ޔޫރޯ 2024 ގެ ގްރޫޕް އެފްގައި ރޭ ޖޯޖިއާ އަތުން 1-3 ގެ ނަތީޖާއަކުން މޮޅުވި މެޗަށްފަހު ބޭއްވި ޕްރެސް ކޮންފަރެންސްގައި ތުރްކިޔޭގެ ކޯޗު، ވިންޗެންޒޯ މޮންޓެލާ ބުނީ، މި މޮޅަކީ އޭނާގެ އުފަންދުވަހަށް ލިބުނު އެންމެ ބޮޑު ހަދިޔާ ކަމަށެވެ.
ތުރްކިޔޭ އިން ޔޫރޯގެ ތާރީޚުގައި ގްރޫޕް ސްޓޭޖުގެ ފުރަތަމަ މެޗުން ހޯދީ ފުރަތަމަ މޮޅާ ބެހޭގޮތުން، މޮންޓެލާ ވަނީ، މިއީ އެ މުބާރާތަށް ހާއްސަ މެޗެއް ކަމަށާއި، އުނދަގޫ ދަނޑިވަޅުގައި ވެސް ސަޕޯޓަރުން ފުރިހަމައަށް ތަރުހީބުދީފައިވާ ކަމަށް ބުނެފައެވެ. އަދި މެޗުން މޮޅުވުމާއެކު އޭނާގެ ފުރަތަމަ އަމާޒަށް ވާސިލްވެވިފައިވާ ކަމަށް ވެސް މޮންޓެލާ ބުންޏެވެ.
މޮންޓެލާ ބުނީ، އޭނާގެ ޓީމުން މުޅި މެޗުގައި 22 ވަރަކަށް ހަމަލާ ފޮނުވާލައިފައިވާއިރު މިއަށްވުރެ ގިނައިން ލަނޑުޖެހެން ވާނެ ކަމަށެވެ. އެކަމަކު، ޓީމު ދެއްކި ކުޅުމަށް ވަރަށް ބޮޑަށް ޝުކުރުވެރިވާ ކަމަށެވެ.
އޭނާގެ ވާހަކައިގައި ވަނީ، ވީއޭއާރް އިން އެ ޓީމުން ޖެހި ދެވަނަ ލަނޑު ބަލައިނުގަތަމުން ކޮންވެސް ވަރަކަށް ކުޅުންތެރިން 'ރިލެކްސް' ވި ކަމަށް ފާހަގަކޮށްފައެވެ.
ޖޯޖިއާގެ ކުޅުމަށް ތައުރީފުކޮށް، މޮންޓެލާ ބުނީ، އެމީހުން ފިޒިކަލީ ވަރަށް ވަރުގަދަ ކަމަށާއި، ކުޅުނީ ވަރަށް އޯގަނައިޒްކޮށް ކަމަށެވެ. އެ ޓީމުން މުބާރާތަށް އައުން ހައްގު ކަމަށް ވެސް މޮންޓެލާ ބުންޏެވެ.
މެޗަށްފަހު ތުރްކިޔޭގެ ކެޕްޓަން، ހަކާން ޗައަނޮގްލޫ ބުނީ، ޖޯޖިއާ އާ ދެކޮޅަށް ކުޅުނު މެޗަކީ ވަރަށް މުހިއްމު މެޗަކަށްވުމުން މޮޅުވުން ނޫން ގޮތެއް ނެތް ކަމަށެވެ. އެހެން އެކަން ހާސިލްކުރުމާއެކު ވަރަށް ބޮޑު އުފަލެއް ލިބިފައިވާ ކަމަށް ޗައަނޮގްލޫ ބުންޏެވެ. އަދި އޭނާގެ ޓީމަށް މި ކާމިޔާބީ ހާސިލްކުރުމަށް އެންމެ ބޮޑު އެހީތެރިކަމެއްދިން ސަޕޯޓަރުންނަށް ވަރަށް ބޮޑަށް ޝުކުރުވެރިވާ ކަމަށް ޗައަނޮގްލޫ ވަނީ ބުނެފައެވެ.
މެޗުގައި ރީތި ގޯލެއް ކާމިޔާބުކުރި ތުރްކިޔޭގެ ޒުވާން ކުޅުންތެރިޔާ، އާރްދާ ގުލާ ބުނީ، ޖޯޖިއާ އާ ދެކޮޅަށް ކުޅުނީ ވަރަށް އުނދަގޫ މެޗެއް ކަމަށާއި، ހޯދީ މޮޅަށް މަރުހަބާ ކިޔާ ކަމަށެވެ. ތުރްކިޔޭގެ ކޯޗަށް ވެސް މި މޮޅު މުހިއްމުވެގެންދިޔަ ކަމަށް ގުލާ ބުންޏެވެ.
މުބާރާތުގެ ގްރޫޕް ސްޓޭޖުގައި ތުރްކިޔޭ ދެން ކުޅޭ މެޗުގައި މި މަހުގެ 22 ވާ ހޮނިހިރު ދުވަހު ނިކުންނާނީ ޕޯޗުގަލްއާ ދެކޮޅަށެވެ.