ޔޫރޯ ފުޓްބޯޅަ މުބާރާތުގެ ގްރޫޕް ޑީ ގައި ރޭ އޮސްޓްރިއާ އަތުން 0-1 އިން މޮޅުވި މެޗަށްފަހު ބޭއްވި ނޫސްވެރިންގެ ބައްދަލުވުމުގައި ފްރާންސްގެ ކޯޗު، ޑިޑިއޭ ޑެޝޯމްޕްސް ބުނީ، ގްރޫޕް ސްޓޭޖުގެ ފުރަތަމަ މެޗުގައި މި ހޯދީ ވަރަށް މުހިއްމު މޮޅެއް ކަމަށެވެ.
މެޗުގެ ފުރަތަމަ މިނެޓުން ފެށިގެން ނިމެންދެން އޮސްޓްރިއާ އިން ފްރާންސަށް މައްސަލަތައް ކުރިމަތިކޮށް، ދެއްކި މޮޅު ކުޅުމަށް ޑެޝޯމްޕްސް ތައުރީފުކޮށް ދެއްކި ވާހަކައިގައި ވަނީ، ރޭގެ މެޗުގައި އެ ޓީމުން ކުޅުނީ ފްރާންސާ އެއް ލެވެލްއެއްގައި ކަމަށް ބުނެފައެވެ.
އެކަމަކު، މެޗުގައި ފްރާންސް ޓީމަށް އިތުރު ގޯލެއް ނުޖެހުމުން ދެރަވާ ކަމަށާއި، ޖުމްލަކޮށް އޭނާގެ ޓީމުގެ ފަރާތުން ފެނުނު ކުޅުމާ މެދު ހިތްހަމަޖެހޭ ކަމަށް ޑެޝޯމްޕްސް ބުންޏެވެ.
އޭނާގެ ޓީމުގައި ހުނަރާއި ކޮލިޓީ އެބަހުރި ކަމަށާއި، ފްރާންސް ނޫން ބައެއް ޓީމުތަކުގައި ވެސް އެ ހުރިހާ ކަމެއް އެބަހުރި ކަމަށް ޑެޝޯމްޕްސް ބުންޏެވެ.
އެންމެ މަތީ ލެވެލްގައި ވަރުގަދަކޮށް ކުޅެ، ހުރިހާ ކުޅުންތެރިން ގުޅިގެން މަސައްކަތްކުރަންޖެހޭ ކަމަށާއި، އެއީ ވަރަށް މުހިއްމު ކަމެއްގެ ގޮތުގައި ޑެޝޯމްޕްސް ފާހަގަކުރިއެވެ. އެގޮތުން، އެ މެޗުގެ ފުރަތަމަ އެގާރައިގައި ހިމެނުނު ކުޅުންތެރިންގެ އިތުރުން ބެންޗުން އެރި ކުޅުންތެރިންގެ ފަރާތުން އޭނާ ބޭނުންވި ގޮތަށް މަސައްކަތްކޮށްފައިވާ ކަމަށް ޑެޝޯމްޕްސް ބުންޏެވެ.
ފްރާންސްގެ ފޯވާޑް، މާކަސް ތުރާމް ބުނީ، ގްރޫޕް ސްޓޭޖުގެ މެޗުތައް ފަށަން ބޭނުންވި ގޮތަށް އޮސްޓްރިއާ އަތުން ލިބުނު ތިން ޕޮއިންޓާ މެދު ހިތްހަމަޖެހޭ ކަމަށެވެ.
މުބާރާތުގެ ގްރޫޕް ސްޓޭޖުގައި ފްރާންސް ދެން ކުޅޭ މެޗުގައި ނިކުންނާނީ ނެދަލެންޑްސްއާ ދެކޮޅަށެވެ.