ދެކުނު އޭޝިއާގެ ޗެމްޕިއަންޝިޕަކުން ވިދިވިދިގެން ތިން ރަން މެޑަލް ހޯދި ރާއްޖޭގެ ފުރަތަމަ އެތުލީޓަކަށް އަޒުނީން ރަޝާދު ވެއްޖެއެވެ.
ސްޕޯޓްސް ފިޒީކްގެ ގައުމީ ޗެމްޕިއަން އަޒްނީން ވަނީ ރާއްޖޭގައި މިހާރު ކުރިއަށްދާ ދެކުނު އޭޝިއާގެ ބޮޑީބިލްޑިން ޗެމްޕިއަންޝިޕުގެ ސްޕޯޓްސް ފީޒީކް އަޕްޓު 170 ސެންޓިމީޓަރުގެ ކެޓެގަރީން ރަން މެޑަލް ހޯދާފައެވެ. މި މެޑެއްޔާއެކު އޭނާ ވެފައިވަނީ ދެކުނު އޭޝިއާގެ ޗެމްޕިއަންޝިޕަކުން ވިދިވިދިގެން ތިން ރަން މެޑަލް ހޯދި ރާއްޖޭގެ ހަމައެކަނި އެތުލީޓަށެވެ.
މި ރަން މެޑެއްޔާއެކު އަޒްނީނަށް ވަނީ ރާއްޖޭގެ ކުޅިވަރު ތާރީޚުން ބޮޑު ޝަރަފެއް ލިބިފައެވެ. އެއީ ރާއްޖޭގެ ފަސްގަނޑުގައި ބޭއްވި ބައިނަލްއަގުވާމީ ތިން މުބާރާތެއްގައި ރަން މެޑަލް ހޯދި ފުރަތަމަ އެތުލީޓުގެ ޝަރަފެވެ.
ރާއްޖޭގައި 2022 ގައި ބޭއްވި އޭޝިއަން ޗެމްޕިއަންޝިޕުން ފަށައިގެން އަޒްނީން ދަމަހައްޓަމުން އައި ރިކޯޑުގެ ތެރެއިން އޭނާ ވަނީ އެ އަހަރު ނޭޕާލުގައި ބޭއްވި ދެކުނު އޭޝިއާ މުބާރާތުގައިވެސް ރަން މެޑަލް ހޯދާފައެވެ. އަދި މިދިޔަ އަހަރު ރާއްޖޭގައި ބޭއްވި މުބާރާތުންވެސް ރަން މެޑަލް ހޯދިއެވެ.
މާދަމާގެ ނިޔަލަށް ކުރިޔަށްދާ މި މުބާރާތުގެ އެންމެ ފުރަތަމަ ދުވަހު ކުރިއަށްދިޔަ އިވެންޓުތަކުގެ ތެރެއިން ރާއްޖޭގެ ފަތުހުﷲ މުޙައްމަދާއި، ޝާހީން ވާދަކުރި އިވެންޓުތަކުން ވަނީ ރަން މެޑަލް ހޯދާފައެވެ.