ސައުދީ އަރަބިއްޔާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މަޓްރެކް ޢަބްދުالله އަލްއަޖަލީން އަލްދުސާރީ، ރާއްޖޭގެ ޓޭބަލް ޓެނިސް ތަރި ފާތިމަތު ދީމާ އަލީއަށް ބައްދަލުކުރައްވާ ހިތްވަރުދެއްވައިފިއެވެ.
ދީމާއަކީ ނޭޕާލްގެ ކަތުމަންޑޫގައި ބޭއްވި ސައުތު އޭޝިއާ ރީޖަނަލް އޮލިމްޕިކް ކޮލިފިކޭޝަން ކާމިޔާބުކޮށް، އޮލިމްޕިކް ގޭމްސްއަށް ކޮލިފައިވި ފުރަތަމަ ދިވެހި އެތުލީޓެވެ.
މި ބައްދަލުވުމުގައި ސައުދީ އަރަބިއްޔާގެ ސަފީރު ވަނީ ދީމާއަށް ގިނަ ފުރުސަތުތަކެއް ފަހިކޮށްދެއްވާނެ ކަމުގެ ޔަގީންކަން ދެއްވާފައެވެ. އެގޮތުން، ސަޢުދީ ޢަރަބިއްޔާގެ ފަރާތުން ސްޕޯޓްސް ސްކޮލަރޝިޕާއި މަތީ ތަޢުލީމުގެ ފުރުޞަތުތައް ފަހިކޮށްދެއްވާނެކަމުގެ ޔަޤީންކަން ދެއްވިއެވެ.
ފްރާންސްގެ ވެރިރަށް ޕެރިހުގައި ބާއްވާ އޮލިމްޕިކްސްއަށް ދީމާ ކޮލިފައިވިއިރު، މިއީ ރާއްޖޭގެ ކުޅިވަރު ތާރީޚުގައި ދިވެހި އެތުލީޓަކު ދުނިޔޭގެ އެންމެ ބޮޑު ކުޅިވަރު އީދަށް ކޮލިފައިވި ފުރަތަމަ ފަހަރެވެ. މީގެކުރިން ރާއްޖޭގެ އެތުލީޓުން އޮލިމްޕިކްސްގައި ވާދަކުރަމުން އައީ އިންވިޓޭޝަނަލް ފުރުސަތުތަކުގެ ތެރެއިންނެވެ.
ދެކުނު އޭޝިއާގެ ޓީޓީ މުބާރާތުން ހޯދި ރިހި މެޑެއްޔާއެކު ދުނިޔޭގެ ޓީޓީ މުބާރާތަށްވެސް ދީމާ ވަނީ މީގެކުރިން ކޮލިފައިވެފައެވެ. އަދި ދިވެހި ސަރުކާރާއި ޗައިނާގެ އެހީއާއެކު ދިމާގެ ތަމްރީނުތައް ކުރިއަށްގެންގޮސް، 2019 ވަނަ އަހަރު އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ގިނަ ރަން މެޑަލްތަކެއް ހޯދައި، ކުޅިވަރު ތާރީޚު ދީމާ ވަނީ ބަދަލުކޮށްލާފައެވެ.