މަޖިލީހުގެ މެޖޯރިޓީ ލީޑަރަކަށް ފަލާހު، މައިނޯރިޓީ ލީޑަރަކަށް ނާޒިލް

ރައްޔިތުންގެ މަޖިލީހުގެ މެޖޯރިޓީ ލީޑަރަކަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު، މައިނޯރިޓީ ލީޑަރަކަށް އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ހަމަޖައްސަވައިފިއެވެ.

މަޖިލީހުގެ މެޖޯރިޓީ އާއި މައިނޯރިޓީ ލީޑަރުން ކަނޑައަޅުއްވައި އެކަން އިއުލާން ކުރެއްވީ 20 ވަނަ ރައްޔިތުންގެ މަޖިލީހުގެ ހަތަރުވަނަ ޖަލްސާގައި މަޖިލީހުގެ ރައީސް ޢަބްދުއްރަޙީމް އަބްދުﷲއެވެ.

މަޖިލީހުގެ ގަވާއިދުގައިވާގޮތުން މެޖޯރިޓީ ލީޑަރަކަށް ހުންނަވާނީ މަޖިލީހުގެ އެންމެ ގިނަ ގޮނޑި ތަމްސީލުކުރާ ޕާޓީގެ ޕީޖީ ލީޑަރެވެ. 20 ވަނަ މަޖިލީހުގައި 75 ގޮނޑިއާއެކު މެޖޯރިޓީ ތަމްސީލުކުރަނީ ސަރުކާރު ތަމްސީލް ކުރާ ޕާޓީ، ޕީޕަލްސް ނޭޝަނަލް ކޮންގްރެސް، ޕީއެންސީންނެވެ.

މައިނޯރިޓީ ލީޑަރަކަށް ހުންނަވާނީ ރައްޔިތުންގެ މަޖިލީހުގައި ދެވަނައަށް އެންމެ ގިނަ ގޮނޑި ތަމްސީލުކުރާ ޕާޓީގެ ޕީޖީ ލީޑަރެވެ. 20 ވަނަ މަޖިލީހުގައި 12 މެންބަރުންނާއެކު ދެވަނައަށް އެންމެ ގިނަ ގޮނޑި ތަމްސީލް ކުރާ ޕާޓީއަކީ އެމްޑީޕީއެވެ.

ޕީއެންސީން އެ ޕާޓީގެ ޕީޖީ ލީޑަރަކަށް ފަލާހު އައްޔަން ކުރެއްވީ މިދިޔަ މަހުގެ 22 ވަނަ ދުވަހުއެވެ. އަދި އެމްޑީޕީގެ ޕީޖީ ލީޑަރަކަށް ނާޒިލް އައްޔަން ކުރެއްވީ މިދިޔަ މަހުގެ 27 ވަނަ ދުވަހުއެވެ.