މިއަދު ފެށި އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕުގައި ހެނދުނު ކުޅެން އޮތް މެޗުތަކުގެ ބަދަލުގައި ރޭގަނޑަށް ބަދަލުކޮށް، މުބާރާތުގެ ޝެޑިއުލަށް ބޮޑު ބަދަލެއް ގެނެސްފިއެވެ.
ޝެޑިއުލަށް ބަދަލު ގެނައީ މުބާރާތުގައި މިއަދު ހެނދުނު މެޗެއް ކުޅުނު ފަހުންނެވެ. އޮޑި ސްޕޯޓްސް ކުލަބު އަތުން ޓީސީ ސްޕޯޓްސް ކުލަބު މޮޅުވި މެޗު ކުޅެފައިވަނީ ހެނދުނު 8 ގައެވެ.
"ޕީއެސްއެމް ސްޕޯޓްސް" އަށް މައުލޫމާތު ލިބިފައިވާ ގޮތުގައި ޝެޑިއުލަށް ބަދަލު ގެނައީ ކުޅިވަރާ ބެހޭ ވުޒާރާއިން ރޭގަނޑު މެޗުތައް ކުޅެން ހުއްދަ ދިނުމާއެކުއެވެ. އަދި އެކަން އެ ވުޒާރާއިން މިއަދު ވަނީ އެފްއޭއެމަށް އަންގާފައެވެ.
މި ބަދަލާއެކު މިއަދު ހަވީރު ކުޅެން އޮތް ސުޕަ ޔުނައިޓެޑް ސްޕޯޓްސް (ސަސް) އާއި ބުރު ސްޕޯޓްސް ކުލަބު ބައްދަލުކުރާ މެޗު މިހާރު ފަށާނީ މިރޭ 9 ޖަހާއިރެވެ.
ޔޫތު ޗެމްޕިއަންޝިޕުގެ މެޗުތައް ހެނދުނު ކުޅެން ނިންމުމާ ގުޅިގެން ގިނަބަޔަކު ވަނީ ކަންބޮޑުވުން ފާޅުކޮށްފައެވެ. އޭރު އެގޮތަށް ޝެޑިއުލް ތައްޔާރުކުރީ ރޭގަނޑު މެޗުތައް ނުކުޅެވޭނެ ކަމަށް ބަލައިގެންނެވެ. އެއީ ގަލޮޅު ދަނޑުގައި ލައިޓުތައް މަރާމާތުކުރުމުގެ މަސައްކަތް ނުނިމޭތީއެވެ.