ރާއްޖޭގެ ހުނަރުވެރި ފެތުންތެރިއާ މިރާލް އައިން ލަތީފް އަންހެނުންގެ ލޯންގް ކޯސް 100 މީޓަރު ބަޓަފްލައި އިވެންޓްގެ ގައުމީ ރިކޯޑް އައުކޮށްފި އެވެ.
މިރާލް މިރެކޯޑް އައުކޮށްފައި ވަނީ ސިންގަޕޫރުގައި މިހާރު ކުރިއަށްދާ އެ ގައުމުގެ 19 ވަނަ ގައުމީ ފެތުމުގެ މުބާރާތުގައެވެ.
މި ރެކޯޑް ކުރިން ވެސް އޮތީ މިރާލް އަތުގައެވެ. އެއީ 2023 ވަނަ އަހަރު، ޗައިނާގައި ކުރިއަށްދިޔަ 19 ވަނަ އޭޝިއަން ގޭމްސްގައި އޭނާ ހަދާފައިވާ ރެކޯޑެކެވެ. އެ ފަަހަރު މިރާލް ރެކޯޑް ހެދީ 01:13.99 އިން ރޭސް ފުރިހަމަ ކޮށްގެންނެވެ.
މިފަހަރު މިރާލް، އަންހެނުންގެ ލޯންގް ކޯސް 100 މީޓަރު ބަޓަފްލައި އިވެންޓްގެ ގައުމީ ރިކޯޑް އައުކޮށްފައި ވަނީ 01:13.96 އިން ރޭސް ފުރިހަމަ ކޮށްގެންނެވެ.
މިރާލް ވަނީ މި އަހަރުގެ ފެބްރުއަރީ މަހުގެ ތެރޭގައި ގިނަ އަހަރުތަކެއްވީ ގައުމީ ރެކޯޑްތަކެއް ވެސް މުގުރާލާފަ އެވެ. އޭގެތެރޭގައި އިނގިރޭސިވިލާތުގައި ކުރިއަށްދިޔަ މިޑްފީލްޑް އެންޑް ސްޓްރީޓް ކައުންޓީ ކޮލިފަޔާގައި ވާދަކޮށް އަންހެނުންގެ ޝޯޓްކޯސް 50 މީޓަރު، 100 މީޓަރު އަދި 200 މީޓަރު ބަޓަފްލައި އަދި 200 މީޓަރ މެޑްލޭ އިވެންޓުން އައުކުރި ގައުމީ ރިކޯޑު ހިމެނެއެވެ.