ޔޫރޯ 2024 ގެ ގްރޫޕް ޑީގައި ރޭ ކުޅުނު މެޗުގައި ފަހަތުން އަރައި 1-2 ގެ ނަތީޖާއަކުން ޕޮލަންޑް އަތުން ނެދަލެންޑްސް މޮޅުވި މެޗަށްފަހު ބޭއްވި ޕްރެސް ކޮންފަރެންސްގައި ނެދަލެންޑްސްގެ ފޯވާޑް، ކޯޑީ ގަކްޕޯ ބުނީ، ޕޮލެންޑާ ދެކޮޅަށް ކުޅުނު މެޗުވީ ވަރަށް އުނދަގޫ މެޗަކަށް ކަމަށެވެ.
ރޭގެ މެޗުގައި ނެދަލެންޑްސް އަށް އެއްވަރުކޮށްދިން ލަނޑުޖަހައިދިން ގަކްޕޯ ބުނީ، އެމީހުން ފުރަތަމަ ގޯލުޖަހައި ލީޑްނެގުމުން، މެޗު އިތުރަށް އުނދަގޫވި ކަމަށެވެ. އޭނާގެ ޓީމުން ލަނޑުޖަހާނެ ގިނަ ފުރުޞަތުތަކެއް ތަނަވަސްކުރިކަމަށާއި، މިއަށްވުރެ ފުރިހަމަ އަށް ނިންމާލެވެން ވާނެ ކަމަށް ގަކްޕޯ ފާހަގަކުރިއެވެ. އަދި ޖުމްލަކޮށް ބަލާއިރު ނެދަލެންޑްސްގެ ކުޅުން ރަނގަޅު ކަމަށް ވެސް އޭނާ ބުންޏެވެ.
ގަކްޕޯ އިތުރަށް ބުނީ، ނެދަލެންޑްސް ޓީމަކީ ގޮތްދޫކުރާ ޓީމެއް ނޫން ކަމަށާއި، އެ ޓީމުގެ ބެންޗުން އަރަން ތިބީ ވެސް ރަނގަޅު ކުޅުންތެރިން ކަމަށެވެ. އެގޮތުން، އެ ޓީމުގެ ފޯވާޑްލައިން އެއްކޮށް ބަދަލުކޮށްލުމުން ވެސް ބެންޗުން އެރި ކުޅުންތެރިން ވެސް ތަފާތު ދެއްކި ކަމަށް އޭނާ ބުންޏެވެ. ގަކްޕޯ ބުނީ، މެޗުން ތިން ޕޮއިންޓް ލިބުމުން ވަރަށް އުފާވާ ކަމަށެވެ.
އެންމެ ފަހުގެ ފީފާ ވޯލްޑް ކަޕްގެ ގްރޫޕް ސްޓޭޖުގައި ނެދަލެންޑްސް ކުޅުނު ތިން މެޗުގައި ވެސް ގަކްޕޯ ވަނީ ލަނޑުޖަހައިފައެވެ. މިއަހަރުގެ ޔޫރޯގެ ގްރޫޕް ޑީ ގައި ނެދަލެންޑްސް ކުޅުނު ފުރަތަމަ މެޗުގައި ވެސް އެ ޓީމުގެ ފުރަތަމަ ލަނޑުޖެހީ ގަކްޕޯ އެވެ.
މުބާރާތުގެ ގްރޫޕް ސްޓޭޖުގައި ނެދަލެންޑްސް އަށް ދެން އޮތީ ޔޫރޯ ކޮލިފައިންގައި ވެސް އެ ޓީމާ އެއް ގްރޫޕެއްގައި ހިމެނުނު ފްރާންސާ ބައްދަލުކުރާ މެޗެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 22 ވަނަ ދުވަހު ރާއްޖޭގަޑިން ރޭގަނޑު 12 ޖަހާއިރު އެވެ.