މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށް ރާއްޖޭގައި ބާއްވާ "މޯލްޑިވްސް އޯޕަން 2024 - 10 ބޯލް ޗެމްޕިއަންޝިޕުގައި ވާދަކުރާ ރާއްޖޭގެ ގައުމީ ޓީމުގެ 16 ކުޅުންތެރިންނަށް ރަސްމީކޮށް ޖާޒީ ހަވާލުކޮށްފިއެވެ.
އަންނަ ޖޫން މަހުގެ 10 އިން 14 ގެ ދުވަހުގެ ނިޔަލަށް މާލެ ސިޓީގައި ބާއްވާ މި މުބާރާތުގައި ޖުމްލަ 96 ކުޅުންތެރިން ވާދަކުރާނެއެވެ. އެގޮތުން ބައިނަލްއަގުވާމީ 80 ކުޅުންތެރިންނާއެކު މުބާރާތުގައި 16 ދިވެހި ކުޅުންތެރިން، އެކި ކެޓަގަރީތަކުގައި ވާދަކުރާއިރު، މި އަހަރުގެ މުބާރާތުގައި ދުނިޔޭގެ ފަސް ޗެމްޕިއަނުން ވާދަކުރުމަށް ވަނީ ހަމަޖެހިފައެވެ.
ރާއްޖެއިން މި މުބާރާތުގައި ވާދަކުރާ 16 ކުޅުންތެރިންނާއި، އޮފިޝަލުންނަށް ޖާރޒީ ހަވާލުކުރުމަށް ގައުމީ ބިލިއާޑް ސެންޓަރުގައި ވަނީ ރަސްމިއްޔާތެއް ބާއްވާފައެވެ. ޓީމުގެ ކުޅުންތެރިންނަށް ޖާރޒީ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. މީގެއިތުރުން އެމްޕީބީއޭގެ ރައީސް އަޙްމަދު ނާސިފުވެސް ބައިވެރިވެވަޑައިގެންނެވި އެވެ.
މޯލްޑިވްސް އޯޕަންގައި ވާދަކުރާ ރާއްޖޭގެ ކުޅުންތެރިންނަކީ އަހުސަން ހާޝިމް، އިސްމާޢީލް ސުވައިދު، ހަސަން ޝާޒް މުޙައްމަދު، މުޙައްމަދު ސާހިލް ހަމީދު، މުޙައްމަދު ޝަރީފް، މުޙައްމަދު އަކްސަމް ވަޙީދު، އިސްމާޢީލް ޖީހާން، ޙަސަން ޝަފްރާޒް، ދުންޔާޒް މުޙައްމަދު، ހިޝާމް މަޖީދު، އަޙްމަދު ޝިވާޒު، ހުސައިން ޝައްމާނު، ފަތުހުﷲ ޖަމީލް، އަލީ ފަޔާޒް، އަހްމަދު ނަފީލް އަދި ހަސަން އުސްވަތުﷲ އެވެ.
ޓީމުގެ މެނޭޖަރަކީ ހުސެއިން ސަނީފެވެ. އަދި ކޯޗަކީ ޝަޒީން އަބްދުއްސަމަދެވެ.
ދުނިޔޭގެ ރޭންކިންގެ އެންމެ ކުރީގައި އުޅޭ ކުޅުންތެރިންނާއެކު، އޭޝިއާގެ އެންމެ މޮޅު ކުޅުންތެރިން މި އަހަރުގެ މުބާރާތުން ފެނިގެންދާނެއެވެ. އަދި ޔޫރަޕުގެ ކުޅުންތެރިން ހިމެނޭހެން މި މުބާރާތުގައި 25 ގައުމެއްގެ ކުޅުންތެރިން ވާދަކުރާނެއެވެ.
މިއީ މޯލްޑިވްސް އޯޕަން ބިލިއާޑް މުބާރާތް ބާއްވާ ދެވަނަ އަހަރެވެ. އެގޮތުން މިދިޔަ އަހަރު ބޭއްވި މުބާރާތުގައި 24 ގައުމަކުން 64 ކުޅުންތެރިން ވަނީ ވާދަކޮށްފައެވެ.
ރާއްޖޭގެ ކުޅިވަރުގެ ތާރީޚުގައި ބޭއްވި ފުރަތަމަ ބައިނަލްއަގުވާމީ ބިލިއާޑް މުބާރާތުގެ ގޮތުގައި މިދިޔަ އަހަރުގެ މުބާރާތް ފާހަގަކޮށްލެވުނުއިރު، އެ މުބާރާތުގެ ޗެމްޕިއަންކަން ހޯދީ ޗައިނީސް ޓައިޕޭގެ ކޯ ޕިން ޗަންގްއެވެ. އޭނާ ޗެމްޕިއަންކަން ހޯދީ ފައިނަލް މެޗުގައި ފިލިޕީންސްގެ ޔޯހަން ޗުއާއާ ވާދަކޮށް 10-8 ފްރޭމުން މެޗު ކާމިޔާބުކޮށްގެންނެވެ.
މުބާރާތުގެ ގަދަ 32 ކުޅުންތެރިން ތެރޭގައި ރާއްޖޭގެ އެއްވަނަ ކުޅުންތެރިޔާ ހަސަން ޝާޒް މުޙައްމަދު ވަނީ ހިމެނިފައެވެ. މިއީ ރާއްޖޭގެ ބިލިއާޑުގެ ތާރީޚުގައި މިހާތަނަށް ލިބުނު އެންމެ ބޮޑު އެއް ކާމިޔާބީއެވެ.