ޔޫރޯ 2024 ގެ ގްރޫޕް ސީ ގައި ރޭ ސާބިއާ އަތުން 0-1 އިން މޮޅުވި މެޗަށްފަހު ބޭއްވި ޕްރެސް ކޮންފަރެންސްގައި އިންގްލެންޑްގެ ކޯޗު، ގަރެތު ސައުތުގޭޓް ބުނީ، މެޗުގެ ފަހު ހާފުގައި ގިނަވަގުތުތަކުގައި އިންގްލެންޑުން އެންމެ ރަނގަޅަށް ބޯޅަ ގެންގުޅެފައިނުވާ ކަމަށެވެ.
އެކަމަކު، އެހެން އެގޮތަށް ދިމާވިނަމަވެސް އޭނާގެ އިޢްތިރާޒެއް ނެތް ކަމަށް ސައުތުގޭޓް ބުންޏެވެ. އެއީ، މިފަދަ މުބާރާތެއްގައި ބައެއް މެޗުތަކުގައި އެފަދަ ހާލަތްތަކާ ކުރިމަތިލާންޖެހޭނެތި ކަމަށް ސައުތުގޭޓް ބުންޏެވެ.
ސައުތުގޭޓް ބުނީ، ސާބިއާ އިން ކުޅުނު ފޯމޭޝަނުގެ ސަބަބުން އިންގްލެންޑަށް މައްސަލަތައް ކުރިމަތިވި ކަމަށެވެ. އޭގެސަބަބުން، އެ ޓީމަށް ލަނޑުޖަހާނެ ފުރުޞަތުތައް ތަނަވަސްކުރަން އުނދަގޫވި ކަމަށެވެ. އަދި އޭނާގެ ޓީމުން، ޔުނިޓެއްގެ ގޮތުގައި ވަރަށް ރަނގަޅަށް ޑިފެންސްކޮށްފައިވާ ކަމަށް ސައުތުގޭޓް ފާހަގަކުރިއެވެ.
"މިއަށްވުރެ އަދި އަހަރެމެންނަށް ހުރިހާ ކަމެއް ރަނގަޅުކުރެވޭނެ،" ސައުތުގޭޓް ބުންޏެވެ.
ސައުތުގޭޓް ބުނީ، ފުރަތަމަ ހާފުގައި އޭނާގެ ޓީމުން ވަރަށް ރަނގަޅަށް ބޯޅަ ގެންގުޅުނު ކަމަށާއި، އޭރު މެޗުގެ ކޮންޓްރޯލް އޮތީ އެމީހުން އަތުގައި ކަމަށެވެ. އޭރު ލިބުނު ފުރުޞަތުގެ ބޭނުންހިފައި، ދެވަނަ ގޯލެއް ކާމިޔާބުކުރެވެން ވާނެ ކަމަށް ސައުތުގޭޓް ބުންޏެވެ. ސައުތުގޭޓް އިތުރަށް ބުނީ، ފަހު ހާފުގައި އޭނާގެ ޓީމުގެ ފަރާތުން ވަރަށް ރަނގަޅަށް ޑިފެންސްކުރިތަން ފެނިގެންދިޔަ ކަމަށެވެ.
އިންގްލެންޑްގެ މިޑްފީލްޑްގައި ކުޅުނު ލިވަޕޫލްގެ ޑިފެންޑަރު، ޓްރެންޓް އަލެގްޒެންޑާ-އާނޯލްޑް ބުނީ، މެޗުން މޮޅުވުމުން ވަރަށް އުފާވާ ކަމަށެވެ. ރޭގެ މެޗަށް ނިކުތީ އެ ބޭނުމުގައި ކަމަށާއި، އެ ޓީމުގައި ތިބި ކުޅުންތެރިންނާއެކު އެކަން ހާސިލްކުރެވޭނެ ކަމުގެ ޔަގީންކަން އޮތް ކަމަށް ވެސް އާނޯލްޑް ބުންޏެވެ.
ސާބިއާ އާ ދެކޮޅަށް ކުޅެން އުނދަގޫވި ކަމަށާއި، އިންގްލެންޑުން ލަނޑުޖަހަން ފުރުޞަތުތަކެއް ތަނަވަސްކޮށް ރަނގަޅަށް ޑިފެންސްކޮށްފައިވާ ކަމަށް ވެސް އާނޯލްޑް ފާހަގަކުރިއެވެ.
އިންގްލެންޑުން ދެން ކުޅޭ މެޗުގައި މި މި މަހުގެ 20 ވާ ބުރާސްފަތި ދުވަހު ނިކުންނާނީ ޑެންމާކާ ދެކޮޅަށެވެ. މި މެޗު ފަށާނީ ރާއްޖޭގަޑިން ރޭގަނޑު 9 ޖަހާއިރު އެވެ.