކުރައްވަމުން އަންނަ ކަމެކެވެ. މިއަހަރުވެސް މިސްކިތްތައް މަރާމާތު ކުރުމަށް 20 މިލިއަން ރުފިޔާގެ ބަޖެޓެއް ކަނޑައަޅުއްވާފައިވާ ކަމަށް އިސްލާމިކް މިނިސްޓްރީން ވިދާޅުވެއެވެ.
މާލެ ސަރަޙައްދަށް ބަލާއިރު، 35 މިސްކިތެއްގެ މަރާމާތުގެ މަސައްކަތް ކުރިއަށްދާކަން ފާހަގަކޮށްލެވެއެވެ. އިސްލާމިކް މިނިސްޓަރގެ ނައިބު މުހައްމަދު މުސްތަފާ ވިދާޅުވީ މާލެ، ވިލިމާލެ އަދި ހުޅުމާލޭގެ ހުރިހާ މިސްކިތްތަކެއްވެސް ރަމަޟާން މަސް ފެށުމުގެ ކުރިން މަރާމާތު ކުރެވޭނެ ކަމަށެވެ. އަމިއްލަ ފަރާތްތަކުން ބަލަހައްޓަމުންދާ މިސްކިތްތައް މަރާމާތު ކުރައްވަނީ އެ ފަރާތެއްގެ އަމިއްލަ ޚަރަދުގައި ކަމަށާއި، ދެން ހުރި މިސްކިތްތައް މަރާމާތު ކުރައްވަނީ، ޤައުމީ ދިފާއީ ބާރާއި، އިސްލާމިކް މިނިސްޓްރީ ގުޅިވަޑައިގެން ކަމަށް މުހައްމަދު މުސްތަފާ ވިދާޅުވިއެވެ.
އަތޮޅުތަކުގައި އެންމެ އިސްކަންދެއްވައިގެން ކުރިއަށްދަނީ ރަމަޟާން މަހަށް އަލަށް ހުޅުވާ 14 މިސްކިތެއްގެ މަސައްކަތް ކަމަށް އިސްލާމިކް މިނިސްޓްރީން މަޢުލޫމާތުދެއްވައެވެ. އަތޮޅުތަކުގެ މިސްކިތްތަކުގެ ތެރެއިން، ގިނަ މިސްކިތްތަކެއްވެސް މަރާމާތު ކުރައްވަމުންދާ ކަމަށާއި، އެކަންތައްތައް ކުރައްވަނީ ރަށު ކައުންސިލްތަކާއި ހަވާލު ކުރައްވައިގެން ކަމަށް އިސްލާމިކް މިނިސްޓްރީން ވިދާޅުވެއެވެ. މިސްކިތްތަކުގައި މަރާމާތުގެ ގޮތުގައި ކުރައްވަމުންދާ މަސައްކަތްތަކަކީ، ނަމާދުކުރާ ޖާގަ އިތުރުކުރުމާއި، ކުލަ ލުމާއި، ދިޔަދޮވި، އަދި ފުރާޅު މަރާމާތު ކުރުމުގެ މަސައްކަތެވެ.