މެލޭޝިއާ ނެގްރީ ސެމްބިލާންގައި ބޭއްވި އައިއާރްސީ އިންޓަރނޭޝަނަލް ސެވަން އަ ސައިޑް ފުޓްބޯޅަ މުބާރާތުގެ ވެޓެރަންސް ކެޓެގަރީގެ ޗެމްޕިއަންކަން ހޯދި މޯލްޑިވްސް ސޮކަރ މޭޓްސް ޓީމު އެނބުރި ރާއްޖެ އައުމުން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައްދަލުކުރައްވައި ހިތްވަރުދެއްވައިފިއެވެ.
ރާއްޖެއިން ޖުމްލަ ފަސް ޓީމު ބައިވެރިވި މި މުބާރާތުގައި މޯލްޑިވްސް ސޮކަރ މޭޓްސް ޗެމްޕިއަންކަން ހޯދާފައިވަނީ ވެޓެރަންސް ކެޓެގަރީގެ ފައިނަލުގައި މެލޭޝިއާގެ ޓީމެއްގެ މައްޗަށް ކުރި ހޯދައިގެންނެވެ. ފައިނަލް މެޗުގައި އިދިކޮޅު ޓީމުން ދެ ލަނޑުގެ ލީޑެއްގައި ވަނިކޮށް ސޮކަރ މޭޓްސް ވަނީ ފަހަތުން އަރާ ނަތީޖާ ހަމަހަމަކޮށްފައެވެ. އަދި ޗެމްޕިއަންކަން ހޯދީ ޕެނަލްޓީގައި ކުރިހޯދައިގެންނެވެ.
މިދިޔަ އަހަރުގެ މުބާރާތުގައި ވެސް ސޮކަރ މޭޓްސްއިން ވާދަކުރިއެވެ. ނަމަވެސް އެ ފަހަރުގެ ފައިނަލުގައި ވަނީ ބަލިވެފައެވެ. މި މުބާރާތުގައި ބޫޓާން، ސިންގަޕޫރު، މެލޭޝިއާ އަދި އިންޑޮނޭޝިއާގެ ވެޓެރަންސް ޓީމުތަކުން ވާދަކުރިއެވެ.
މުބާރާތުގެ ތިން ކެޓަގަރީގައިވެސް ރާއްޖެއިން ވާދަކުރިއެވެ. އެއީ ޗެމްޕިއަންކަން ހޯދި ވެޓެރަންސް ކެޓެގަރީގެ އިތުރުން މާސްޓަރސް ވެޓެރަންސް އަދި ގްރޭންޑް މާސްޓަރސް ކެޓަގަރީގައެވެ. ވެޓެރަންސް ކެޓެގަރީގައި ކުޅުނީ ރާއްޖޭގެ 40 އަހަރުން މަތީގެ ކުޅުންތެރިންނެވެ. އަދި މުބާރާތުގެ ގަވާއިދު އޮތް ގޮތުން 35 އަހަރުން މަތީގެ ތިން ކުޅުންތެރިއަކު ޓީމު ލިސްޓުގައި ޖެހުމުގެ ފުރުސަތު އޮތެވެ. ރާއްޖެއިން ވަނީ އެ ފުރުސަތުގެ ބޭނުން ހިފައި ޓީމު ވަރުގަދަކޮށްފައެވެ.
މި ޓީމުގައި ރާއްޖޭގެ ގައުމީ ޓީމުގެ ކުރީގެ ކެޕްޓަން އަކުރަމް އަބްދުލްޢަނީ އާއި، ގޯލްކީޕަރު އިމްރާން މުޙައްމަދާއި، ޝަމްވީލް ގާސިމް (ބޮންޑާ) އާއި، އިސްމާޢީލް އީސަ (މެސީ) އަދި މުޙައްމަދު އުމެއިރު ފަދަ ކުޅުންތެރިން ފާހަގަކޮށްލެވެއެވެ.
މުބާރާތުގެ ކާމިޔާބީއަށްފަހު އެނބުރި ރާއްޖެ އައުމުން ޓީމަށް މަރުހަބާ ކިޔާފައިވަނީ ވީއައިޕީ ސަރަހައްދުންނެވެ. ޓީމަށް މަރުހަބާ ދެންނެވީ ކުޅިވަރާ ބެހޭ ވަޒީރުގެ އިތުރުން ކޮމިޝަނަރ އޮފް ސްޕޯޓްސް މުޙައްމަދު ޠަލާލް އާއި މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ބައެއް އިސްވެރިންނެވެ.
"ޕީއެސްއެމް ސްޕޯޓްސް" އާ ވާހަކަދައްކަމުން އަކުރަމް އަބްދުލްޢަނީ ބުނީ ޗެމްޕިއަންކަން ލިބުމުން ލިބުނީ ބޮޑު އުފާވެރިކަމެއް ކަމަށާއި، މިއީ ހުރިހާ ކުޅުންތެރިންވެސް ބޭނުންވެފައިވާ ކަމެއް ކަމަށެވެ.
ސޮކަރ މޭޓްސް ވަނީ މި މުބާރާތުގެ ކުރިން މާލޭގައި މުބާރާތެއް ކުޅެފައެވެ. މި މުބާރާތުގެ ސަބަބުން މުޅި ޓީމަށް އޭގެ ފައިދާ ކުރިކަމަށް އަކުރަމް ވަނީ ފާހަގަކޮށްފައެވެ.