ޔޫރޯ 2024ގެ ގްރޫޕް އޭ ގައި ރޭ ހަންގޭރީއާ ދެކޮޅަށް ކުޅުނު މެޗަށްފަހު ބޭއްވި ޕްރެސް ކޮންފަރެންސްގައި ޖަރުމަނުގެ ކޯޗު، ހޫލިއަން ނާގަލްސްމަން ބުނީ، އޭނާގެ ޓީމުގެ ފަރާތުން ފެނުނީ ކެތްތެރިކަމާއެކު ވިސްނުމުގެ ބޭނުންކޮށްގެން ހަމަޖެހިލައިގެން ކުޅުނު މަންޒަރު ކަމަށެވެ.
ނާގަލްސްމަން ބުނީ، މިދިޔަ އޮކްޓޫބަރު މަހުގެ ތެރޭގައި ހަންގޭރީއާ ދެކޮޅަށް ކުޅުނުނަމަ 2-0 އިން އޭނާގެ ޓީމު މޮޅުނުވީސް ކަމަށެވެ. މި ފެންވަރުގެ މެޗުތަކުގައި ހަމަޖެހިގެން ތިބެންޖެހޭނެ ކަމަށާއި، ރޭގެ މެޗުގައި ޖަރުމަނުން އެކަން ދައްކައިދީފައިވާ ކަމަށް ނާގަލްސްމަން ފާހަގަކުރިއެވެ.
ނާގަލްސްމަން ވަނީ، ހަންގޭރީގެ ފަރާތުން އުނދަގޫތައް ކުރިމަތިކުރުވި ކަމަށް ބުނެ، އެފަދަ ގިނަ ހާލަތްތަކުގައި އޭނާގެ ޓީމުން ކުޅުނީ ވަރަށް ހަމަޖެހިލައިގެން ކަމަށް ފާހަގަކޮށްފައެވެ.
ނާގަލްސްމަން އިތުރަށް ބުނީ، އެ ފަދަ އުނދަގޫ މެޗަކުން ފުރަތަމަ މޮޅުވާން ޖެހޭ ކަމަށާއި، އެކަން އޭނާގެ ޓީމުން ހާސިލްކޮށްފައިވާ ކަމަށެވެ.
މުބާރާތުގައި މުސިއާލާގެ ފަރާތުން މިހާތަނަށް ފެނިގެންދިޔަ ކުޅުމާ ބެހޭގޮތުން ނާގަލްސްމަން ބުނީ، ޖަރުމަނުން ކުޅުނު ދެ މެޗުގައި ވެސް މުސިއާލާގެ ފަރާތުން ތަފާތު މޮޅު ކުޅުމެއް ފެނިގެންގޮސްފައިވާ ކަމަށެވެ. ލަނޑުޖެހުމުގެ އިތުރުން މެޗުގެ ކޮންމެ ހާލަތެއްގައި އޭނާ ތަފާތު ދައްކާފައިވާކަމަށް ނާގަލްސްމަން ބުންޏެވެ. އަދި މާބޮޑަށް ޕްރެޝަރާ މެދު ނުވިސްނުމަށް މުސިއާލާގެ ކިބައިން ނާގަލްސްމަން ވަނީ އެދިފައެވެ.
ނާގަލްސްމަން ބުނީ، ސަޕޯޓަރުންގެ ފަރާތުން ވަރަށް ބޮޑު އެހީތެރިކަމެއް ލިބެމުން އަންނަ ކަމަށެވެ. އެގޮތުން، ޓީމު ތިބޭ ހޮޓެލް ކައިރިން އެމީހުން ދިޔައިރު ވެސް ތަރުހީބުގެ އަޑު މެދުކެނޑިފައިނުވާ ކަމަށާއި، ދަނޑުގައި ވެސް އެމީހުންގެ ފަރާތުން ވަރަށް ބޮޑު ސަޕޯޓެއް މިހާތަނަށް ލިބިފައިވާ ކަމަށް ވެސް ނާގަލްސްމަން ބުންޏެވެ.
މުބާރާތުގެ ގްރޫޕް ސްޓޭޖުގައި ޖަރުމަނުން ކުޅޭ ފަހު މެޗުގައި އަންނަ އާދީއްތަ ދުވަހުގެ ރޭ ނިކުންނާނީ ސްވިޓްޒަލޭންޑާ ދެކޮޅަށެވެ. މި މެޗު ފެށުމަށް ހަމަޖެހިފައިވަނީ އެރޭ ރާއްޖޭގަޑިން 12 ޖަހާއިރު އެވެ.