ދަށު ކޯޓުތަކުގެ ފަނޑިޔާރުންވެސް ގައުން ބޭނުންކުރާގޮތަށް ހަމަޖައްސައިފި
-
މި ބަދަލު ގެނައުމަށް ނިންމާފައިވަނީ އަންނަ އޮކްޓޯބަރު މަހުން ފެށިގެން
-
ގައުން ފޯރުކޯށްދޭން ޖެހޭނީ ޑީޖޭއޭއިން
ދަށު ކޯޓުތަކުގެ ފަނޑިޔާރުންވެސް ޝަރީއަތުގެ މަޖިލީހުގައި ގައުން ތުރުކުރައްވާގޮތަށް ގަވާއިދު ބަދަލުކޮށްފިއެވެ.
މި ބަދަލު ގެނައުމުގެ ކުރީ ގައުން ތުރުކުރައްވަންޖެހެނީ ސުޕްރީމް ކޯޓާއި ހައި ކޯޓުގެ ފަނޑިޔާރުން އެކަންޏެވެ. އަދި ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ތިއްބަވަނީ ކަޅު ނުވަތަ ގަދަ ނޫކުލައިގެ ކޯޓު ފަޓުލޫނުގައެވެ.
ސުޕްރީމް ކޯޓުން މިއަދު އާންމުކުރެއްވި "ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ހެދުން އެޅުމުގެ އުސޫލު"ގައިވާ ގޮތުން އަންނަ އޮކްޓޯބަރު މަހުގެ ފުރަތަމަ ދުވަހުން ފެށިގެން ދަށު ކޯޓުތަކުގެ ފަނޑިޔާރުން ޝަރީއަތުގައި މަޖިލީހުގައި ތިއްބަވަން ޖެހޭނީ ގައުން ތުރުކުރައްވައިގެނެވެ.
އެ ގައުނަކީ ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ތައްޔާރުކުރާ ނަމޫނާއާ އެއްގޮތަށް ހުންނަ ގައުނަކަށް ވާންޖެހޭނެ ކަމަށްވެސް ގަވާއިދުގައި ވަނީ ބަޔާންކޮށްފައެވެ. އަދި މި ގަވާއިދަށް އަމަލުކުރަން ފަށާތާ ހަތަރު މަސް ތެރޭގައި ދަށު ކޯޓުތަކުގެ ފަނޑިޔާރުންނަށް ޑީޖޭއޭއިން ގައުން ފޯރުކޮށްދޭން ޖެހޭނެކަންވެސް ވަނީ ބަޔާންކޮށްފައެވެ.