މިހާރު ކުރިއަށްދާ ކޮޕާ އެމެރިކާގައި ވެނެޒުއެލާ އާއި މެކްސިކޯ އިން ކުޅުނު ފުރަތަމަ މެޗުން މޮޅުވެއްޖެއެވެ.
އެކުއޭޑޯ އަތުން ފަހަތުންއަރައި 1-2 އިން ވެނެޒުއެލާ މޮޅުވިއިރު، މެކްސިކޯ އިން ވަނީ 1-0 އިން ޖެމެއިކާ ބަލިކޮށްފައެވެ.
މި މެޗުތަކަށްފަހު ގްރޫޕް ބީ ގައި ހިމެނޭ މި ދެ ޓީމުން ވަނީ ތިން ޕޮއިންޓާއެކު ތާވަލްގެ އެއްވަނަ އަށް ޖެހިލައިފައެވެ. ވެނެޒުއެލާ އެއްވަނައިގައި އޮތްއިރު، ދެވަނައިގައި އޮތީ މެކްސިކޯ އެވެ. ތިން ވަނަ މަގާމުގައި އޮތް އެކުއޭޑޯ އާއި ފުލުގައި އޮތް ޖެމެއިކާ އަށް ޕޮއިންޓެއްނުލިބެއެވެ.
ކެލިފޯނާގެ ސަންޓާ ކްލާރާގައި ހުންނަ ލެވީސް ސްޓޭޑިއަމްގައި ވެނެޒުއެލާއާ ދެކޮޅަށް ކުޅުނު މެޗު ފެށިގެން 22 ވަނަ މިނެޓުގައި އެކުއޭޑޯގެ އެނާ ވެލެންސިއާ އަށް ދެއްކި ރަތް ކާޑާއެކު އެ ޓީމުން މެޗުގެ ބާކީބައި ފުރިހަމަކުރީ އެއް ކުޅުންތެރިއަކު މަދުކޮށެވެ.
މި މެޗުގައި ކުރީން ލީޑްނެގީ ވެސް އެކަކު މަދުކޮށް ކުޅެމުންދިޔަ އެކުއޭޑޯ އިންނެވެ. ފުރަތަމަ ހާފުގެ ކުޅުން ނިމެން ފަސް މިނެޓަށްވެފައިވަނިކޮށް މި ލަނޑު އެ ޓީމަށް ކާމިޔާބުކޮށްދިނީ ޖެރެމީ ސާމިއެންޓޯ އެވެ. މިއީ އެ ޓީމަށް ލިބުނު ހިލޭޖެހުމަކުން ކެންޑްރީ ޕައެޒް ފޮނުވާލި ބޯޅައެއް ވެނެޒުއެލާގެ ކުޅުންތެރިން ދިފާއުކުރަން އުޅުމުގެ ތެރޭގައި ލިބުމުން ސާމިއެންޓޯ ކާމިޔާބުކުރި ގޯލެކެވެ.
މެޗުގެ 64 ވަނަ މިނެޓުގައި ޖޮންޑާ ކަޑިޒް ވަނީ ވެނެޒުއެލާ އަށް ނަތީޖާ އެއްވަރުކޮށްދީފައެވެ. އޭނާ މި ގޯލް ކާމިޔާބުކޮށްދިނީ ގޯލާ 15 ޔާޑު ދުރުން ފޮނުވާލި ހަމަލާއަކުންނެވެ. އޭގެފަހުން، މެޗުގެ 74 ވަނަ މިނެޓުގައި އެޑުއާޑް ބެލޯ ވަނީ ވެނެޒުއެލާ މޮޅުވި ލަނޑުޖަހައިދީފައެވެ. މިއީ އެ ޓީމުގެ ފޯވާޑް، ސަލޮމަން ރޮންޑޮން ބޮލުން ފޮނުވާލި ބޯޅައެއް އެކުއޭޑޯގެ ކީޕަރު، އަލެގްޒެންޑާ ޑޮމިންގޭޒް މަތަކުރުމުން ދެވަނަ ފަހަރަށް އެ ބޯޅަ ބެލޯ އަށް ލިބުމުން އޭނާ ކާމިޔާބުކުރި ގޯލެކެވެ. މި މެޗުގައި ވެނެޒުއެލާ އިން ކާމިޔާބުކުރި ދެލަނޑުޖަހައިދިން ކަޑިޒް އާއި ބެލޯ ކުޅެން ނިކުތީ ފަހު ހާފުގެ ކުރީކޮޅު އެވެ.
ޓެކްސަސްގެ އެންއާރްޖީ ސްޓޭޑިއަމްގައި ރޭ ފަތިހު މެކްސިކޯ އިން ޖެމެއިކާ ބަލިކުރިއިރު އެ މެޗުގައި ފެނިގެންދިޔަ ހަމައެކަނި ލަނޑު، ފަހު ހާފުގައި ކާމިޔާބުކޮށްދިނީ ޖެރާޑޯ އާޓިއެގާ އެވެ. މެޗުގެ 69 ވަނަ މިނެޓުގައި އާޓިއެގާ މި ލަނޑުޖަހައިދިނީ ޖެމެއިކާގެ ޖޮއެލް ލަޓިބިއުޑިއެރޭ ބޮލުން ދިފާއުކުރި ބޯޅައެއް މެކްސިކޯގެ ލުއިސް ރޯމޯ އަށް ލިބުމުން އޭނާ ދިން ޕާހެއްގެ އެހީގައެވެ. މިއީ މެކްސިކޯ އަށް އޭނާ ކުޅުނު 25 މެޗުގައި ޖެހި ދެވަނަ ލަނޑެވެ.
އޭގެކުރީން، ދެވަނަ ހާފުގެ ކުޅުން ފެށިތާ ފަސްވަރަކަށް މިނެޓުގެ ތެރޭގައި ޖެމެއިކާ އަށް މިހައިލް އެންޓޯނިއޯ ލީޑްނަގައިދިންނަމަވެސް ވީއޭއާރް އިން ބެލުމަށްފަހު ރެފްރީ އެ ލަނޑު ގަބޫލެއްނުކުރިއެވެ. އެއީ އެ ބޯޅަ ފޮނުވާލިއިރު އޮފްސައިޑް މަގާމެއްގައި ހުރުމުންނެވެ.
މެޗަށްފަހު ދެއްކި ވާހަކައިގައި ޖެމެއިކާގެ ކޯޗު، ހެއިމިރް ހާލްގްރިމްސަން ބުނީ، އޮފްސައިޑްވީ ވަރަށް ކުޑަ ތަންކޮޅަކުން ކަމަށެވެ. އަދި، އޭނާ އެ ގޯލް ބެލިކަމަށާއި ރެފްރީގެ
ނިންމުން ރަނގަޅު ކަމަށް ވެސް ހާލްގްރިމްސަން ބުންޏެވެ.
މުބާރާތުގައި މިރޭ ފަތިހު ކުޅުމަށް ހަމަޖެހިފައިވާ ފުރަތަމަ މެޗުގައި އެމެރިކާ ނިކުންނާނީ ބޮލީވިއާ އާ ދެކޮޅަށެވެ. ދެވަނަ މެޗުގައި އުރުގުއޭ ބައްދަލުކުރާނީ ޕެނަމާ އާ އެވެ.
